Read Пәймана Ну (Инщил) Әʼйанти 18 Bible Online

Әʼйанти 18 - Пәймана Ну (Инщил) bible

Әʼйанти 18

¹Пәй ван тьштарʼа мьн дина хԝә дайе, ԝе мьлйакʼәтәки дьн жь әʼзмен дьһатә хԝаре. Әԝ хԝәйе һʼӧкӧме мәзьн бу у жь диндара ԝи рʼуйе әʼрде рʼонайи бу.

²Әԝи бь дәнгәки бьльнд кьрә гази у гот: «Һьлшийа, ԝеран бу, Бабилона мәзьн! Әԝ бу щи-ԝар, мьскʼәне щьна у сьтʼара һʼәму рʼӧһʼед һʼәрам, ԛәлетка һʼәму тәйрәдед нәпʼакә мьрʼдарʼ[89].

³Чьмки жь ԝе шәрава ԛавийа ԝейә һар һʼәму мьләта һьлда вәхԝар, пʼадшед дьнйайе тʼәви ԝе ԛави кьрьн, базьрганед дьнйайе жь агьре дьле ԝе дәԝләти бун»[90].

⁴Ль вьр мьн жь әʼзмен дәнгәки дьн бьһист кӧ гот: «Жь нава ԝе дәркʼәвьн, щьмәʼта Мьн, ԝәки һун нәбьнә һәвал-пʼаред гӧнед ԝе у жь бәлайед ԝе пʼаре нәстиньн[91].

⁵Чьмки гӧнед ԝе сәр һәв щи бунә гьһиштьнә һʼәта әʼзмен у Хԝәде нәрʼастийед ԝе анинә бира Хԝә[92].

⁶Ԝе чь кьрьбә ӧса жи һун биньнә сәре ԝе у ль анәгори кьред ԝе, дӧ щар һаԛаси ле вәгәрʼиньн, әԝ кʼаса кӧ ԝе бона ԝә дагьрт, һун дӧ щар тәʼл ль ԝе бьдьнә вәхԝарьне[93].

⁷Чьԛас рʼумәта хԝә бьльнд кьрийә у кʼефа дьле хԝә дәрбаз кьрийә, һаԛаси щәфа-шине сәрда биньн. Чьмки дьле хԝәда аһа дьбежә: ‹Әз чаԝа пʼадша рʼуньшти мә, у нә жьнәби мә, тʼӧ щар әзе шине нәбиньм›[94].

⁸Ләма жи нава рʼожәкеда ԝе бәлайед ԝе сәр ԝеда бен: Нәхԝәшийа һʼал, шин у хәлайи у ԝе бьбә хӧре егьр. Чьмки әԝ Хӧдан Хԝәде ԛәԝат ә, йе кӧ диԝана ԝе дькә».

⁹Пʼадшед дьнйайе, йед кӧ перʼа ԛави у кʼеф кьрьнә, гава дуйе шәԝата ԝе бьбиньн, ԝе бьгьрин у сәр ԝе шине бькьн.

¹⁰Жь тьрса щәфе ԝе, әԝе ль дур бьсәкьньн у бежьн: «Ах, ах бажаре мәзьн, бажаре зор, Бабилон! Диԝана тә сьһʼәтәкеда сәр тәда һат»[95].

¹¹Базьрганед дьнйайе ԝе ль сәр ԝе бьгьрин у шине бькьн, чьмки иди тʼӧ кәсе тьштед ԝанә фьротане нәкʼьрʼә:

¹²Һур-муред зерʼ, зив, кәвьред ԛимәт, лал-дӧрʼ, кʼьтане ԛимәт, пʼарчʼед ширк, һәвьрмьш, пʼарчʼед соре гәвәз, һәр дара бинхԝәш у һәр тьштед жь ԛилед фила, тьштед жь даред һәрә ԛимәт, жь сьфьр, һʼәсьн у мәрмәр,

¹³ӧса жи дарчин, бьһарәта бинхԝәш, бьхур, рʼуне бинхԝәш, бьхуре әʼрәби, шәрав, бьзьре зәйтʼуне, аре хас, гәньм, дәԝар, пәз, һәсп, әʼрәбә, хӧлам у рʼӧһʼед инсен жи.

¹⁴Базьргане бежьн: «Әԝ тьштед дьле тәдайә ширьн жь дәсте тә чун у һʼәму тьштед рʼәԝшә бьрԛок жь тә бьрийан, иди тʼӧ щар әԝ дәст тә накʼәвьн».

¹⁵Әԝ базьрганед ван тьшта, йед кӧ пе Бабилоне дәԝләти бьбун, ԝе жь тьрса щәфе ԝе дур бьсәкьньн бьгьрин, бавежьнә сәр ԝе

¹⁶у бежьн: «Ах, ах бажаре мәзьн, кӧ тә кʼьтане ԛимәт, пʼарчʼе ширк у соре гәвәз ль хԝә ԝәргьртьбу у бь зерʼ, кәвьре ԛимәт, лал-дӧрʼва хәмьли буйи![96]

¹⁷Һаԛас һәбук сьһʼәтәкеда пʼучʼ бу чу». Һʼәму сәрдаред гәмийа у сийаред гәмийа, гәмивана у һʼәмуйед кӧ пе хәбата сәр бәʼре әʼбуре хԝә дькьрьн, дур сәкьнин[97]

¹⁸у чахе дуйе шәԝата ԝи дитьн, кьрьнә ԛирʼин у готьн: «Гәло бажарәки дьн мина ви бажаре мәзьн һәбу?»

¹⁹Хԝәли ль сәре хԝә кьрьн, бь шин у гьри кьрьнә ԛирʼин у готьн: «Ах, ах бажаре мәзьн, ԝәки һʼәмуйед бәʼредайә хԝәйигәми пе һәбука ԝийә хьнебуйи дәԝләти бьбун, чаԝа сьһʼәтәкеда ԝеран бу чу!»

²⁰Әʼзмано, щьмәʼта Хԝәде, шанди у пʼехәмбәрно! Дьле хԝә ша кьн ль ԝи бажари, кӧ Хԝәде һʼәйфа ԝә жь ԝи һьлда.

²¹Һьнге мьлйакʼәтәки ԛәԝат, кәвьрәк мина бәрашәки мәзьн һьлда, авитә бәʼре у гот: «Бь ви аԝайи жи бажаре мәзьн Бабилон ԝе ԛайим жорда бе авитьне у иди тʼӧ щар ԝе хӧйа нәбә[98].

²²Ԝе иди дәнге чәнг, сазбәнд, бьлурван у борʼиван нав тәда тʼӧ щар нәйе бьһистьне. Ԝе иди һостаки тʼӧ пʼешәйи тʼӧ щар нав тәда хӧйа нәбә. Ԝе иди дәнге бәраша жи тʼӧ щар нав тәда нәйе бьһистьне[99].

²³Ԝе иди чʼьрусийа чʼьре жи тʼӧ щар нав тәда хӧйа нәбә Ԝе иди дәнге бук-зәʼве жи тʼӧ щар нав тәда нәйе бьһистьне. Базьрганед тә гьрәгьред дьнйайе бун у һʼәму мьләт бь сербазийа тә жь рʼе хальфин[100].

²⁴У хуна пʼехәмбәр у щьмәʼта Хԝәде кʼәтә стуйе ԝи бажари, бәле хуна ԝан һʼәмуйа кӧ ль сәр рʼуйе әʼрде һатьнә рʼетьне».