Read Пәймана Ну (Инщил) Щьһуда 1 Bible Online

Щьһуда 1 - Пәймана Ну (Инщил) bible

Щьһуда 1

¹Жь Щьһудайе хӧламе Иса Мәсиһ, бьрайе Аԛуб, ԝәрʼа, йед кӧ газикьри нә, жь Бав Хԝәдеда һʼьзкьри у хԝәйкьрийед Иса Мәсиһ ьн:

²Дә бьра рʼәʼм, әʼдьлайи у һʼьзкьрьн һе ль ԝә зедә бә.

³Дәлално! Гава мьн дьл кьр, кӧ әз бона ве хьлазбуна мәйә тʼомәри ԝәрʼа бьньвисьм, һьнге мьн рʼе терʼа дит бона ве йәке ԝәрʼа бьньвисьм у дьл бьдьмә ԝә, ԝәки һун бона ԝе баԝәрийа кӧ щарәке бона һәр тʼьм щьмәʼта Хԝәдерʼа һатийә дайине, шәрʼе хԝә бькьн.

⁴Чьмки чәнд мәрьв дьзива кʼәтьнә нава ԝә, кӧ дәрһәԛа диԝана ԝанда һе пешда ньвисар бу. Әԝед нәпʼак бьн наве кʼәрәма Хԝәдейе мә хԝә данә бенамусийе у Хӧдане мә Иса Мәсиһ Хԝәйики бешьрики-беһәвал инкʼар кьрьнә.

⁵Ле әз дьхԝазьм биньмә бира ԝә, чаԝа һун ван һʼәму тьшта заньн жи, кӧ Хӧдан щьмәʼта Хԝә жь ԝәлате Мьсьре хьлаз кьр, паше ԛьрʼа йед кӧ баԝәр нәкьрьн ани[1].

⁶У әԝ мьлйакʼәтед кӧ һʼӧкӧме хԝә хԝәй нәкьрьн, ле щийе хԝә шьһʼьтандьн, Хԝәде ԝан бь ԛәйдед һʼәта-һʼәтайейә тәʼристанийеда хԝәй дькә, бона ԝе Рʼожа һʼәсабә Диԝане.

⁷Ве жи бир нәкьн чаԝа Содом, Гомора у бажаред дор-бәред ԝан, мина ԝан жь гӧрʼа Хԝәде дәркʼәтьн ԛави кьрьн, чʼәʼв авитьнә бәдәна башԛә[2] у диԝана агьрийә һʼәта-һʼәтайе сәр хԝәда анин. Әвана иди бона мә тʼәрз у дәрс ьн.

⁸Ӧса жи әԝ мәрьв пәй хәԝна дькʼәвьн, ԛальбе хԝә дьһʼәрʼьминьн, дьжәньнә сәрԝертийа у һәйинед хԝәйирʼумәтә жорьн беһӧрмәт дькьн[3].

⁹Ле Мьхайиле сәрәке мьлйакʼәта әв йәк нәкьр. Гава бона щьнйазе Муса рʼабу мирещьнрʼа кʼәтә һʼӧщәте, тӧрӧш нәкьр кӧ бь готьнед беһӧрмәткьрьне[4] диԝана ԝи бькьра, ле гот: «Бьра Хӧдан ль тә һьле!»

¹⁰Ле әв мәрьвана сәрәдәрийе ԝан тьшта накьн, кʼижана кӧ беһӧрмәт дькьн, ле чь жи мина һʼәйԝанед безарә-безьман бь бьнйатʼи фәʼм дькьн, бь ԝан жи ӧнда дьбьн.

¹¹Ԝәй ль ԝан, кӧ рʼийа Ԛайинда чун, мина Бьлам хальфин, пәй кʼара хԝә кʼәтьнә у мина рʼабәрибуна Ԛорах ԝе бәла хԝә бьбиньн[5].

¹²Әвана мәсрәфед һʼьзкьрьна[6] ԝәда ләкʼә нә, тʼәви ԝә бе хоф дьхԝьн-вәдьхԝьн, тʼәне зьке хԝә дьчʼериньн. Йед һа, әʼԝред беавә жь бәр бе чуйи нә, даред пайизейә бебәр ьн, рʼаԝава рʼакьри, дӧ щар һʼьшк буйи,

¹³пелед бәʼрейә рʼабуйи нә, кӧ чаԝа әʼйба кьред ԝе мина кʼәфе сәр дькʼәвә. Әԝ стәйркед хальфи нә, бона кʼижана духана тәʼристанийе һʼәта-һʼәтайе хԝәйкьри йә.

¹⁴Һәнох жи кӧ пәй Адәмрʼа баве һʼәфта бу, бона ван мәрьва пʼехәмбәрти кьр у гот: «Ва йә Хӧдан тʼәви пирозед Хԝәйә беһʼәсаб те[7],

¹⁵ԝәки диԝана һʼәмуйа бькә у һʼәму нәпʼака нәһәԛ кә, бона һʼәму кьред ԝанә нәпʼак у бона ԝан һʼәму готьнед хьраб, кӧ нәпʼакед гӧнәкʼар һьндава Ԝида хәбәр дан».

¹⁶Әвана мәрьвнә бинтәнгә фьш-фьшко нә, пәй хԝәстьнед дьле хԝә дьчьн, жь хԝә мәстьр хәбәр дьдьн у бона кʼара хԝә һʼьләкʼарийа дькьн.

¹⁷Ле һун дәлално, ԝан готьнед кӧ шандийед Хӧдане мә Иса Мәсиһ пешда готьнә бир биньн,

¹⁸кӧ ԝәрʼа дьготьн: «Рʼожед ахьрийеда мәрьвед ԛәрфкьр ԝе дәрен, пәй хԝәстьнед дьле хԝәйә нәпʼак һәрʼьн»[8].

¹⁹Әв әԝ мәрьв ьн, йед кӧ дӧтирәтийе дькьн, йед кӧ бь мәрьвайи тенә рʼебәрикьрьне, нә кӧ бь Рʼӧһʼе Пироз.

²⁰Ле һун дәлално, хԝә бьдьнә сәр авакьрьна баԝәрийа хԝәйә пироз, бь Рʼӧһʼе Пироз дӧа бькьн,

²¹хԝә нава ԝе һʼьзкьрьна Хԝәдейә һьндава хԝәда хԝәй кьн, һивийа рʼәʼма Хӧдане мә Иса Мәсиһ бьн, кӧ жийина һʼәта-һʼәтайе бьдә ԝә.

²²У һьндава дӧдьлийада рʼәʼм бьн[9].

²³Һьнәка жи жь агьр бьрʼәвиньн хьлаз кьн, дьле ԝә сәр йед майин жи бь тьрс бьшәԝьтә, ле жийина ԝанә гӧнәкʼарә мина кʼьнща ләԝьтʼи бәр чʼәʼве ԝә рʼәш бә[10].

²⁴Ԝирʼа, Йе кӧ дькарә ԝә жь кʼәтьне хԝәй кә у ль бәр рʼумәта Хԝә беԛӧсур әшԛ бьдә сәкьнандьне,

²⁵Хԝәдейе бешьрики-беһәвал, Хьлазкьре мәрʼа, бь дәсте Иса Мәсиһе Хӧдане мә, шькьр у мәзьнайи, ԛӧдрәт у һʼӧкӧмәт бә, бәри һәр-һәйе у ньһа жи у һʼәта-һʼәтайе! Амин.