Read Пәймана Ну (Инщил) Әʼйанти 11 Bible Online

Әʼйанти 11 - Пәймана Ну (Инщил) bible

Әʼйанти 11

¹Һьнге ԛамишәки мина шьва мьнрʼа һатә дайине у һатә готьне: «Рʼабә, пʼарьстгәһа Хԝәде у горигәһе чап кә у йед кӧ теда дьһʼәбиньн жи бьжмьрә.

²Ле һʼәԝша пʼарьстгәһейә дәрва бьһелә у ԝе чап нәкә, чьмки әԝ пʼутпʼарьстарʼа һатә дайине. Әԝе Бажаре Пироз чьл дӧ мәһа бьн пʼийада пʼепәс кьн[55].

³У Әзе тʼәмийе бьдьмә дӧ шәʼдед Хԝә, әԝе кʼӧрх хԝәкьри һʼәзар дӧсьд шест рʼожи пʼехәмбәртийе бькьн».

⁴Әвана әԝ һәр дӧ даред зәйтʼуне у һәр дӧ шәмдан ьн, йед кӧ ль бәр Хӧдане дьнйайе дьсәкьньн[56].

⁵Һәгәр мәрьвәк кӧ бьхԝазә зьраре бьдә ԝан, агьр жь дәве ԝан дәрдькʼәвә, дьжмьнед ԝан һʼуфи хԝә дькә. У һәгәр мәрьвәк бьхԝазә зьраре бьдә ԝан, гәрәке әԝ хԝәха ӧса бе кӧштьне.

⁶Һʼӧкӧме ван һәйә, кӧ рʼожед пʼехәмбәртийа хԝәда әʼзмен дадьн, ԝәки баран нәбарә. Ӧса жи һʼӧкӧме ԝан ль сәр ава һәйә, кӧ ԝан бькьнә хун у кʼәнге жи бьхԝазьн, дькарьн һәр щурʼә бәла биньнә сәре дьне[57].

⁷Гава әԝана шәʼдәтийа хԝә сәр һәвда биньн, һьнге әԝ щәʼнәԝьре кӧ жь гәлийе һәй-ԝайе дәрдькʼәвә, ԝе тʼәви ԝан шәрʼ кә, ԝан бьндәст кә у бькӧжә.

⁸Щьнйазед ԝан ԝе ль сәр мәйдана ԝи бажаре мәзьн авити бьн, ль ԝи щийе кӧ Хӧдане ԝан һәр дӧйа һатә хачкьрьне, кӧ бь мәʼна рʼӧһʼани жерʼа «Содом» у «Мьсьр» те готьне.

⁹Жь һʼәму щьмәʼта, бәрәка, зьмана у мьләта ԝе се рʼож у нива ль щьнйазед ԝан бьньһерʼьн у нәһельн кӧ щьнйазед ԝан бькьнә тʼьрба.

¹⁰Бьнәлийед ль рʼубари дьне ԝе дьле хԝә ль ԝан ша кьн у ша бьн, хәлата жи һәвдӧрʼа бьшиньн, чьмки ван һәр дӧ пʼехәмбәра щәфа дьданә йед кӧ ль сәр рʼуйе әʼрде дьман.

¹¹Пәй се рʼож у ниварʼа Хԝәде рʼӧһʼе жийине бәр ԝанда ани, әԝ рʼабунә сәр пʼийа у хофәкә мәзьн кʼәтә сәр йед кӧ әԝ дитьн.

¹²Һьнге ԝан һәр дӧйа дәнгәки бьльнд жь әʼзмен бьһист кӧ ԝанрʼа гот: «Ԝәрьнә ве жоре». У әԝана бәр чʼәʼвед дьжмьнед хԝә әʼԝрава һьлкʼьшийанә әʼзмен.

¹³Ԝе сьһʼәте әʼрд ԛайим һʼәжийа, жь дәһә пʼара пʼарәкә бажер һьлшийа у ԝе әʼрдһʼәжеда һʼәфт һʼәзар мәрьв мьрьн, йед майин жи чʼәʼвтьрсийайи бун, шькьри дьданә Хԝәдейе әʼзмен.

¹⁴Ԝәйа дӧда дәрбаз бу. Ва йә, йа сьсийа ԝе зутьре бе.

¹⁵Мьлйакʼәте һʼәфта ль борʼийе хьст у әʼзменда дәнгед бьльнд һатьн кӧ дьготьн: «Пʼадшатийа дьнйайе бу йа Хӧдане мә у Мәсиһе Ԝи, Әԝе һʼәта-һʼәтайе пʼадшатийе бькә»[58].

¹⁶Әԝ һәр бист чар рʼуспийед кӧ ль бәр Хԝәде сәр кʼӧрсийед хԝә рʼуньштьбун, хԝә дәвәрʼуйа авитьн, сәре хԝә бәр Хԝәде данин

¹⁷у готьн: «Йа Хӧдан Хԝәдейе Һʼәму Зорайийе, Йе һәйи у Йе һәбуйи, әм шькьрийе дьдьнә Тә, кӧ Тә ԛәԝата Хԝәйә мәзьн станд у дәст бь һʼӧкӧме Хԝә кьр[59].

¹⁸Пʼутпʼарьст ԛьлԛьлин, ле хәзәба Тә һат. Ԝәхт перʼа гьһиштийә, кӧ диԝана мьрийа бьки, хәлата бьди хӧламед Хԝә, пʼехәмбәра у щьмәʼта Хԝә ӧса жи йед кӧ жь Тә дьтьрсьн, жь бьчʼука һʼәта мәзьна. Ԝәхт һат, кӧ ԛьрʼа ԝан бини, йед кӧ дьне хьраб дькьн»[60].

¹⁹Пәй ве йәкерʼа пʼарьстгәһа Хԝәдейә әʼзмен вәбу у ԝеда Сьндоԛа Пәймана Ԝи хӧйа бу. Бьруске бьрԛ дан, гӧрʼинийа дәнгед әʼԝра һатә бьһистьне, әʼрд һʼәжийа у тәйрок бари.