Read Пәймана Ну (Инщил) Әʼйанти 17 Bible Online

Әʼйанти 17 - Пәймана Ну (Инщил) bible

Әʼйанти 17

¹Жь ԝан һәр һʼәфт мьлйакʼәтед кӧ хԝәйе һәр һʼәфт тʼаса бун, йәки һат тʼәви мьн хәбәр да у гот: «Ԝәрә ве дәре, әз диԝана ԝе ԛава бь нав у дәнг нишани тә кьм, йа кӧ ль сәр гәләк ава рʼуньшти йә[87].

²Пʼадшед дьнйайе тʼәви ве ԛави кьрьн у бьнәлийед рʼубари дьне пе шәрава ԛавийа ԝе сәрхԝәш бун».

³Һьнге Рʼӧһʼе Пироз һатә сәр мьн, ԝи мьлйакʼәти әз бьрьмә бәрʼике. Мьн дина хԝә дайе, ва жьнәк ль сәр щәʼнәԝьрәки соре гәвәз сийар, кӧ сәрда-педа жь һәр алийава бь навед кʼьфьрийед һьндава Хԝәдеда тʼьжи бун у һʼәфт сәред ԝи у дәһә стьруйед ԝи һәбун.

⁴Әԝ кʼӧлфәта кʼьнща ширк у соре гәвәзва ԝәргьрти бу, пе зерʼ, кәвьред ԛимәт, лал у дӧрʼва хәмьли бу. Кʼасәкә зерʼин дәсте ԝеда бу, әԝ кʼас жи кʼьрети у мьрʼдарʼийа ԛавийа ԝева дагьрти бу.

⁵Ль сәр әʼнийа ԝе навәки сӧрʼ ньвисар бу: БАБИЛОНА МӘЗЬН, МАКА ԚАВА У КʼЬРЕТИЙЕД ДЬНЙАЙЕ.

⁶Мьн дина хԝә дайе, ԝе әԝ кʼӧлфәта пе хуна щьмәʼта Хԝәде у пе хуна шәʼдед Иса сәрхԝәш буйә. Гава кӧ мьн әԝ дит, әз гәләки әʼщебмайи мам.

⁷Һьнге ԝи мьлйакʼәти мьнрʼа гот: «Тӧ чьма әʼщебмайи майи? Әзе сӧрʼа ԝе кʼӧлфәте у сӧрʼа ԝи щәʼнәԝьре кӧ әԝа ле сийар ә, кʼижан кӧ һʼәфт сәред ԝи у дәһә стьруйед ԝи һәнә, тәрʼа бежьм.

⁸Әԝ щәʼнәԝьре кӧ тә дит, ԝәхтәке һәбу, ле ньһа тʼӧнә. Әԝе зутьре жь гәлийе һәй-ԝайе дәркʼәвә у һәрʼә ӧнда бә. Бьнәлийед рʼубари дьнейә кӧ навед ԝан жь ԝәхте әʼфьрандьна дьнйайеда кʼьтеба жийинеда нәһатьнә ньвисаре, ԝе әʼщебмайи бьминьн, гава ԝи щәʼнәԝьри бьбиньн, йе кӧ һәбу у ньһа тʼӧнә, ле ԝе һәбә.

⁹Ль вьр һʼьш-аԛьл кер те. Әԝ һәр һʼәфт сәри, һʼәфт чʼийа нә, сәр кʼижана әԝ кʼӧлфәт рʼуньшти йә, ӧса жи һʼәфт пʼадша нә.

¹⁰Жь ԝан пенщ кʼәтьнә, йәк һәйә, йе дьн һе нәһатийә у гава бе, гәрәке һьнәк ԝәхт бьминә.

¹¹Әԝ щәʼнәԝьре кӧ ԝәхтәке һәбу у ньһа тʼӧнә, әԝ хԝәха жи пʼадше һʼәйшта йә. Әԝ йәки жь ԝан һәр һʼәфта йә у ԝе һәрʼә ӧнда бә.

¹²Әԝ һәр дәһә стьруйед кӧ тә дитьнә, дәһә пʼадша нә, кӧ һе пʼадшати нәстандьнә, ле бәле ԝе һʼӧкӧм бьстиньн, кӧ тʼәви щәʼнәԝьр бона сьһʼәтәке пʼадшатийе бькьн[88].

¹³Мәрәме ван һәр дәһа йәк ә, әԝе ԛәԝат у һʼӧкӧме хԝә бьдьнә щәʼнәԝьр.

¹⁴Әвана ԝе тʼәви Бәрх шәрʼ бькьн, ле Бәрх тʼәви йед газикьри, бьжарти у амьна ԝе ль сәр ԝан бькарьбә, чьмки әԝ Бәрх Хӧдане хӧдана у Пʼадше пʼадша йә».

¹⁵Һьнге мьлйакʼәт мьнрʼа гот: «Әԝ авед тә дитьн кӧ әԝа ԛав ль сәр ԝан рʼуньштийә, әԝ щьмәʼт ьн, әʼлаләт ьн, мьләт у зьман ьн.

¹⁶Әԝ һәр дәһә стьруйед кӧ тә дитьн, ӧса жи щәʼнәԝьр ԝе һәврʼа бьжәньнә йа ԛав. Әԝе дәсте ԝе жь һәр тьшти бькьн, ԝе тәʼзи кьн у гоште ԝе бьхԝьн, егьрда бьшәԝьтиньн.

¹⁷Чьмки Хԝәде әв йәк кьрә дьле ԝан, кӧ хԝәстьна Ԝи бькьн у сәр нетәке бьн, пʼадшатийа хԝә бьдьнә щәʼнәԝьр, һʼәта кӧ хәбәред Хԝәде бенә сери.

¹⁸Әԝ жьна кӧ тә дит, әԝ бажаре мәзьн ә, йе кӧ пʼадшатийе ль сәр пʼадшед дьнйайе дькә».