Read Пәймана Ну (Инщил) Ибрани 12 Bible Online

Ибрани 12 - Пәймана Ну (Инщил) bible

Ибрани 12

¹Аԝа кӧ һаԛас әʼлаләта шәʼдайә гьран дора мә гьртийә, дә ԝәрьн әм һʼәму гьранийе у ԝи гӧне кӧ рʼьһʼәт ль мә дьԝәлә жь хԝә дур хьн у бь тәйах ләщмәйдана пешийа хԝәда бьрʼәвьн.

²Дә иди әм дина хԝә бьдьнә Иса, ԝи Пешикʼеши у Кʼамьлкьре баԝәрийа мә, Йе кӧ бона ԝе шабуна пешийа Хԝә хач һьлани, шәрм бәр тьштәки һʼәсаб нәкьр, паше кʼеләка Хԝәдейә рʼасте сәр тʼәхт рʼуньшт[101].

³Аԝа сәр Ԝи бьфькьрьн, Йе кӧ ль бәр ԝан гӧнәкʼаред мьԛабьли Хԝә тәйах кьр. Һьнге һуне нәԝәстьн у жь илаще нәкʼәвьн.

⁴Ԝә һе һʼәта хунрʼетьне мьԛабьли гӧнә шәрʼ нәкьрийә.

⁵Гәло ԝә әԝ дьлдайина бир кьрийә, йа кӧ Хԝәде ԝәрʼа чаԝа тʼәви зарʼед Хԝә хәбәр да? «Лаԝе Мьн, ширәта Хӧдан пьшт гӧһе хԝәва нәвежә у нә жи гава әԝ ль тә һьлте, ль бәр хԝә кʼәвә.

⁶Чьмки Хӧдан кʼе һʼьз дькә, ԝи ширәт дькә у кʼижани чаԝа лаԝ ԛәбул дькә, щәза дькә»[102].

⁷Һун ширәте тәйах кьн, чьмки Хԝәде тʼәви ԝә рʼадьбә-рʼудьни чаԝа тʼәви зарʼед Хԝә. Әԝ кʼижан зарʼ ә, кӧ бав ԝи ширәт накә?[103]

⁸Ле һәгәр һун нәйенә ширәткьрьне чаԝа һʼәму зарʼ тенә ширәткьрьне, кӧ ӧса йә һун нә зарʼед һʼәлал ьн, ле йед жь зьнекʼарийе нә.

⁹Һәгәр әм кӧ жь бавед хԝәйә хун-гошт тенә ширәткьрьне вәдькʼьшьн, һе чьԛас зедә гәрәке әм гӧрʼа Баве рʼӧһʼе хԝәда бьн, ԝәки әм бьжин?

¹⁰Бавед мәйә хун-гошт ԝәхтәки кьн ль гора дьле хԝә мә ширәт дькьн, ле Хԝәде бона кʼара мә, ԝәки әм жи мина Ԝи бьбьн пироз.

¹¹Рʼаст ә һәр ширәтәк ԝе дәме дьле мәрийа ша накә, ле дешинә, ле бәле паше йед кӧ бь ԝе һинбуйи нә, бәре әʼдьлайийе жь жийина рʼаст дьчьньн[104].

¹²Аԝа ԛолане мьлед хԝәйә сьстбуйи у ԛӧдуме чокед хԝәйә бе тʼаԛәт бьшьдиньн[105]

¹³у ньгед хԝә рʼийа рʼастда бавежьн, кӧ йе дькӧлә һол нәбә[106], ле сәрда ԛәнщ бә.

¹⁴Бькьн кӧ тʼәви һʼәмуйа әʼдьл бьн у жийина пироз дәрбаз кьн. Бейи пирозийе тʼӧ кәс ԝе Хӧдан нәбинә.

¹⁵Һаш жь хԝә һәбьн, нәбә кӧ жь ԝә йәк дәсте хԝә жь кʼәрәма Хԝәде бькә у нәбә кӧ йәк нава ԝәда бьбә рʼаԝәки тәʼл тәнгасийе бьдә у гәләка жәʼрдадайи кә.

