Read Пәймана Ну (Инщил) Пәтрус I 2 Bible Online

Пәтрус I 2 - Пәймана Ну (Инщил) bible

Пәтрус I 2

¹Дә һәр щурʼә хьрабийе, һʼьләкʼарийе, дӧрʼутийе, һʼәвсудийе у бӧхданбежийе жь пʼеша хԝә даԝшиньн.

²Мина дәргушед ль бәр бьстен, һʼәйра шире сьпийи рʼӧһʼанида бьн, кӧ һун бь ԝи хьлазбунерʼа мәзьн бьн.

³Чьмки ньвисар ә: Ԝә «тәʼма ширьнайийа Хӧдан һьлдайә»[3].

⁴Хԝә ль Ԝи бьгьрьн, Ԝи кәвьре сахи кӧ жь мәрьва тʼәхсиркьри йә, ле жь Хԝәдеда бьжарти у хԝәйиԛәдьр ә.

⁵Һун жи мина кәвьред сах, пʼарьстгәһәкә рʼӧһʼани ԝәрьнә чекьрьне, чаԝа кʼаһинед пироз ԛӧрбанед рʼӧһʼанийә ль Хԝәде хԝәш бь Иса Мәсиһ бьдьн.

⁶Чьмки кʼьтебеда ньвисар ә: «Ва Әз Сийонеда кәвьрәки жьбарәйи у хԝәйиԛәдьр чаԝа кәвьре әʼнишке датиньм у кʼи баԝәрийа хԝә Ԝи бинә, тʼӧ щар ԝе шәрми нәминә»[4].

⁷Аԝа әԝ кәвьр бона ԝә баԝәрмәнда хԝәйирʼумәт ә, ле бона нәбаԝәра: «Әԝ кәвьре кӧ һоста тʼәхсир кьр, Әԝ бу сәре әʼнишке»[5],

⁸«Кәвьре кӧ мәрьв сәрда дьлькʼӧмьн у зьнаре кӧ же һол дьбьн»[6]. Әԝ дьлькʼӧмьн, чьмки гӧһдарийа хәбәре накьн у чаԝа ԝе йәкерʼа жи кʼьфшкьри нә.

⁹Ле һун ԛәбиләкә жьбарә нә, кʼаһинед пʼадшатийе, мьләте бӧһӧрти, щьмәʼта Хԝәде, ԝәки кʼәрәмәтед[7] Ԝи бькьнә дәнги, Йе кӧ һун жь тәʼристанийе гази рʼонайа хԝәйә һʼӧжмәкʼар кьрьнә[8].

¹⁰Ԝәхтәке һун нә тʼӧ щьмәʼт бун, ле ньһа бунә щьмәʼта Хԝәде, һунә бе рʼәʼма Хԝәде бун, ле ньһа ԝә рʼәʼм дитийә[9].

¹¹Дәлално! Әз һиви жь ԝә дькьм, чаԝа мәрьвед фьрари у хәрибә ве дьне, һʼәвза хԝә жь дьлһавьжийед бәдәне бькьн, кӧ мьԛабьли рʼӧһʼе ԝә шәрʼ дькьн.

¹²Нава пʼутпʼарьстада һун хԝә ӧса пʼәргал хԝәй кьн, ԝәки чь тьштида жи ԝә рʼәзил бькьн чаԝа хьраб, кьред ԝәйә ԛәнщ бьбиньн у шькьрийе бьдьнә Хԝәде, ԝе Рʼожа кӧ сәрики бьдә дьне.

¹³Гӧрʼа һәр сәрԝертийед мәрьвайеда бьн, бона хатьре Хӧдан, гӧрʼа пʼадшеда бьн, чаԝа сәрԝере һәри бьльнд,

¹⁴ӧса жи гӧрʼа ԝәлийада бьн, кӧ жь алийе пʼадшеда шанди нә, ԝәки щәзайе бьдьнә нәһәԛа у пәсьн жи бьдьнә ԛәнща.

¹⁵Чьмки әв ә ԛьрара Хԝәде, кӧ һун бь ԛәнщикьрьне дәнге мәрьвед беһʼьшә нәзан бьдьнә бьрʼине.

¹⁶Мина мәрьвед аза бьжин. Бьра азайийа ԝә нәбә хелийа хьрабикьрьне, ле бьжин чаԝа хӧламед Хԝәде.

¹⁷Ԛәдьре һʼәмуйа бьгьрьн хушк-бьра һʼьз бькьн, жь Хԝәде бьтьрсьн, ԛәдьре пʼадше бьгьрьн.

¹⁸Хӧламно, бь хофкʼешикә мәзьн гӧрʼа ахайед хԝәда бьн, нә кӧ тʼәне гӧрʼа йед ԛәнщ у бәрбьһерада бьн, ле гӧрʼа зӧлмкʼарада жи.

¹⁹Чьмки әва бәхтәԝарик ә, һәгәр йәк бона хатьре Хԝәде щики һәԛи-нәһәԛ зәлулийе дькʼьшинә у сәбьр дькә.

²⁰Ле чь фәйдә һәгәр һун бона гӧнәкьрьне бенә ледане у тәйах кьн? Ле һәгәр һун бона ԛәнщикьрьне щәфе бьбиньн у тәйах кьн, һун ль бәр Хԝәде бәхтәԝар ьн.

²¹Бәле һун ве йәкерʼа һатьнә газикьрьне, чьмки Мәсиһ хԝәха жи бона ԝә щәфа кʼьшанд у нәхшәк ԝәрʼа һьшт, ԝәки һун пʼегәһа Ԝида һәрʼьн.

²²Әԝи гӧнә нәкьр у заре Ԝида һʼьләкʼари тʼӧнәбу[10].

²³Гава дьһатә рʼәзилкьрьне, жь бәрва кәс рʼәзил нәдькьр, гава щәфа дькʼьшанд, гәф ль кәсәки нәдьхԝар, ле Хԝә спартьбу һʼакьме сәр рʼастийе[11].

²⁴Әԝи гӧнед мә бәдәна Хԝәда рʼакьрьнә сәр дар, ԝәки әм һьндава гӧнада мьри[12] бьн у бона һәԛийе бьжин: Бь дәхмед Ԝи һун ԛәнщ бун[13].

²⁵Чьмки һун мина пәзед хальфи бун, ле ньһа һун ль Шьван у Сәʼвийе рʼӧһʼе хԝә вәгәрʼийанә.