Read Пәймана Ну (Инщил) Ибрани 13 Bible Online

Ибрани 13 - Пәймана Ну (Инщил) bible

Ибрани 13

¹Бьра һун тʼьме чаԝа хушк-бьра һәвдӧ һʼьз бькьн.

²Меванһʼьзийе бир нәкьн, чьмки һьнәка бь ԝе йәке мьлйакʼәт ԛәбул кьрьн, ле пе нәһʼәсийан[116].

³Гьртийа бир биньн, һʼәсаб кьн кӧ чаԝа һун жи тʼәви ԝан гьрти нә, ӧса жи щәфакʼеша бир биньн, чаԝа кӧ һун жи мина ԝан хун у гошт ьн.

⁴Һʼал-зәԝащ һʼәмуйарʼа нав-намуси бә у щи-ньвин һʼәлал бә, чьмки Хԝәде ԝе диԝана чʼәʼвдәр у зьнекʼара бькә.

⁵Пʼәрәһʼьзи бьра нава жийина ԝәда щи нәгьрә у дәстед ԝәда чьԛас һәйә, рʼази бьн, чьмки Хԝәде гот: «Әзе тʼӧ щар жь тә нәчьм у тʼӧ щар тә бәрʼнадьм»[117].

⁶Ләма жи рʼуйе мә дьгьрә кӧ әм бежьн: «Хӧдан пьштоване мьн ә у әз натьрсьм. Инсане чь ль мьн бькә?»[118]

⁷Рʼебәред хԝә бир биньн, йед кӧ ԝәрʼа хәбәра Хԝәде готьнә. Дина хԝә бьдьнә ахьрийа әʼмьре ԝан у чʼәʼв бьдьнә баԝәрийа ԝан.

⁸Иса Мәсиһ дӧһӧ, иро у һʼәта-һʼәтайе йәк ә.

⁹Бәр байе щурʼә-щурʼә һинкьрьнед хәриб нәкʼәвьн. Ԛәнщ ә кӧ дьл бь кʼәрәма Хԝәде бьшьдә, нә кӧ бь ԛәйдә-ԛанунед хԝарьн-нәхԝарьне. Әԝед кӧ пәй тьштед аһа кʼәтьн, тʼӧ кәси кʼар нәстанд.

¹⁰Горигәһәкә мә һәйә, кӧ изьна тʼӧ кәси жь ԝан тʼӧнә жь ԝе бьхԝьн, йед кӧ пʼарьстгәһеда[119] хьзмәткʼарийе дькьн.

¹¹Чаԝа әԝ һʼәйԝанед кӧ хуна ԝан бь дәсте сәрәккʼаһин бона бахшандьна гӧна дьһатә пирозгәһе у щәндәкед ԝан жь зоме дәр дьһатьнә шәԝьтандьне[120],

¹²ӧса жи Иса, кӧ щьмәʼт бь хуна Хԝә паԛьж бькьра, жь дәргәһе бажер дәр щәфа кʼьшанд.

¹³Аԝа ԝәрьн, әм жь зоме дәрен һәрʼьнә щәм Ԝи у ԛара Ԝи һьлдьнә сәр хԝә,

¹⁴чьмки мәрʼа ль вьр бажарәки һʼими тʼӧнә, ле әм һʼьзрәта ԝи бажари нә, йе кӧ ԝе бе.

¹⁵Дә ԝәрьн әм бь сайа Ԝи тʼьме ԛӧрбана пәсьндайине[121] бьдьнә Хԝәде, аԝа готи бәре зар-зьмане хԝә, йед кӧ наве Ԝи иԛрар дькьн.

¹⁶Ӧса жи ԛәнщи у алиһәвкьрьне бир нәкьн, чьмки ԛӧрбанед ӧса ль Хԝәде хԝәш тен.

¹⁷Гӧһдарийа рʼебәред хԝә бькьн у гӧрʼа ԝанда бьн. Әԝана бона рʼӧһʼе ԝә хәԝе жь чʼәʼве хԝә дькьн, чьмки ԝе бона ԝә щабдар бьн. Бьра әԝ ԝи шьхӧле хԝә әшԛ у ша бькьн, нә кӧ бь офә-офе, чьмки әԝ йәк кʼаре надә ԝә.

¹⁸Бона мә дӧа бькьн. Әм әʼсәйи заньн кӧ исафа мә рʼьһʼәт ә у дьхԝазьн кӧ һәр тьшти рʼаст бькьн.

¹⁹Ле илаһи әз һиви дькьм кӧ дӧа бькьн, ԝәки әз зутьрәке вәгәрʼьмә щәм ԝә.

²⁰Аԝа Хԝәдейе әʼдьлайийе, кӧ Хӧдане мә Иса жь мьрьне рʼакьр, Йе кӧ бь хуна пәймана һʼәта-һʼәтайе Сәрәкшьване пез ә,

²¹бьра Әԝ ԝә һәр тьштед ԛәнщва һазьр кә, кӧ һун әʼмьре Ԝи бькьн у Әԝ нава мәда бь дәсте Иса Мәсиһ тьштед кӧ ль Ԝи хԝәш тен бькә. Шькьр жь Ԝирʼа бә, һʼәта-һʼәтайе! Амин.

²²Әз һиви жь ԝә дькьм хушк-бьрано, һун бь сәбьре гӧһ бьдьнә ван готьнед мьнә дьлдайини, чьмки мьн ԝәрʼа кьн ньвиси.

²³Заньбьн кӧ Тимотʼейойе бьре мә жь кәле дәркʼәтийә. Һәгәр әԝ зу бе, әзе тʼәви ԝи бем ԝә бьбиньм.

²⁴Сьлаве бьдьнә һʼәму рʼебәред хԝә у щьмәʼта Хԝәде. Әԝед кӧ жь Италйайе нә, ԝә сьлав дькьн.

²⁵Кʼәрәма Хԝәде тʼәви ԝә һʼәмуйа бә.