Read Пәймана Ну (Инщил) Пәтрус I 5 Bible Online

Пәтрус I 5 - Пәймана Ну (Инщил) bible

Пәтрус I 5

¹Әз һиви жь бәрпьрсийаред нава ԝәда дькьм, әз хԝәха жи чаԝа бәрпьрсийар у шәʼде щәфед Мәсиһ у һәвал-пʼаре ԝе рʼумәте мә, йа кӧ ԝе хӧйа бә.

²Шьвантийе ԝи кәрийе пәзе Хԝәдейи ль бәр хԝә бькьн[26], нә кӧ бе дьл, ле бь дьл у щан ӧса хԝәй кьн, чаԝа Хԝәде дьхԝазә, нә кӧ бона кʼара хԝә, ле бь рʼәзәдьли[27],

³нә кӧ ль сәр йед кӧ пʼара ԝә кʼәтьнә һʼӧкӧм кьн, ле нәхше ԛәнщ нишани кери кьн.

⁴У гава Сәрәкшьван әʼйан бә, һуне ԝе тʼаще рʼумәте бьстиньн, кӧ чʼьрусийа ԝе ӧнда набә.

⁵Ӧса жи щаһьлно, гӧрʼа мәзьнада бьн. У һун һʼәму жи, ль бәр һәв шкәсти бьн, хӧламтийе һәвдӧрʼа бькьн, чьмки ньвисар ә: «Хԝәде мьԛабьли кʼӧбар-бабаха йә, ле кʼәрәме дьдә шкәстийа»[28].

⁶Бьн дәсте Хԝәдейи зор та бьн, кӧ Әԝ ԝәхтда ԝә бьльнд кә[29]

⁷у һʼәму хәмед хԝә бавежьнә сәр Ԝи, чьмки Әԝ бона ԝә хәм дькә.

⁸Сәрԝахт бьн, һʼьшйар бьминьн! Мирещьне нәйаре ԝә мина шер мьрʼә-мьрʼа ԝи йә, дьгәрʼә кʼа кʼе һʼуфи хԝә кә.

⁹Баԝәрийеда һʼимгьрти мьԛабьли ԝи бьсәкьньн, чьмки һун заньн кӧ хушк-бьред ԝә жи тʼәмамийа дьнйайеда хут ԝан щәфа дькʼьшиньн.

¹⁰Ле Хԝәдейе тʼәмамийа кʼәрәме, Йе кӧ пе Мәсиһ һун гази рʼумәта хԝәйә һʼәта-һʼәтайе кьрьнә, пәй һьнәк щәфа дитьнерʼа, ԝе Хԝәха ԝә кʼамьл кә, бьшьдинә, ԛәԝат кә, хԝәйибьнгәһ кә.

¹¹Ԛӧдрәт жь ԝирʼа һʼәта-һʼәтайе. Амин.

¹²Мьн бь дәсте Силас[30], чаԝа бьраки амьн әз ԝи һʼәсаб дькьм, кьн ԝәрʼа ньвиси, дьл дьдьмә ԝә у шәʼдәтийе дьдьм, кӧ әв ә кʼәрәма Хԝәдейә рʼаст. Веда һун ԛәԝин бьсәкьньн.

¹³Щьвина Бабилонеда[31] ль ԝә сьлав дькә, йа кӧ тʼәви ԝә һатийә бьжартьне, ӧса жи лаԝе мьн Марԛос.

¹⁴Бь рʼамусана һʼьзкьрьнейә дьле сах һәвдӧ сьлав кьн. Дә бьра әʼдьлайи ль ԝә һʼәмуйед пʼара Мәсиһ бә. Амин.