Read Пәймана Ну (Инщил) Пәтрус I 4 Bible Online

Пәтрус I 4 - Пәймана Ну (Инщил) bible

Пәтрус I 4

¹Аԝа Мәсиһ кӧ бона мә бәдәни щәфа кʼьшанд, һун жи бь ԝе нет-фькьре сильһʼкьри бьн. Чьмки йе бь бәдәни щәфа кʼьшанд, ԝи дәст жь гӧна кʼьшандийә,

²ԝәки иди һʼәта мьрьна хԝә, нә кӧ ль гора дьлһавьжийед хԝәйә мәрьвайи бьжин, ле ль гора ԛьрара Хԝәде.

³Бәси ԝә йә, кӧ ԝә ԝәхте жийина хԝәйә бьһӧрида ль гора хԝәстьна пʼутпʼарьста дәрбаз кьрийә, һун пәй һʼәрамийе, тәмхԝәстьнед хьраб, пәй-вәхԝарьне, кучʼьксантийе, сәрхԝәшийе у пʼутпʼарьстийа кʼьрет кʼәтьбун.

⁴Әԝ пʼутпʼарьст әʼщебмайи жи дьминьн, ԝәки һун тʼәви авитийа ԝанә бенамуси набьн у наве хьраб ль пәй ԝә дьхьн.

⁵Ле әԝе ль бәр Ԝи щабдар бьн, Йе кӧ һазьр ә диԝана мьри у зендийа бькә.

⁶Бона ве йәке жи ԝан мьрийарʼа Мьзгини һатә дайине, йед кӧ бь бәдәни мина мәрьва диԝана ԝан һатә кьрьне, ԝәки бь рʼӧһʼани бьжин мина Хԝәде.

⁷Ахьрийа һәр тьшти незик буйә. Аԝа сәрԝахт у сәр хԝә бьн, кӧ бькарьбьн дӧа бькьн.

⁸Бәри һәр тьшти, һʼьзкьрьна ԝә һьндава һәвда бь дьл у щан бә, чьмки һʼьзкьрьн гәләк гӧна дьньхемә.

⁹Һьндава һәвда меванһʼьз бьн, бина хԝә тәнг нәкьн[23].

¹⁰Жь ԝә кʼе чь пʼешкʼеш стандийә, бь ԝе жи һәврʼа хьзмәткʼарийе бькьн, чаԝа ԝәкʼилед ԛәнщә кʼәрәма Хԝәде.

¹¹Һәгәр йәк хәбәр дьдә, бьра готьнед Хԝәде хәбәр дә, һәгәр йәк хьзмәткʼарийе дькә, бьра бь ԝе ԛәԝате бькә, кӧ Хԝәде дайе, ԝәки һәр тьштида наве Хԝәде бе бьльндкьрьне бь Иса Мәсиһ, рʼумәт у ԛӧдрәт жь Ԝирʼа һʼәта-һʼәтайе. Амин.

¹²Дәлално! Жь ԝе алава тәнгасийе әʼщебмайи нәминьн, кӧ бона щерʼьбандьне те сәре ԝә у нәфькьрьн кӧ әв чь бәла бу ль ԝә ԛәԝьми.

¹³Ле ша бьн, кӧ һун тʼәви щәфед Мәсиһ дьбьн, ԝәки ԝи ԝәхте хӧйабуна рʼумәта Ԝи һуне жь шабуне гәш бьн.

¹⁴Һәгәр һун бона наве Мәсиһ бенә рʼәзилкьрьне, һунә хԝәзьли нә, кӧ ӧса йә Рʼӧһʼе хԝәйирʼумәт, Рʼӧһʼе Хԝәде сәр ԝә данийә[24].

¹⁵Бьра жь ԝә тʼӧ кәс щәфе нәкʼьшинә, чаԝа меркӧж, йан дьз, йан зӧлмкʼар, йан жи тʼәви шьхӧле хәлԛе буйи.

¹⁶Ле һәгәр щәфе бькʼьшинә чаԝа мәсиһи, бьра шәрм нәкә, ле шькьрийе бьдә Хԝәде бона ви нави, кӧ сәр ԝи йә.

¹⁷Иди ԝәхт перʼа гьһиштийә, ԝәки диԝан жь мала Хԝәдеда дәстпебә у һәгәр пешда жь мәда дәстпедьбә, ле ахьрийа ԝане чаԝа бә, йед кӧ гӧрʼа ԝе Мьзгинийа жь Хԝәде накьн?

¹⁸Ньвисар ә: «Һәгәр йе рʼаст ԝе бь зорәке хьлаз бә, иди һʼале нәпʼак у гӧнәкʼара ԝе чаԝа бә?»[25]

¹⁹Аԝа йед кӧ ль гора ԛьрара Хԝәде щәфе дькʼьшиньн, бьра хԝә ль ԛәнщийе бьгьрьн, рʼӧһʼе хԝә бьсперьнә Әʼфьрандаре хԝәйи амьн.