Read Пәймана Ну (Инщил) Тимотʼейо II 2 Bible Online

Тимотʼейо II 2 - Пәймана Ну (Инщил) bible

Тимотʼейо II 2

¹Аԝа лаԝе мьн, бь ԝе кʼәрәма мәйә кӧ йәктийа Мәсиһ Исада йә ԛәԝат бә.

²У әԝ тьштед кӧ тә ль бәр гәләк шәʼда жь мьн бьһист, бьсперә ԝан мәрьвед амьн, йед кӧ ԝе бькарьбьн һьнәкед дьн һин кьн.

³Аԝа тʼәви щәфе мә бә, мина әскәре Мәсиһ Исайи ԛәнщ.

⁴Тʼӧ әскәр шьхӧле бьнәлитийева мьжул набә, ԝәки ль сәрәскәр хԝәш бе.

⁵Ләщкʼарәк жи кʼофийе настинә, һәгәр ль гора ԛәйдә нәкʼәвә ләще.

⁶У щоткʼар, кӧ щәфе дькʼьшинә, гәрәке әԝ пешьн жь бәред әʼрде тәʼм кә.

⁷Бьзаньбә әз чь дьбежьм, чьмки Хӧдан һәр тьштида һʼьш-аԛьл ԝе бьдә тә.

⁸Бир бинә ԝи Иса Мәсиһе жь мьрьне рʼакьри, жь зӧрʼәта Даԝьд, ль гора ԝе Мьзгинийа әз даннасин дькьм.

⁹Бона ве Мьзгинийе әз дьчәрчьрьм, һʼәта мина зӧлмкʼарәки жи ԛәйдкьри мә, ле хәбәра Хԝәде ԛәйдкьри нинә.

¹⁰Ләма әз һәр тьшти тәйах дькьм, бона хатьре бьжартийа, кӧ әԝ жи ԝе хьлазбуна кӧ бь сайа Мәсиһ Иса йә, бьстиньн, бь рʼумәта һʼәта-һʼәтайева тʼәвайи.

¹¹Ве готьнеда хельф тʼӧнә: Һәгәр әм тʼәви Ԝи мьрьн, әме тʼәви Ԝи бьжин жи.

¹²Һәгәр әм тәйах кьн, әме пʼадшатийе жи тʼәви Ԝи бькьн. Һәгәр әм Ԝи инкʼар кьн, Әԝе жи мә инкʼар кә[4].

¹³Һәгәр әм амьн нәминьн, Әԝе амьн бьминә, чьмки Әԝ нькарә Хԝә инкʼар кә[5].

¹⁴Ван тьшта бинә бира щьмәʼте, ль бәр Хԝәде бькә дәйне стуйе ԝан, кӧ сәр хәбәра һәврʼа нәкʼәвьнә дәʼԝе. Әԝ кери тʼӧ кәси найе, тʼәне мала гӧһдара хьраб дькә.

¹⁵Бькә кӧ тӧ ль Хԝәде хԝәш бейи, пʼаләки ӧса кӧ шәрм нәки, хәбәра рʼастийе рʼаст шьровәки.

¹⁶Ле жь хәбәрданед һʼәрамә пʼучʼ хԝә дур бьгьрә, чьмки әвед кӧ хԝә данә ве йәке, ԝе һе нәпʼакийеда пешда һәрʼьн

¹⁷у хәбәред ԝан мина хьш-хьше пʼәнщ дьдә. Һумәнайо у Фьлито жи жь ԝан ьн,

¹⁸йед кӧ жь рʼастийе хальфинә у дьбежьн, кӧ рʼабуна мьрийа иди буйә у баԝәрийа һьнәка дәвәрʼу дькьн.

¹⁹Ле бәле һʼиме кӧ Хԝәде дани ԛәдим дьминә у әв мор сәр ә: «Хӧдан йед пʼара Хԝә нас дькә»[6] у «Һәр кәсед кӧ наве Хӧдан һьлданә сәр хԝә, бьра әԝ жь нәһәԛийе дур бьн».

²⁰Маләкә мәзьнда нә кӧ тʼәне дәрданед зерʼ у зив һәнә, ле йед жь дар у һʼәрʼийе жи һәнә, һьнәк бона дәрәщед бьльнд ьн, һьнәк жи бона дәрәщед ньмьз.

²¹Аԝа һәгәр йәк хԝә жь ԝан тьштед нәщайиз[7] паԛьж кә, әԝе бьбә дәрданәкә дәрәща бьльнд, бӧһӧрти-жьбарә, кери хԝәйе хԝә һати, бона һәр дәрәщед ԛәнщда һазьр.

²²Жь дьлхԝәстьнед щаһьлтийе бьрʼәвә, хԝә ль һәԛийе, баԝәрийе, һʼьзкьрьне, әʼдьлайийе бьгьрә, тʼәви ԝан бә, йед кӧ бь дьле сах гази наве Хӧдан дькьн.

²³Тӧ хԝә жь дәʼԝ-дозед ахмахә бефәʼм дур бьгьрә, чьмки тӧ зани кӧ шәрʼ жь ԝан пешда тен.

²⁴Ль хӧламе Хӧдан накʼәвә, кӧ шәрʼ бькә, ле һьндава һʼәмуйада бәрбьһер бә, бькарьбә һин кә у бинфьрә бә,

²⁵бь ширьнайи йед мьԛабьл ширәт кә, бәлки Хԝәде мәщале бьдә ԝан, кӧ жь гӧнәкьрьне вәгәрʼьн у рʼастийе нас кьн.

²⁶Һьнге әԝе сәр һʼьше хԝәда бен, жь тʼәләка ԝи мирещьн хьлаз бьн, кʼижани әԝ гьртьнә, кӧ әʼмьре ԝи бьԛәдиньн.