Read Пәймана Ну (Инщил) Әʼйанти 12 Bible Online

Әʼйанти 12 - Пәймана Ну (Инщил) bible

Әʼйанти 12

¹Һьнге нишанәкә мәзьн әʼзменда хӧйа бу: Кʼӧлфәтәке рʼо ль хԝә ԝәргьртьбу, һив бьне пʼийада у тʼащәки жь донздәһ стәйрка жи ль сери бу.

²Әԝ һʼәмлә бу у кʼәтьбу бәр зарʼе, еша хԝә дькʼьшанд у дькьрә ԛирʼин.

³Пәй ве йәкерʼа нишанәкә дьн жи әʼзменда хӧйа бу. Мьн дина хԝә дайе, ва зийаки зәри мәзьн кӧ һʼәфт сәри у дәһә стьруйед ԝи һәбун у һʼәфт тʼащ жи ль сәред ԝи бун[61].

⁴Почʼа ԝи жь се пʼара пʼарәкә стәйркед әʼзмен кʼьшанд у авитә сәр әʼрде. Әԝ зийа ль бәр ԝе кʼӧлфәта кӧ кʼәтьбу бәр зарʼе сәкьни, кӧ һәма чаԝа зарʼ бьбә ԝе зарʼе һʼуфи хԝә кә.

⁵Ԝе кʼӧлфәте зарʼәкә кӧрʼин ани, кӧ ԝе бь шьвдара һʼәсьни шьвантийе ль һʼәму мьләта бькә. Ле зарʼа ԝе һатә рʼаһьштьне, ль щәм Хԝәде у бәр тʼәхте Ԝи[62].

⁶Кʼӧлфәт жи рʼәви бәрʼийе, ль ԝи щийе кӧ жь алийе Хԝәдеда жерʼа һатьбу һазьркьрьне, ԝәки әԝ ль ԝьр һʼәзар дӧсьд шест рʼожи бе хԝәйкьрьне.

⁷Һьнге ль әʼзмен шәрʼ дәст пе бу. Мьхайил мьлйакʼәтед хԝәва тʼәви зийе шәрʼ кьр, зийе жи мьлйакʼәтед хԝәва тʼәви ԝан шәрʼ кьр[63].

⁸Ле зийе да дәр, әʼзменда жи иди щи дәст ԝан нәкʼәт,

⁹әԝ зийайе мәзьн жорда һатә авитьне. Әва әԝ мәʼре бәре бу, кӧ жерʼа мирещьн у шәйтʼан дьбежьн, йе кӧ тʼәмамийа дьне хальфандийә. Әԝ мьлйакʼәтед хԝәва жорда һатьнә авитьне сәр рʼуйе әʼрде[64].

¹⁰Һьнге мьн ль әʼзмен дәнгәки бьльнд бьһист кӧ гот: «Ньһа йә ԝәхте хьлазкьрьн, ԛәԝат у пʼадшатийа Хԝәдейе мә, ӧса жи һʼӧкӧме Мәсиһе Ԝи. Чьмки Әԝ хәйбкьре хушк-бьред мә жорда һатә авитьне, йе кӧ шәв у рʼож бәр Хԝәдейе мә хәйба ԝан дькьр[65].

¹¹Әԝана пе хуна Бәрх у хәбәра шәʼдәтийа хԝә сәр ԝи кʼәтьн, әʼмьре хԝә һʼәта мьрьне һʼьз нәкьрьн.

¹²Аԝа ша бьн, әʼзманно у йед кӧ ԝанда дьминьн. Ле ԝәй ль әʼрде у ль бәʼре, чьмки мирещьн жорда сәр ԝәда һатә авитьне у әԝ жь һерсе хԝә дьхԝә, кӧ занә ԝе һьндьки бьминә».

¹³Гава зийе дит кӧ әԝ жорда һатә авитьне сәр әʼрде, пәй ԝе кʼӧлфәте кʼәт, йа кӧ зарʼа кӧрʼин анибу.

¹⁴Дӧ баскед тәйре симьрʼийә мәзьн ԝе кʼӧлфәтерʼа һатьнә дайине, ԝәки бьфьрʼә һәрʼә бәрʼийе, ԝи щийе хԝә, кʼидәре жь зийе дур ԝе се сал у нива бьһата хԝәйкьрьне.

¹⁵Һьнге зийе жь дәве хԝә мина чʼем ав бәрʼда пәй ԝе кʼӧлфәте, ԝәки ԝе пе лейе бьхәньԛинә.

¹⁶Ле әʼрде аликʼарийа ԝе кʼӧлфәте кьр, дәве хԝә вәкьр у әԝ чʼәме кӧ зийе жь дәве хԝә бәрʼдабу даԛӧртанд.

¹⁷Һьнге ԝи зийайи һерса хԝә ль ԝе кʼӧлфәте рʼакьр у чу, ԝәки шәрʼе хԝә тʼәви ԝан зарʼед ԝейә майин бькә, йед кӧ тʼәмийед Хԝәде хԝәй дькьн у шәʼдәтийа бона Иса дьдьн[66].

¹⁸Зийа ль дәве бәʼре сәкьни.