Read Пәймана Ну (Инщил) Ибрани 9 Bible Online

Ибрани 9 - Пәймана Ну (Инщил) bible

Ибрани 9

¹Рʼаст ә ԛәйдә-ԛанунед һʼәбандьна пәймана пешьн жи һәбун у пирозгәһа ве дьнйайе жи.

²Кон бь дӧ гоза вәгьрти бу: Йа дәррʼа «пирозгәһ» дьготьн, теда һәбун шәмдан, сьфрә у нане Хԝәдерʼа дайи[51].

³Йа һьндӧрʼда пьшта пʼәрʼде, жерʼа «Щийе Һәри Пироз» дьготьн[52].

⁴Теда бун горигәһа зерʼин бона шәԝьтандьна бьхуре, Сьндоԛа Пәймане, йа кӧ дәр у һьндӧрʼва зерʼкьри бу. Ԝе сьндоԛеда һәбун щерʼе зерʼин бь манава тʼьжи, шьвдара Һарунә кӧ гӧл да у сәлед кәвьрийә пәймане[53].

⁵Сәр сьндоԛе, херубед рʼумәта Хӧдан һәбун у сәр щийе кӧ гӧнә дьһатьнә бахшандьне, дькьрьнә си. Ньһа нә ԝәхт ә кӧ әм бона ԝан бь һур-гьли хәбәр дьн[54].

⁶Әв тьшт аһа щикьри бун. Кʼаһин һәр гав дькʼәвьнә гоза дәр, хьзмәткʼарийа хԝә дькьн[55].

⁷Ле гоза һьндӧрʼ сале щарәке тʼәне сәрәккʼаһин дькʼәве, ле нә бе хун, йа кӧ жь бәр гӧнед хԝә у щьмәʼтева дьдә, кʼижан кӧ жь бефәʼмийа хԝә дькьрьн[56].

⁸Бь ве йәке Рʼӧһʼе Пироз дьдә кʼьфше, кӧ рʼийа Щийе Һәри Пироз нәвәкьрийә, һʼәта кӧ гоза дәр һәйә.

⁹Әв йәк сурәтәк ә бона зәмане ньһа. Әва дьдә кʼьфше, кӧ гава һʼәди у ԛӧрбан тенә дайине, әвана нькарьн исафа йед кӧ дьһʼәбиньн паԛьж кьн,

¹⁰ле әв йәк тʼәне хԝарьн-вәхԝарьне у щурʼә-щурʼә шуштьн-вәшуштьнед ԛәйдә-ԛанунева гьредайи нә. Әв ԛәйдә-ԛанунед дәрвайи нә, кʼижан кӧ һʼәта ԝи ԝәхте кӧ ԛануна ну те данине дьминьн.

¹¹Ле гава Мәсиһ һат, чаԝа Сәрәккʼаһине тьштед ԛәнщә һати, коне һе мәзьн у кʼамьлрʼа дәрбаз бу, йе кӧ нә бь дәста һатийә чекьрьне, аԝа готи нә жь ве дьнйайе.

¹²Әԝ нә кӧ пе хуна щанәга у нерийа, ле бь хуна Хԝә щарәке бона һәр тʼьм кʼәтә Щийе Һәри Пироз у азабуна һʼәта-һʼәтайе дәст ани.

¹³Һәгәр хуна щанәга, нерийа у кʼозийа ногьна кӧ дьрʼәшандьн, йед кӧ ль гора әʼдәт һʼәрʼьми бун, дәрвава әԝ паԛьж дькьрьн[57],

¹⁴ле чьԛас зедә хуна Мәсиһ, кӧ бь дәсте Рʼӧһʼе һʼәта-һʼәтайе Хԝә чаԝа ԛӧрбана беԛӧсур да Хԝәде, ԝе исафа мә жь кьред кӧ әм дьбьрьнә бәрбь мьрьне паԛьж бькә, ԝәки әм хьзмәткʼарийе Хԝәдейе Сахрʼа бькьн?

¹⁵Бона ве йәке Мәсиһ навчетийа пәймана ну дькә, ԝәки йед газикьри ԝи ԝаре һʼәта-һʼәтайе бьстиньн, кʼижан кӧ Хԝәде соз дайә, чьмки мьрьна Ԝи бона азайийа жь нәһәԛийед ԝан бу, йед кӧ дәма пәймана пешьнда кьрьбун.

¹⁶Аԝа кʼидәре ԝәсийат пәйманкьри йә, гәрәке ль ԝьр әʼсәйи ԝәсийатдар мьри бә.

¹⁷Чьмки ԝәсийат пәй мьрьна ԝәсийатдаррʼа ԛәԝат дькә. Һʼӧкӧме ԝе тʼӧнә һʼәта кӧ ԝәсийатдар сах ә.

¹⁸Ләма пәймана пешьн жи бе хун нәһатә тʼәстиԛкьрьне.

¹⁹Гава Муса һʼәму тʼәмийед Ԛануне готьнә щьмәʼте, һьнге хуна щанәга у нерийа һьлда тʼәви аве кьр, рʼисе соре гәвәз чʼьԛьле зохева кьр, пе ԝе рʼәшандә сәр кʼьтеба Ԛануне у щьмәʼте[58],

²⁰гот: «Әв ә хуна ԝе пәймане, йа кӧ Хԝәде тʼәми да ԝә»[59].

²¹Ӧса жи әԝ хун рʼәшандә сәр кон у һʼәму дәрданед бона һʼәбандьне[60].

²²Бәле анәгори Ԛануне пʼьрʼанийа һәр тьшти пе хуне паԛьж дьбу у бейи хунрʼетьн бахшандьн нәдьбу[61].

²³Аԝа гәрәке сурәтед тьштед әʼзмана бь ван кьрьна паԛьж буна, ле һәма хут йед әʼзмана жи гәрәке бь ԛӧрбанед жь ван ԛәнщтьр паԛьж буна.

²⁴Чьмки Мәсиһ нә кӧ кʼәтә пирозгәһа пе дәста чекьри мина сурәте йа рʼаст, ле һәма хут кʼәтә әʼзмен, ԝәки ньһа бона мә ль бәр Хԝәде бьсәкьнә.

²⁵Нә жи бона кӧ гәләк щара Хԝә бькьра ԛӧрбан дькʼәтә пирозгәһе, чаԝа кӧ сәрәккʼаһин һәр сал нә бь хуна хԝә дькʼәве.

²⁶Һәгәр аһа буйа, Әԝи гәрәке гәләк щара пәй әʼфьрандьна дьнйайерʼа щәфа бькʼьшанда. Ле ньһа ахьрийа дәԝрада Әԝи Хԝә да кʼьфше у щарәке бона һәр тʼьм пе хԝәԛӧрбанкьрьне гӧнә һьлдан.

²⁷У чаԝа бона мәрьва ԛьраркьри йә, щарәке бьмьрьн у паше бәр диԝане бьсәкьньн[62],

²⁸ӧса жи Мәсиһ щарәке бона гӧнәһьлдана гәләка ԛӧрбан һатә дайине[63]. У Әԝе щара дӧда нә кӧ бона гӧнәһьлдане кʼьфш бә, ле бона хьлазбуна ԝан, йед кӧ һивийа Ԝи нә.