Read Пәймана Ну (Инщил) Тито 3 Bible Online

Тито 3 - Пәймана Ну (Инщил) bible

Тито 3

¹Бькә бира щьмәʼте, кӧ гӧрʼа сәрԝер у һʼӧкӧмәта бькьн, гӧһдар бьн у бона һʼәму кьрьнед ԛәнщ һазьр сәкьни бьн.

²Һьндава тʼӧ кәсәкида хьраб хәбәр нәдьн, шәрʼуд нибьн, ле мьлук бьн у ширьнайийа хԝә һьндава һʼәму мәрьвада бьдьнә кʼьфше.

³Чьмки әм жи ԝәхтәке бефәʼм бун, хԝәсәрихԝә, хальфи у хӧламед щурʼә-щурʼә тәмед хьраб у кʼефа дьле хԝә бун, мә нава хьрабийе у һʼәвсудийеда дьжит, әм мина мәʼре рʼәш, ль бәр чʼәʼве һәв рʼәш бун.

⁴Ле гава ширьнайи у һʼьзкьрьна Хԝәде, Хьлазкьре мә хӧйа бу,

⁵Ԝи әм хьлаз кьрьн. Нә кӧ бона ԝан кьрьнед рʼастә кӧ мә кьрьн, ле ль гора рʼәʼма Хԝә әм хьлаз кьрьн, бь шуштьне әм ну дьне кʼәтьн у бь Рʼӧһʼе Пироз нуйәжийин бун[5].

⁶Ԝи Хԝәдейи әԝ Рʼӧһʼ бь мәрʼдани сәр мәда баранд, бь дәсте Иса Мәсиһе Хьлазкьре мә,

⁷ԝәки бь кʼәрәма Ԝи әм рʼаст бенә һʼәсабе у бь ԝе гӧмане жийина һʼәта-һʼәтайе ԝар бьн.

⁸Ве готьнеда хельф тʼӧнә. У әз дьхԝазьм кӧ тӧ ван тьшта әʼсәйи ки, ԝәки йед кӧ баԝәрийа хԝә Хԝәде тиньн, хирәт кьн, тьштед ԛәнщ бькьн. Әвана мәрьварʼа ԛәнщ у кʼар ьн.

⁹Ле тӧ хԝә жь дәʼԝ-дозед ахмахти, рʼәԛәма сьлсьләта, һәврʼькʼийе у шәрʼ-дәʼԝед ль сәр Ԛануне дур бьгьрә, чьмки әԝ бекер у бекʼар ьн.

¹⁰Жь йе кӧ бетʼьфаԛийе дькә, щарәке-дӧда ширәт кә дур кʼәвә.

¹¹Тӧ зани кӧ йе ӧса хальфи у гӧнәкʼар ә, әԝ хԝәха диԝане сәр хԝәда тинә.

¹²Гава Артәмас йан Тьхико әз бьшиньмә щәм тә, бькә кӧ бейи Никополисе, щәм мьн, чьмки мьн ԛьрар да зьвьстана хԝә ль ԝьр дәрбаз кьм.

¹³Зенасе ԛанунзан у Аполо зу вәрʼекә, ӧса бә кӧ әԝ рʼева кемасийа тьштәки нәбиньн.

¹⁴Йед жь мә жи бьра һин бьн, пәй кьрьнед ԛәнщ бьн, ԝәки кери һʼәԝщәтийа мәрьвайе бен у бе бәр нәбьн.

¹⁵Һʼәмуйед тʼәви мьн ль тә сьлав дькьн. Сьлаве бьдә ԝан, йед кӧ баԝәрийеда мә һʼьз дькьн. Кʼәрәма Хԝәде ԝә һʼәмуйарʼа бә.