¹⁶Һаш жь хԝә һәбьн, нәбә кӧ йәк чʼәʼвдәр йан дьнеһʼьз бә мина Әсаԝ[107], кӧ бона зькә нан ньхӧртийа хԝә фьрот.

¹⁷Аԝа ԝәва әʼйан ә жи, паше гава әԝи бь һесьра хԝәст кӧ әԝ дӧайе ньхӧртийе ль ԝи жи бьбә, һатә тʼәхсиркьрьне. Чʼарә дест нәкʼәт, ԝәки әԝ тьште жь дәсте хԝә кьрьбу пашда бьстанда[108].

¹⁸Һун мина щьмәʼта Исраеле незики ԝи чʼийайе[109] бәр чʼәʼва нәбунә, йе кӧ агьр пекʼәтьбу, бь тәʼристанийе, мьж-думане у бобәлискева гьрти бу,

¹⁹кӧ ль ԝьр борʼи ле дькʼәт у дәнге готьне дьһат. Гава йед кӧ әв дәнг дьбьһистьн, һиви дькьрьн, кӧ иди хәбәрәкә дьн ԝанрʼа нәйе готьне,

²⁰чьмки ль ԝе фәрмане тʼаԝ нәдькьрьн кӧ дьгот: «Һәгәр һʼәйԝанәк жи незики чʼийе бә, гәрәке бьдьнә бәр кәвьра»[110].

²¹Әв дитьна бәр чʼәʼва ӧса саԝ бу, һʼәта кӧ Муса жи гот: «Әз дьтьрсьм у дьләрьзьм»[111].

²²Ле һун незики чʼийайе Сийоне бунә, ԝи бажаре Хԝәдейе сах, Оршәлима әʼзмана у незики ԝе кʼомбуна рʼәнгинә мьлйакʼәтед беһʼәсаб бунә, ԝе щьвина ньхӧрийайә кӧ навед ԝан ль әʼзмана ньвисар ә. Һун незики Хԝәде бунә, кӧ һʼакьме һʼәмуйа йә у незики рʼӧһʼед рʼаста бунә, йед кӧ гьһиштьнә кʼамьлтийе

²⁴у незики Исайе кӧ навчетийе пәймана ну дькә у хуна Ԝийә рʼәшанди бунә, кӧ жь хуна Һабил ԛәнщтьр хәбәр дьдә[112].

²⁵Иди һаш жь хԝә һәбьн, нәбә кӧ һун Әԝи ԝәрʼа хәбәр дьдә тʼәхсир кьн. Һәгәр әԝед кӧ ль сәр дьне Муса тʼәхсир кьрьн, кʼижани кӧ тʼәмийед Хԝәде дьдан хьлаз нәбун, иди әме чаԝа бькарьбьн хьлаз бьн һәгәр әм пьшта хԝә бьдьнә Йе кӧ жь әʼзмана мәрʼа хәбәр дьдә?[113]

²⁶Дәнге Ԝи һьнге әʼрд һʼәжанд, ле ньһа соз дайә у дьбежә: «Әзе щарәкә дьн жи бьһʼәжиньм, нә кӧ тʼәне әʼрде, ле әʼзмана жи»[114].

²⁷Хәбәра «щарәкә дьн» дьдә кʼьфше, кӧ тьштед әʼфьри ԝе бьһʼәжьн у бенә һьлдане, ԝәки йед наһʼәжьн щида бьминьн.

²⁸Аԝа әм ве йәке бьшекьриньн, кӧ әм пʼадшатикә нәһʼәжийайи дьстиньн у бь ви аԝайи бь хоф у тьрс Хԝәде бьһʼәбиньн, чаԝа кӧ ль Ԝи хԝәш те,

²⁹чьмки Хԝәдейе мә агьре пʼәрʼьтандьне йә[115].