Read Пәймана Ну (Инщил) Йуһʼәнна I 2 Bible Online

Йуһʼәнна I 2 - Пәймана Ну (Инщил) bible

Йуһʼәнна I 2

¹Зарʼокед мьн, әз ве йәке ԝәрʼа дьньвисьм, ԝәки һун гӧна нәкьн, ле һәгәр йәк гӧнә бькә, ль щәм Баве пьштгьре мә, Иса Мәсиһ, Йе Һәԛ һәйә.

²Әԝ ә мәщала бахшандьна гӧнед мә у нә кӧ тʼәне гӧнед мә, ле гӧнед тʼәмамийа дьнйайе жи.

³Бь ԝе йәке әм заньн кӧ әм Ԝи нас дькьн, һәгәр әм тʼәмийед Ԝи хԝәй кьн.

⁴Йе кӧ дьбежә: «Әз Ԝи нас дькьм», ле тʼәмийед Ԝи наԛәдинә, әԝ дәрәԝин ә у рʼасти нава ԝида тʼӧнәйә.

⁵Ле йе кӧ готьна Ԝи дьԛәдинә, һʼьзкьрьна Хԝәде рʼаст нава ԝида тʼәмам ә. Бь ве йәке әм заньн кӧ әм нава Ԝида нә:

⁶Әԝе кӧ дьбежә: «Әз нава Ԝида мә», гәрәке ӧса бьжи, чаԝа Иса жит.

⁷Дәлално, нә кӧ тʼәмикә ну әз ԝәрʼа дьньвисьм, ле ԝе тʼәмийа кәвьнә кӧ һун бәре пешда заньн. Тʼәмийа кәвьн әԝ хәбәр ә, йа кӧ ԝә пешда бьһистийә[4].

⁸Ле бәле тʼәмикә ну әз ԝәрʼа дьньвисьм, кӧ рʼастийа ԝе йәке чаԝа нава Ԝида хӧйа дьбә, ӧса жи нава ԝәда. Чьмки тәʼри дәрбаз дьбә у рʼонайа рʼаст иди рʼонайе дьдә.

⁹Әԝе кӧ дьбежә: «Әз нава рʼонайеда мә», ле бьре ԝи бәр чʼәʼва рʼәш ә, әԝ һәла һе нава тәʼрийеда йә.

¹⁰Әԝе кӧ бьре хԝә һʼьз дькә, нава рʼонайеда дьминә у набә сәбәб, кӧ һьнәк жь рʼе бькʼәвьн[5].

¹¹Ле әԝе, кӧ бьре ԝи бәр чʼәʼва рʼәш ә, әԝ нава тәʼрийеда йә, нава тәʼрийеда дьгәрʼә у ньзанә кʼӧда дьчә, чьмки тәʼрийе чʼәʼвед ԝи кор кьрьнә.

¹²Әз ԝәрʼа дьньвисьм, зарʼокно, чьмки бь сайа наве Ԝи гӧнед ԝә афу бунә.

¹³Әз ԝәрʼа дьньвисьм, бавно, чьмки һун Ԝи нас дькьн, Йе кӧ бәре пешда һәйә. Әз ԝәрʼа дьньвисьм, щаһьлно, чьмки һун сәр йе Хьраб кʼәтьн.

¹⁴Әз ԝәрʼа дьньвисьм хьшимно, чьмки һун Баве нас дькьн. Әз ԝәрʼа дьньвисьм, бавно, чьмки һун Ԝи нас дькьн, Йе кӧ бәре пешда һәбу. Әз ԝәрʼа дьньвисьм, щаһьлно, чьмки һун ԛәԝат ьн у хәбәра Хԝәде нава ԝәда дьминә у сәр йе Хьраб кʼәтьнә.

¹⁵Дьнйайе һʼьз нәкьн, нә жи ԝан тьштед кӧ дьнйайеда нә. Һәгәр йәк дьнйайе һʼьз дькә, һʼьзкьрьна Баве нава ԝида тʼӧнә.

¹⁶Чьмки һәр тьштед кӧ дьнйайеда нә, дьлһавьжи, чʼәʼвһавьжи у кʼӧбар-бабахийа ви әʼмьри йә, әԝ нә жь Баве нә, ле жь ве дьнйайе нә.

¹⁷Дьнйайе жи дәрбаз бә, һавьжийа ԝе жи, ле әԝе кӧ әʼмьре Хԝәде дьԛәдинә ԝе һʼәта-һʼәтайе бьминә.

¹⁸Зарʼно, ва ԝәхте ахьрийе йә. У чаԝа ԝә бьһистийә кӧ әкʼсимәсиһ ԝе бе, иди гәләк әкʼсимәсиһ һатьнә. Жь ԝе йәке жи әм заньн кӧ ԝәхте ахьрийе йә.

¹⁹Һьнәк жь нава мә дәркʼәтьн, ле әԝ нә жь мә бун. Һәгәр әԝ жь мә буна, ԝе тʼәви мә бьмана. Ле әԝ жь нава мә дәркʼәтьн, кӧ әʼйан бә, әԝ һʼәму нә жь мә бун.

²⁰Ле ԝә жь Мәсиһе Пироз Рʼӧһʼ пʼешкʼеш стандийә[6] у һун һʼәму[7] жи рʼастийе заньн.

²¹Әз ԝәрʼа наньвисьм, чаԝа кӧ һун рʼастийе ньзаньн, ле чаԝа кӧ һун ԝе йәке заньн, ӧса жи заньн кӧ һәр дәрәԝ нә жь рʼастийе йә.

²²Кʼи йә дәрәԝин? Һәма әԝ ә, йе кӧ дьбежә: «Иса нә Мәсиһ ә». Әԝ ә әкʼсимәсиһ, йе кӧ Бав у Кӧрʼ инкʼар дькә.

²³Әԝе кӧ Кӧрʼ инкʼар дькә, һәләԛәтийа ԝи тʼәви Баве тʼӧнә. Ле йе кӧ Кӧрʼ иԛрар дькә, һәләԛәтийа ԝи тʼәви Баве һәйә.

²⁴Аԝа чь кӧ ԝә пешда бьһистийә, бьра әԝ нава ԝәда бьминә. Һәгәр әԝ тьште ԝә пешда бьһистийә нава ԝәда бьминә, һуне жи нава Кӧрʼ у Баведа бьминьн.

²⁵У әв ә әԝ созе кӧ Ԝи да мә, әԝ жийина һʼәта-һʼәтайе йә.

²⁶Әз ви тьшти дәрһәԛа ԝанда ԝәрʼа дьньвисьм, йед кӧ дьхԝазьн ԝә бьхапиньн.

²⁷Ле чь дәрһәԛа ԝәда йә, әԝ Рʼӧһʼе[8] кӧ ԝә жь Мәсиһ стандийә, нава ԝәда дьминә. Иди нә һʼәԝщә йә, кӧ йәк ԝә һин кә, чьмки Рʼӧһʼ бона һәр тьшти ԝә һин дькә у чь кӧ һин дькә рʼаст ә, нә дәрәԝ ә. Чаԝа Әԝи һун һинкьрьн, нав Мәсиһда ӧса бьминьн.

²⁸Бәле зарʼокно, нава Ԝида бьминьн, ԝәки чахе Әԝ әʼйан бә, әм жь һатьна Ԝи вәнәкʼьшьн, ль бәр Ԝи шәрми нәминьн.

²⁹Һәгәр һун заньн кӧ Әԝ рʼаст ә, ӧса жи заньбьн һәр кәсе кӧ рʼастийе дькә, әԝ жь Ԝи буйә.