Read Пәймана Ну (Инщил) Ибрани 7 Bible Online

Ибрани 7 - Пәймана Ну (Инщил) bible

Ибрани 7

¹Мәлкʼи-Садьԛ[40] пʼадшайе Шәлиме бу, кʼаһине Хԝәдейе Һәри Жорьн. Гава Бьраһим жь пʼадша ԛьрʼкьрьне вәдьгәрʼийа, Мәлкʼи-Садьԛ пешийа ԝида чу у дӧа ль ԝи кьр.

²Бьраһим жи жь һʼәму тʼалане хԝә дәһәк да ԝи. (Пешийе наве Мәлкʼи-Садьԛ шьровәдьбә: «Пʼадше Һәԛийе» у алики дьнва жи әԝ «Пʼадше Шәлиме[41]» бу, аԝа готи наве ԝи те фәʼмкьрьне «Пʼадше Әʼдьлайийе».)

³Әԝ бе бав, бе де у бе рʼькʼьнйат бу, нә рʼожа буйина ԝи әʼйан бу, нә жи хьлазийа әʼмьре ԝи. Әԝ мина Кӧрʼе Хԝәде бу у тʼьме кʼаһин дьминә.

⁴Аԝа дина хԝә бьдьне, кӧ әԝ йәки чаԝайи мәзьн бу, кӧ Бьраһиме бавәʼшир жи жь тʼален дәһәк дайе.

⁵У зӧрʼәта Леԝийә кӧ дьбьнә кʼаһин, бона ԝан тʼәми Ԛанунеда һәйә кӧ жь щьмәʼте дәһәке бьстиньн, аԝа готи жь мьләте хԝә, һәгәр әԝ бәдәна Бьраһим ьн жи[42].

⁶Ле Мәлкʼи-Садьԛ нә жь рʼькʼьнйата Леԝи бу, әԝи жь Бьраһим жи дәһәк станд у дӧа ль ԝи кьр, йе кӧ жь Хԝәде соз стандьбу.

⁷Әва йәка фәʼмдари йә, кӧ йе бьчʼук жь йе мәзьн дӧа-дьрозга дьстинә.

⁸Ви алийе кʼаһинтийеда, мәрьвед кӧ дьмьрьн дәһәке дьстиньн, ле алийе Мәлкʼи-Садьԛ, йе кӧ дәһәке дьстинә бона ԝи ньвисар дьбежә, кӧ әԝ сах ә.

⁹У һʼәта әм дькарьн ве йәке жи бежьн, Леԝийе кӧ зӧрʼәта ԝи дәһәке һьлдьдә, ԝи хԝәха жи бь дәсте Бьраһим дәһәк да Мәлкʼи-Садьԛ.

¹⁰Чьмки әԝ һе бәдәна баве хԝәда бу, гава Мәлкʼи-Садьԛ пешийа ԝида чу.

¹¹Аԝа һәгәр кʼамьлбун бь дәсте кʼаһинтийа леԝийа бьбуйа, (чаԝа щьмәʼта Исраеле сәр ԝи һʼими Ԛанун стандьбу), иди чь лазьм бу кӧ кʼаһинәки дьн мина Мәлкʼи-Садьԛ рʼабуйа у нә кӧ мина Һарун?

¹²Чьмки гава кʼаһинти те гӧһастьне, гәрәке ԛанун жи бе гӧһастьне.

¹³У бона кʼижани кӧ әв йәк те готьне, әԝ жь ԛәбиләкә дьн бу, жь кʼижане тʼӧ кәси горигәһерʼа хьзмәткʼари нәкьрийә.

¹⁴У чаԝа әʼйан ә Хӧдане мә жь ԛәбила Щьһуда бу у Муса дәрһәԛа кʼаһинтийа ԝе ԛәбиледа тʼӧ тьшт нәготийә.

¹⁵У әва һәла һе әʼйан ә, гава кʼаһинәки дьн мина Мәлкʼи-Садьԛ рʼадьбә,

¹⁶йе кӧ нә алийе ԛәйдә-ԛануна пьрса зӧрʼәтийеда бу кʼаһин, ле алийе ԛәԝата жийина кӧ хьлазийа ԝе тʼӧнә.

¹⁷Чьмки ньвисар шәʼде ве готьне йә кӧ: «Тӧ һʼәта-һʼәтайе Кʼаһин и, мина Мәлкʼи-Садьԛ»[43].

¹⁸Аԝа тʼәмийа пешьн жь дәст сьсти у бекерийа ԝе һатә бәталкьрьне,

¹⁹чьмки Ԛануна Муса тʼӧ тьшт кʼамьл нәкьр, ле дәԝса ԝе гӧманәкә һе ԛәнщ кʼәтә наве, бь кʼижане әм незики Хԝәде дьбьн.

²⁰Сәрда жи Иса бе сонд нәбу кʼаһин! Әԝед дьн бе сонд бунә кʼаһин,

²¹ле әва бь сонд, бь дәсте Хԝәде бу кʼаһин гава Ԝирʼа гот: «Хӧдан сонд хԝар у иди жь готьна Хԝә вәнагәрʼә: Тӧ һʼәта-һʼәтайе Кʼаһин и»[44].

²²Дәст ве сонде жи Иса ԝәкʼилтийе пәйманәкә һе ԛәнщ дькә[45].

²³Ӧса жи гәләк кʼаһин һәбунә, чьмки мьрьне нәһьштийә кӧ әԝана тʼьме бьмана.

²⁴Ле кʼаһинтийа Әви хьлаз набә, чьмки Әԝ һʼәта-һʼәтайе дьминә.

²⁵Бона ве йәке Әԝ һәр гав[46] дькарә ԝан хьлаз кә, йед кӧ бь дәсте Ԝи незики Хԝәде дьбьн, чьмки Әԝ тʼьме сах ә, кӧ бона ԝан лава-навчетийе бькә.

²⁶Аԝа һәма мәрʼа рʼаст сәрәккʼаһинәки аһа лазьм бу, пироз, бесущ, беԛӧсур, жь гӧнәкʼара щӧдәбуйи у жь әʼзмана жортьр чуйи.

²⁷Исарʼа нә лазьм ә кӧ Әԝ һәр рʼож мина сәрәккʼаһинед майин пешийе бона гӧнед хԝә у паше бона гӧнед щьмәʼте ԛӧрбана бьдә. Әԝи әв йәк щарәке бона һәр тʼьм кьр, чахе Хԝә кьрә ԛӧрбан[47].

²⁸Ԛануна Муса мәрьве бетʼаԛәт дькә сәрәккʼаһин, ле сонда Хԝәдейә кӧ пәй Ԛанунерʼа һат Кӧрʼ дькә сәрәккʼаһин, Йе кӧ һʼәта-һʼәтайе һатә кʼамьлкьрьне[48].