Read Пәймана Ну (Инщил) Әʼйанти 21 Bible Online

Әʼйанти 21 - Пәймана Ну (Инщил) bible

Әʼйанти 21

¹Һьнге мьн әʼрд у әʼзманәки ну дитьн, чьмки әʼрд у әʼзмане бәре дәрбаз бун у иди бәʼр тʼӧнәбу[115].

²Мьн дина хԝә дайе, ва жь әʼзмен Бажаре Пироз, Оршәлима ну мина букәкә хеликьри бона дәргистийе хԝә хәмьли жь Хԝәдеда дьһатә хԝаре.

³Мьн жь тʼәхт дәнгәки бьльнд бьһист кӧ гот: «Ва йә коне Хԝәде нава мәрьвада! Әԝе Хԝәха нав ԝанда бьжи, әԝана ԝе бьбьнә щьмәʼта Ԝи у Хԝәде Хԝәха жи ԝе тʼәви ԝан бьминә, чаԝа Хԝәдейе ԝан[116].[117]

⁴Әԝе жь чʼәʼвед ԝан һʼәму һесьред ԝан паԛьж кә у иди мьрьне тʼӧнәбә, нә шин, нә гьри, нә еш-ешук, чьмки тьштед бәре дәрбаз бун»[118].

⁵Һьнге Әԝи ль сәр тʼәхт рʼуньшти гот: «Ва Әз һәр тьшти ну чедькьм». У мьнрʼа гот: «Бьньвисә, чьмки әв хәбәрнә амьн у рʼаст ьн».

⁶Ӧса жи готә мьн: «Һәр тьшт һатә сери. Әз ьм Алфа у Омега, Дәстпебун у Ахьри. Әзе йед тʼи, жь канийа ава жийине беһәԛ бьдьмә вәхԝарьне.

⁷Әԝе кӧ сәркʼәвә, һәр тьште пʼара ԝи бькʼәвьн, Әзе Хԝәдейе ԝи бьм, әԝе жи лаԝе Мьн бә[119].

⁸Ле пʼара тьрсонәка, беамьна, кʼьрет-һʼәрама, меркӧжа, бенамуса, сербаза, пʼутпʼарьста у һʼәму дәрәԝина ԝе гола агьре кӧ кʼьркʼутева дьшәԝьтә бькʼәвә. Әв ә мьрьна дӧда».

⁹Мьлйакʼәтәки жь ԝан һәр һʼәфт мьлйакʼәта, йед кӧ һʼәфт тʼасед ԝанә һʼәфт бәлайед хьлазийева тʼьжи һәбун, һат тʼәви мьн хәбәр да у гот: «Ԝәрә ве дәре, әзе буке нишани тә кьм, дәргистийа Бәрх».

¹⁰Һьнге Рʼӧһʼе Пироз һатә сәр мьн, ԝи әз бьрьмә сәр чʼийаки мәзьни бьльнд у Бажаре Пироз, Оршәлим нишани мьн да, кӧ жь әʼзмен Хԝәдеда дьһатә хԝаре[120].

¹¹Рʼумәта Хԝәде нав ԝида шәԝԛ дьда, әԝ рʼонайи мина кәвьре ԛимәт бу, мина кәвьре йаспис, мина хьрустал бу.

¹²Сура ԝи мәзьн у бьльнд бу, донздәһ дәргәһи бу у ль бәр дәргәһа донздәһ мьлйакʼәт һәбун. Ль сәр дәргәһа навед һәр донздәһ ԛәбилед зарʼед Исраел ньвисар бун[121].

¹³Жь алийе рʼоһьлатева се дәргәһ, жь алийе бакӧрева се дәргәһ, жь алийе башурева се дәргәһ у жь алийе рʼоавайева се дәргәһ һәбун.

¹⁴Донздәһ һʼимед сура бажер һәбун, ль сәр ԝан һәр донздәһа навед һәр донздәһ шандийед Бәрх ньвисар бун.

¹⁵Дәсте ԝи мьлйакʼәтида, йе кӧ тʼәви мьн хәбәр дьда бона чапкьрьне ԛамишәки зерʼин һәбу, ԝәки бажер, дәргәһед ԝи у сура ԝи чап кә.

¹⁶Бажар чар гошә бу, дьрежайийа бажер ԝәкә бәрайийе бу. Әԝи бажар бь ԝи ԛамиши чап кьр, донздәһ һʼәзар мәйдан[122] дәркʼәт. Дьрежайи, бәрайи у бьльндайи ԝәкә һәв бун.

¹⁷Мьлйакʼәт сура бажер пе чапкьрьна мәрьвайе чап кьр, бьльндайийа ԝе бу сәд чьл чар зәнд[123].

¹⁸Әԝ сур жь кәвьре йаспис һатьбу чекьрьне у бажар хԝәха жь зерʼе хаси мина шушә зәлал бу[124].

¹⁹Һʼимед сура бажер бь һәр щурʼә кәвьред хасә ԛимәт һатьбунә хәмьландьне. Һʼиме пешьн йасписе сьпи бу, йе дӧда сафире шин, йе сьсийа халкедоне кʼәске вәкьри, йе чара зьмруде кʼәск,

²⁰йе пенща сардонуксе сор, йе шәша сардийоне соре тәʼри, йе һʼәфта кәвьре зерʼин, йе һʼәйшта зьмруде шин, йе нәһа топазе ԛичʼьк, йе дәһа хьрисопрасе кʼәск, йе йанздәһа йаԛуте ширк, йе донздәһа аместисе ширке вәкьри[125].

²¹Һәр донздәһ дәргәһ донздәһ дӧрʼ бун, һәр дәрик жь дӧрʼәки бу у мәйдана бажер жь зерʼе хаси мина шуше зәлал бу.

²²Мьн бажерда пʼарьстгәһ нәдит, чьмки Хӧдан Хԝәдейе Һʼәму Зорайийе у Бәрх пʼарьстгәһа ԝи нә.

²³Бажар нә һʼәԝще тәʼве у һиве бу кӧ рʼонайи бьдане, чьмки рʼумәта Хԝәде ԝи рʼонайи дькә у Бәрх чʼьра ԝи йә[126].

²⁴Мьләт ԝе рʼонайа ԝида бьгәрʼьн у пʼадшед дьнйайе ԝе рʼәԝш-рʼумәта хԝә биньнә нава ԝи[127].

²⁵Дәргәһед ԝи ԝе тʼӧ щар нәйенә гьртьне, чьмки ль ԝьр тʼьме ԝе рʼож бә, шәве тʼӧнәбә.

²⁶Ԝе рʼумәт у һӧрмәта мьләта биньнә нава ԝи.

²⁷Ԛәт тьштәки һʼәрам ԝе нәкʼәвә бажер, нә жи йед кӧ кʼьретийе у дәрәԝа дькьн ԝе бькʼәвьне, тʼәне әԝед кӧ кʼьтеба Бәрхейә жийинеда һатьнә ньвисаре[128].