Read Пәймана Ну (Инщил) Аԛуб 3 Bible Online

Аԛуб 3 - Пәймана Ну (Инщил) bible

Аԛуб 3

¹Бьра гәләк жь ԝә, бьрайед мьн нәбьнә дәрсдар, чьмки һун заньн диԝане сәр мә дәрсдара һе гьран бә.

²Бәле әм һʼәму жи гәләки шашийа дькьн. Һәгәр йәк хәбәрданеда тʼӧ шашийе накә, әԝ йәки кʼамьл ә, кӧ дькарә тʼәмамийа ԛальбе хԝә зәфт кә.

³Әм гәме давежьнә дәве һәспе, ԝәки әԝ бе зәфте, кӧ әм сәрԝертийе тʼәмамийа һәспе пева бькьн.

⁴Әм биньн сәр гәмийе жи. Әԝ чьԛаси мәзьн ьн у жь бәр байе ԛайим тенә ажотьне, ле бь чәрхәкә гәләки бьчʼук тенә сәрԝертикьрьне, дьле гәмиван кʼийалида кӧ бьхԝазә.

⁵Ӧса жи зьман әндәмәки бьчʼук ә, ле тьштед жь хԝә мәстьр дьбежә. Дина хԝә бьдьнә пьрискә агьр, чь дарьстанәкә мәзьн дькарә бьшәԝьтинә!

⁶Зьман жи агьрәк ә, дьнйакә зӧлмкʼар ә нава әндәмед мәда. Әԝ тʼәмамийа ԛальбе мә дьһʼәрʼьминә, агьр дәԝра жийина мерьв дьхә у әԝ хԝәха жь алава агьре доже пегьрти йә.

⁷Һәр щурʼә рʼәʼԝьр, тәйрәдә, шульки у һʼәйԝанед бәʼре тенә зәфте у зәфти мерьв дьбьн,

⁸ле тʼӧ ԛул-бәндә зьмен нькарә. Әԝ зӧлмкʼарәки беар ә, жәʼра мәʼрава дагьрти йә.

⁹Әм бь ԝи шькьрийе дьдьнә Хӧдан у Бав, бь ԝи жи ньфьрʼа мерьв дькьн, йед кӧ дьлԛе Хԝәдеда һатьнә хӧльԛандьне.

¹⁰Һәма жь ԝи дәви жи дӧа у ньфьрʼ дәртен. Хушк-бьрайед мьн, әв йәк нә щайиз ә кӧ аһа бә.

¹¹Гәло жь чʼәʼвканике ава хԝәш у тәʼл дьдә дәр?

¹²Гәло дьбә хушк-бьрайед мьн, ԝәки дара һежире бәре зәйтʼуне бьдә, йан жи кʼола тьрийе һежире? Нә жи жь шорʼайийе ава хԝәш дәрте?

¹³Нава ԝәда кʼи сәрԝахт у аԛьл ә? Бьра әԝ бь пʼәргалийа хԝәйә ԛәнщ, кьред хԝә бь мьлуктийа сәрԝахтийе бьдә кʼьфше.

¹⁴Ле һәгәр дьле ԝәда һʼәвсудийа хьраб у чʼәʼвнәбари һәнә, кʼӧбар нәбьн у рʼастийе дәрәԝ дәрнәхьн.

¹⁵Әва «сәрԝахтийа» нә дайина жорьн ә, ле жь дьне йә, йа мәрьвайи йә у жь щьна йә.

¹⁶Чьмки ль кʼидәре һʼәвсуди у чʼәʼвнәбари һәнә, ль ԝьр бетʼәрбәти у һәр кьрьнед хьраб жи һәнә.

¹⁷Ле сәрԝахтийа жорьн, бәре пешьн паԛьж ә, паше әʼдьл ә, мьлук у бәрбьһер ә, бь рʼәʼме у бәред ԛәнщийева тʼьжи йә, бе тʼагер у бе һʼьләкʼари йә.

¹⁸У бәре һәԛийе жь алийе йе кӧ бь әʼдьлайийе дьчинә те чьнине[13].