Read Пәймана Ну (Инщил) Тито 1 Bible Online

Тито 1 - Пәймана Ну (Инщил) bible

Тито 1

¹Жь Паԝлосе хӧламе Хԝәде у шандийе Иса Мәсиһ, бона пешдачуйина баԝәрийа бьжартийед Хԝәде у занәбуна сәр рʼастийе, анәгори хԝәденасийе,

²ӧса жи бона ԝе гӧмана жийина һʼәта-һʼәтайе газикьри[1]. Бона ԝе жийине, Хԝәдейе хԝәйе готьна Хԝә,[2] һе дәԝред бәреда соз дайә

³у ԝәхте хԝәда готьна Хԝә бь даннасинийе да әʼйанкьрьне, йа кӧ ль мьн һатә спартьне, бь әʼмьре Хԝәдейе Хьлазкьре мә.

⁴Титорʼа, лаԝе хԝәйи һәԛ-һʼәлали баԝәрийа мәйә тʼомәрида: Дә бьра кʼәрәм у әʼдьлайийа Хԝәдейе Бав у Мәсиһ Иса Хьлазкьре мә ль тә бә.

⁵Бона ԝе йәке мьн тӧ ль Кьретайе һьшти, ԝәки чь кемаси һәбьн бини сери у һәр бажарәкида бәрпьрсийара кʼьфш ки, чаԝа мьн әв тʼәми ль тә кьр:

⁶Гәрәке бәрпьрсийар беләкʼә бә, мере жьнәке бә, зарʼед ԝи баԝәрмәнд бьн, йед кӧ бона авитийе йан жи бона нәгӧһдарийе нәкʼәтьнә нава дәв-дьрана.

⁷Бәле сәрԝер чаԝа малкьре Хԝәде, гәрәке беләкʼә бә: Нә сәрһʼьшк, нә һерс, нә пәй шәраве кʼәти, нә сьрʼтук, нә пәй кʼәда һʼәрам,

⁸ле меванһʼьз, херхԝаз, аԛьлда гьран, сәр һәԛийе, Хԝәдерʼа дайи, хԝәгьрти.

⁹Гәрәке ԝе готьна амьн ԛәԝин бьгьрә, чаԝа кӧ һин буйә, ԝәки бькарьбә бь һинкьрьна сахләм дьл бьдә йед майин у шашийед мьԛабьла бьдә рʼуйе ԝан.

¹⁰Йед хԝәсәрихԝә гәләк ьн, йед хәбәрпʼучʼ у дәрәԝин, илаһи әԝед кӧ жь нава щьһуйада[3] нә.

¹¹Гәрәке дәнге йед ӧса бьдьнә бьрʼине, чьмки әԝ мала лап хьраб дькьн, тьштед нәщайиз һин дькьн у ве йәке бона кʼара хԝәйә һʼәрам дькьн.

¹²Жь кьретийа һәма хут занәки[4] ԝан жи готийә: «Кьрети тʼьме дәрәԝин ьн, әԝ рʼәʼԝьред хьраб ьн, у пʼьрʼхӧред бехирәт ьн».

¹³Әв шәʼдәтикә рʼаст ә, ләма һʼьшк ль ԝан һьле, кӧ сахләм бьн баԝәрийеда

¹⁴у гӧһ нәдьнә чʼьловискийед щьһуйа у тʼәмийед ԝан мәрьвед кӧ жь рʼастийе дагәрʼийанә.

¹⁵Һәр тьшт һʼәлал ә бона һʼәлала, ле һʼәрам у нәбаԝәрарʼа тьштәки һʼәлал тʼӧнә, һʼәта аԛьл у исафа ԝан жи һʼәрʼьминә.

¹⁶Әԝ дьбежьн, кӧ Хԝәде нас дькьн, ле бь кьред хԝә Ԝи инкʼар дькьн, һʼәрам у хԝәсәрихԝә нә у һәр кьрьнәкә ԛәнщрʼа бекер ьн.