Read Пәймана Ну (Инщил) Әʼйанти 14 Bible Online

Әʼйанти 14 - Пәймана Ну (Инщил) bible

Әʼйанти 14

¹Паше мьн дина хԝә дайе, ва Бәрх ль сәре чʼийайе Сийоне сәкьни бу у сәд чьл чар һʼәзар мәрьв тʼәви Ԝи бун, кӧ ль сәр әʼнийа ԝан наве Ԝи у наве Баве Ԝи ньвисар бун.

²Мьн жь әʼзмен дәнгәк бьһист, мина дәнге гәләк ава у мина дәнге гӧрʼинийа әʼԝрайә ԛайим. Әԝ дәнге кӧ һатә мьн, мина дәнге мьԛаме чәнгвана бу, кӧ ль чәнгед хԝә дьхьн.

³Ԝана ль бәр тʼәхт у ль бәр ԝан һәр чар рʼӧһʼбәра у рʼуспийа стьранәкә ну дьстьра. Тʼӧ кәс нькарьбу ԝе стьране һин буйа, пештьри ԝан сәд чьл чар һʼәзаред кӧ жь дьнйайе һатьбунә кʼьрʼине.

⁴Әвана әԝ ьн, йед кӧ сәре хԝә жьнарʼа данәнинә, әԝ йед бькʼьр ьн. Әвана пәй Бәрх дьчьн, кʼӧда кӧ әԝ дьчә. Әвана жь нава мәрьва һатьнә кʼьрʼине, чаԝа бәре дәрәмәта пешьн кӧ Хԝәде у Бәрхрʼа бенә дайине.

⁵Дәрәԝ жь дәве ԝан дәрнәкʼәтийә, әԝ беԛӧсур ьн.

⁶Һьнге мьн дина хԝә дайе, ва мьлйакʼәтәки дьн кӧ әʼзменда дьфьрʼи у Мьзгинийа ԝийә һʼәта-һʼәтайе һәбу, ԝәки ԝе Мьзгинийе бьдә йед рʼубари дьне, аԝа готи һʼәму мьләта, бәрәка, зьмана у щьмәʼта.

⁷Ԝи бь дәнгәки бьльнд дьгот: «Жь Хԝәде бьтьрсьн у шькьрийе бьдьнә Ԝи, чьмки сьһʼәта диԝанкьрьна Ԝи перʼа гьһишт. Сәре хԝә бәр Ԝи дайньн, Йе кӧ әʼрд у әʼзман, бәʼр у авед канийа әʼфьрандьнә».

⁸Һьнге мьлйакʼәтәки дьн пәй ԝи һат у гот: «Һьлшийа, ԝеран бу! Әԝ Бабилона мәзьн, йа кӧ әԝ шәрава ԛавийа хԝәйә һар һʼәму мьләт данә вәхԝарьне»[70].

⁹Пәй ве йәкерʼа мьлйакʼәтәки дьн жи пәй ԝан һат у бь дәнгәки бьльнд гот: «Әԝе кӧ сәре хԝә ль бәр щәʼнәԝьр у һʼәйкәле ԝи дайнә у нишана ԝи сәр әʼнийа хԝә йан сәр дәсте хԝә ԛәбул кә,

¹⁰әԝе жь ԝе шәрава һерса Хԝәде вәхԝә, йа кӧ ав тʼәвнәкьри йә, кʼаса Ԝийә хәзәбеда дагьрти йә. Әԝе ль бәр мьлйакʼәтед пироз у ль бәр Бәрх агьр у кʼьркʼутеда щәфе бькʼьшинә[71].

¹¹Дуйе щәфе ԝан ԝе һʼәта-һʼәтайе бькʼьшә у шәв у рʼож ԝе рʼьһʼәтийа ԝан тʼӧнәбә, йед кӧ сәре хԝә бәр щәʼнәԝьр у һʼәйкәле ԝи датиньн у нишана ԝи ль сәр ԝан ә».

¹²Аԝа ль вьр ԝе сәбьра щьмәʼта Хԝәде кер бе, йед кӧ тʼәмийед Хԝәде хԝәй дькьн у һьндава Исада амьн ьн.

¹³Һьнге мьн жь әʼзмен дәнгәк бьһист кӧ гот: «Бьньвисә: Жь вьр шунда хԝәзьли нә әԝ мәрьв, йед кӧ бона баԝәрийа сәр Хӧдан ԝе бьмьрьн». Рʼӧһʼ дьбежә: «Бәле! Әԝе жь хәбата хԝә рʼьһʼәт бьн, чьмки кьред ԝан тʼәви ԝан дьчьн».

¹⁴У мьн дина хԝә дайе, ва әʼԝрәки сьпи у «йәки мина кӧрʼе мерьв»[72] ль сәр ԝи әʼԝри рʼуньшти бу. Тʼащәки зерʼин ль сәре Ԝи бу у дәʼсәкә туж жи дестда бу[73].

¹⁵Һьнге мьлйакʼәтәки дьн жь пʼарьстгәһе дәркʼәт, бь дәнгәки бьльнд ль Әԝи кӧ ль сәр әʼԝр рʼуньшти бу кьрә гази у готе: «Дәʼса Хԝә бавеже бьдьру, чьмки әԝ сьһʼәта нандьруне һат, бәре әʼрде иди гьһиштийә»[74].

¹⁶Әԝи кӧ ль сәр әʼԝр рʼуньшти бу дәʼса Хԝә авитә рʼуйе әʼрде у әʼрд һатә дьруне.

¹⁷Һьнге жь ԝе пʼарьстгәһа әʼзмен мьлйакʼәтәки дьн дәркʼәт у дәсте ԝида жи дәʼсәкә туж һәбу.

¹⁸Ԝе һьнге жь горигәһе мьлйакʼәтәки дьн дәркʼәт, кӧ һʼӧкӧме ԝи ль сәр егьр һәбу, әԝи бь дәнгәки бьльнд ль йе хԝәйе дәʼса туж кьрә гази у готе: «Дәʼса хԝәйә туж бавежә гушийед тьрийед әʼрде у бьчьнә, чьмки тьрийед ԝе иди гьһиштьнә».

¹⁹Ԝи мьлйакʼәти жи дәʼса хԝә авитә әʼрде, тьрийед әʼрде чьнин у бона һʼьнщьрʼандьне авитә ԝи һʼәԝзе мәзьни хәзәба Хԝәде.

²⁰Әԝ тьри ԝи һʼәԝзида һатьнә һʼьнщьрʼандьне, кӧ жь бажер дәр бу у жь һʼәԝз хун кʼьшийа, хуне авитә гәме һәспа, ԛаси һʼәзар шәшсьд мәйдани[75] гьрт.