Read Пәймана Ну (Инщил) Әʼйанти 19 Bible Online

Әʼйанти 19 - Пәймана Ну (Инщил) bible

Әʼйанти 19

¹Пәй ван йәкарʼа, мьн ль әʼзмен дәнгәки бьльнд бьһист, мина дәнге әʼлаләтәкә гьран кӧ дьгот: «Һалелуйа! Хьлазбун, рʼумәт у ԛәԝат йед Хԝәдейе мә нә!

²Диԝанед Ԝи рʼаст у һәԛ ьн. Әԝи диԝана ԝе ԛаве кьр йа кӧ пе ԛавийа хԝә дьне һʼәрʼьманд у һʼәйфа хуна хӧламед Хԝәде жь ԝе һьлда»[101].

³Щара дӧда готьн: «Һалелуйа! Һʼәта-һʼәтайе дуйе жь ԝе бькʼьшә»[102].

⁴Һәр бист чар рʼуспи у һәр чар рʼӧһʼбәр дәвәрʼуйа чун у сәре хԝә ль бәр ԝи Хԝәдейе ль сәр тʼәхт рʼуньшти данин у готьн: «Амин, Һалелуйа!»

⁵Һьнге дәнгәк жь тʼәхт һат у гот: «Һʼәму хӧламед Ԝийә кӧ жь Ԝи хоф дькьн, бьчʼук у мәзьн пәсьне Хԝәдейе мә бьдьн»[103].

⁶Һьнге мьн дәнг бьһист, чаԝа дәнге әʼлаләтәкә гьран, мина дәнге хӧлә-хӧла гәләк ава у мина дәнге гӧрʼинийа әʼԝрайә ԛайим кӧ дьготьн: «Һалелуйа! Чьмки Хӧдан Хԝәдейе мәйи Һʼәму Зорайийе дәст бь пʼадшатийе кьр[104].

⁷Әм Ԝирʼа гӧл дьн у ша бьн у шькьрийе бьдьнә Ԝи, чьмки дәʼԝата Бәрх перʼа гьһишт у дәргистийа Ԝи кʼаре хԝә кьрийә.

⁸Бона ль хԝәкьрьне кʼьтане бьрԛоки паԛьж жерʼа һатә дайине». (Әԝ кʼьтан нишана кьрьнед щьмәʼта Хԝәдейә рʼаст ьн.)[105]

⁹Һьнге ԝи мьлйакʼәти мьнрʼа гот: «Бьньвисә: Хԝәзи ль ԝан, кӧ бона шайийа дәʼԝата Бәрх һатьнә тʼәглифкьрьне!» Сәрда зедә кьр гот: «Ай әв ьн хәбәред Хԝәдейә рʼаст»[106].

¹⁰Ԝи чахи әз дәвәрʼу чумә ньга, кӧ сәре хԝә ль бәр ԝи дайньм, ле әԝи мьнрʼа гот: «Ве йәке нәкә! Әз жи һәвал-хӧламәки мина тә у ԝан хушк-бьред тә мә, кʼижан әʼламәтийа Исайә рʼаст хԝәй дькьн[107]. Сәре хԝә ль бәр Хԝәде дайнә. Чьмки әԝ рʼастийа кӧ Иса әʼлам кьр әԝ пʼехәмбәра дьдә хәбәрдане[108]».

¹¹Һьнге мьн дина хԝә дайе, әʼзман вәбу, ва йә һәспәки боз, кӧ сийаре Ԝирʼа Амьн у Рʼаст дьготьн. Әԝ диԝанкьрьне у шәрʼе Хԝәда сәр рʼастийе йә.

¹²Чʼәʼвед Ԝи мина алава егьр бун у гәләк тʼащ ль сәре Ԝи бун. Навәк сәр Ԝи ньвисар бу, кӧ пештьри Ԝи тʼӧ кәси ньзаньбу.

¹³Кʼьнщәкә хунеда кьри ле бу у наве Ԝи Хәбәра Хԝәде бу[109].

¹⁴Ордийед әʼзмен жи ль һәспед бозә сийар кʼьтанед чил-ԛәрԛашә паԛьж ль ԝан пәй Ԝи дьчун.

¹⁵Жь дәве Ԝи шурәки туж дәрдькʼәт, ԝәки ль мьләта хә. Әԝе пе шьвдара һʼәсьни шьвантийе ль ԝан бькә, ԝи һʼәԝзе шәрава хәзәба Хԝәдейе Һʼәму Зорайийеда ԝан бьһʼьнщьрʼинә.

¹⁶Ль сәр кʼьнща Ԝи, сәр һета Ԝи навәк ньвисар бу: ПʼАДШЕ ПʼАДША У ХӦДАНЕ ХӦДАНА.

¹⁷Һьнге мьн мьлйакʼәтәк дит, әԝ ль сәр рʼойе сәкьни бу, бь дәнгәки бьльнд кьрә гази у готә һʼәму тәйрәдед кӧ һәԝеда дьфьрʼьн: «Ԝәрьн бьщьвьнә шайийа Хԝәдейә мәзьн[110],

¹⁸ԝәки һун щьнйазед пʼадша, сәрдара, мерхаса у бәрәтʼед һәспа, ӧса жи щьнйазед сийаред ԝан у һʼәму мәрьва, аза у хӧлама, бьчʼук у мәзьна бьхԝьн».

¹⁹Һьнге мьн әԝ щәʼнәԝьр у пʼадшед дьнйайе ордийед ԝанва ль щики щьвийайи дитьн, ԝәки шәрʼе хԝә тʼәви Ԝи сийаре һәспе боз у ордийа Ԝива бькьн.

²⁰Һьнге әԝ щәʼнәԝьр тʼәви ԝи пʼехәмбәре дәрәԝ дил һатьнә гьртьне, йе кӧ ль бәр ԝи щәʼнәԝьри нишанед әʼщеб дькьрьн. Әԝи бь ԝан кьра әԝ хальфандьн, йед кӧ нишана щәʼнәԝьр ԛәбул кьрьн у сәре хԝә ль бәр һʼәйкәле ԝи данин. Щәʼнәԝьр у пʼехәмбәре дәрәԝ жи сахә-сах һатьнә авитьне нав гола агьре кʼьркʼутейи дьшьхӧлә.

²¹Әԝед майин жи пе ԝи шуре кӧ жь дәве Сийаре һәспе боз дәрдькʼәт, һатьнә кӧштьне у һʼәму тәйрәдә жь щьнйазед ԝан тʼер бун.