Read Пәймана Ну (Инщил) Пәтрус II 2 Bible Online

Пәтрус II 2 - Пәймана Ну (Инщил) bible

Пәтрус II 2

¹Пʼехәмбәред дәрәԝ жи нава щьмәʼта Исраеледа дәркʼәтьнә, чаԝа ль нава ԝәда жи ԝе дәрсдаред дәрәԝ дәрен. Әԝе һинкьрьнед зәԝал вәдьзьнә нава ԝә, ԝи Хԝәйийе кӧ әԝ кʼьрʼин жи инкʼар кьн у зутьрәке бәлайе биньнә сәре хԝә.

²Гәләк ԝе бәр байе бенамусийа ԝан кʼәвьн, рʼуйе ԝанда ԝе рʼийа рʼастийе бе беһӧрмәткьрьне.

³Ԝе жь дәст тьмакʼарийе бь заре хԝәш ԝә бьхапиньн бона кʼара хԝә. Диԝана ԝане дәрәнги нәбә, бәла ԝан бәр шемике йә.

⁴Чьмки һʼәйфа Хԝәде ль ԝан мьлйакʼәтед кӧ гӧнә кьрьн нәһат, ле әԝ ԛәйдкьри авитьнә зьндана тәʼристанийе, Рʼожа Диԝанерʼа данә хԝәйкьрьне.

⁵У һʼәйфа Ԝи дьнйа пешьн жи нәһат, тʼәне һʼәйшт нәфс, Нӧһе кӧ һәԛи даннасин дькьр, мала ԝива хьлаз кьр гава лейи ани сәр дьнйа нәпʼака[4].

⁶Диԝана бажаред Содом у Гоморайе жи кьр, әԝ кьрьн ах-хԝәли, ԝеран кьр, бона нәпʼакед пәй ԝанрʼа дәрсәк һьшт.[5]

⁷Луте рʼаст жи, кӧ жь бепʼәргалийа нәпʼакайә бенамуси ащьз бьбу, хьлаз кьр.

⁸Чьмки әԝи рʼаст, кӧ нава ԝанда дьма, кьред беолитийа ԝан дьдитьн у дьбьһистьн, һәр рʼож рʼӧһʼе ԝийи рʼаст хԝәда дьшәԝьти.

⁹Хӧдан кӧ бь ви аԝайи кьр, әԝ занә чаԝа хԝәденаса жи жь щерʼьбандьна хьлаз кә у нәһәԛа Рʼожа Диԝанерʼа хԝәй кә, ԝәки щәзайе хԝә бьстиньн,

¹⁰илаһи ԝан, йед кӧ пәй һʼәрамийа хԝәстьна ԛальб кʼәтьнә, дьжәньнә сәрԝертийе. Әԝә бәрзәԛ у хԝәрʼази нә, хоф жи накьн, йед хԝәйирʼумәтә жорьн беһӧрмәт дькьн,

¹¹ле мьлйакʼәт чьԛаси пе ԛәԝат у зорайийа хԝә жь ван зедәтьр ьн, диса ль бәр Хӧдан бь беһӧрмәткьрьне шькийате ԝан накьн.

¹²Әв мәрьвана мина һʼәйԝанед безарә-безьман ьн, бь ԛафе хԝәйә вала тенә рʼебәрикьрьне, кӧ бона нечʼир у кӧштьне дьне кʼәтьнә, ԝан тьшта беһӧрмәт дькьн кӧ ньзаньн әԝ чь нә, әве жи мина ԝан һʼәйԝана ӧнда бьн һәрʼьн.

¹³Хьрабийа ԝане ль ԝан вәгәрʼә. Кʼефа дьле хԝәрʼа хьрабийа кӧ рʼо-нава-рʼоже дькьн хԝәрʼа шабун һʼәсаб дькьн. Әвана ләкʼә у һʼәрам ьн, тʼәви ԝә дьхԝьн-вәдьхԝьн у һьнге нава рʼийед хԝәйә дәрәԝда кʼеф дькьн.

¹⁴Чʼәʼвед ԝан ль зьнекʼарийе йә, жь гӧнәкьрьне тʼер набьн, баԝәрмәндед нәшьдийайи пәй хԝә дьбьн, дьле ԝан тʼәне һини тьмакʼарийе буйә. Ньфьрʼ сәр ԝан ә!

¹⁵Дәсте хԝә жь рʼийа рʼаст кьрьн, хальфин, рʼийа Бьламе Бәурда чун, йе кӧ маше нәһәԛийе һʼьз кьр[6].

¹⁶Ле ль нәһәԛийа ԝи һатә һьлатьне гава кʼәра безарә-безьман бь зьмане мәрьвайе хәбәр да у пешийа беаԛьлийа пʼехәмбәр гьрт.

¹⁷Әв мәрьвед һа канийед чʼькийайи нә у әʼԝред жь бәр бе ажоти нә. Шәвәрʼәша тәʼристанийе бона ԝан хԝәйкьри йә.

¹⁸Йед һа готьнед пʼучʼә жь хԝә мәстьр дьбежьн, бь тәмед мәрьвайейә хьраб ԝан дьхапиньн, йед кӧ чәндәк пешда жь әԝед рʼийа хальфида дьчьн, рʼәвибун.

¹⁹Әвана йед аһарʼа азайийе соз дьдьн, ле хԝәха хӧламед пʼучʼбуне нә, чьмки мәрьв чь тьштида кӧ дьдә дәр, дьбә хӧламе ԝе йәке.

²⁰Һәгәр әԝед кӧ пе занәбуна һьндава Хӧдан у Хьлазкьре мә Иса Мәсиһ щарәкерʼа дәсте хԝә жь һʼәрамийед дьне кьрьн, паше диса бькʼәвьнә нава ԝан һʼәрамийа, бьдьнә дәр, ахьрийа ԝане жь йа пешьн хьрабтьр бә.

²¹Ԝанрʼа һе ԛәнщ бу, кӧ ԛәт әв рʼийа һәԛийе нас нәкьрана, нә кӧ пәй наскьрьнерʼа жь ԝе тʼәмийа пироз дагәрʼийана, йа кӧ ԝанрʼа һатә дайине.

²²Әв готьн рʼаст те сәре ԝан: «Сә вәдьгәрʼә сәр вәрʼәшандьна хԝә»[7] у «Бәразе шушти диса хԝә һʼәрʼийе вәдьдә».