Read Пәймана Ну (Инщил) Әʼйанти 22 Bible Online

Әʼйанти 22 - Пәймана Ну (Инщил) bible

Әʼйанти 22

¹Паше ԝи мьлйакʼәти чʼәмәки ава жийине, мина хьрустале зәлал нишани мьн кьр, кӧ жь тʼәхте Хԝәде у Бәрх дәрдькʼәт у нава мәйдана бажерва дькʼьшийа.

²Ль һәр дӧ алийед чʼем дара жийине[129] һәбу, кӧ донздәһ щурʼә бәр дани у һәр мәһ бәре хԝә дьда. Бәлгед ԝе даре бона ԛәнщбуна мьләта бун[130].

³Иди тьште ньфьрʼлебуйи ль ԝьр ԝе тʼӧнәбә. Тʼәхте Хԝәде у йе Бәрх ԝе нав бажерда бә у хӧламед Ԝи ԝе жерʼа хьзмәткʼарийе бькьн.

⁴Әԝе рʼуйе Ԝи бьбиньн у наве Ԝи ԝе ль сәр әʼнийа ԝан һәбә.

⁵Иди шәве ль ԝьр тʼӧнәбә, ԝе рʼонайа чʼьре у рʼойе кер нәйен, чьмки Хӧдан Хԝәде ԝе ль ԝан рʼонайи кә у һʼәта-һʼәтайе пʼадшатийе бькьн[131].

⁶Ԝи мьлйакʼәти мьнрʼа гот: «Әв хәбәрнә амьн у рʼаст ьн. Хӧдан Хԝәдейе кӧ Рʼӧһʼе Хԝә дьдә пʼехәмбәра[132], мьлйакʼәте Хԝә шанд, ԝәки тьштед кӧ ԝе зутьре бьԛәԝьмьн нишани хӧламед Хԝә кә».

⁷Иса дьбежә: «Ва йә Әзе зутьре бем. Хԝәзи ль ԝи, йе кӧ хәбәред пʼехәмбәртийед ве кʼьтебеда хԝәй дькә!»

⁸Мьн Йуһʼәнна әв йәкана бьһистьн у дитьн. У чахе мьн әԝ бьһистьн у дитьн, дәвәрʼу чумә ньге ԝи мьлйакʼәти, йе кӧ әв тьшт нишани мьн кьрьн, ԝәки сәре хԝә ль бәр ԝи дайньм.

⁹Ле әԝи мьнрʼа гот: «Ве йәке нәкә! Әз жи һәвал-хӧламәки мина тә у ԝан бьред тә пʼехәмбәра у ԝан һʼәмуйа мә, йед кӧ хәбәред ве кʼьтебе хԝәй дькьн. Сәре хԝә ль бәр Хԝәде дайнә».

¹⁰Сәрда жи мьнрʼа гот: «Хәбәред пʼехәмбәртийейә ве кʼьтебеда вәнәшерә, чьмки ԝәхт незик ә.

¹¹Әԝе кӧ нәһәԛийе дькә, бьра һе нәһәԛийе бькә, әԝе кӧ кʼьрет ә, бьра һе кʼьретийе бькә, әԝе кӧ рʼаст ә, бьра һе рʼастийе бькә у әԝе кӧ пироз ә, бьра һе пироз бә».

¹²Иса дьбежә: «Ва йә Әзе зутьре бем у хәлата Мьн дәсте Мьнда йә, ԝәки анәгори кьрьнед һәр йәки бьдьмә ԝи[133].

¹³Әз ьм Алфа у Омега, Йе Пешьн у Йе Пашьн, Дәстпебун у Ахьри».

¹⁴Хԝәзи ль ԝан, йед кӧ чӧхед хԝә шуштьнә[134], ԝәки изьна ԝан һәбә, жь бәре дара жийине бьхԝьн у дәргәһед бажеррʼа бькʼәвьнә һьндӧрʼ![135]

¹⁵Ле сә-кучʼьк, сербаз, бенамус, меркӧж, пʼутпʼарьст у һәр кәсе кӧ дәрәԝа һʼьз дькә у дәрәԝа дькә, әԝе дәрва бьминә.

¹⁶«Мьн, Иса, мьлйакʼәте Хԝә шанд, ԝәки шәʼдәтийа ван тьшта нава щьвинада бьдә. Әз Тамар у Рʼькʼьнйата Даԝьд ьм у Әз Стәйрка Шәԝԛә Сьбәһе Зу мә»[136].

¹⁷Рʼӧһʼ у бук дьбежьн: «Ԝәрә!» Әԝе кӧ дьбьһе бьра бежә: «Ԝәрә!» Әԝе кӧ тʼи йә бьра бе, әԝе кӧ ава жийине дьхԝазә бьра беһәԛ бьстинә[137].

¹⁸Әз шәʼдәтийе дьдьмә һәр кәсе кӧ хәбәред пʼехәмбәртийейә ве кʼьтебеда дьбьһе: Һәгәр йәк тьштәки сәр ванда зедә кә, Хԝәде жи ван бәлайед кӧ ве кʼьтебеда ньвисар ьн ԝе сәр ԝида зедә кә[138].

¹⁹У һәгәр йәк жь хәбәред пʼехәмбәртийейә ве кʼьтебеда тьштәки кем кә, Хԝәде жи ԝе пʼара ԝи жь дара жийине у жь Бажаре Пироз кем кә, бона кʼижана ве кʼьтебеда ньвисар ьн.

²⁰Әԝи кӧ шәʼдәтийа ван тьшта дьдә, дьбежә: «Бәле, Әзе зутьре бем». Амин! Ԝәрә, йа Хӧдан Иса.

²¹Кʼәрәма Хӧдан Иса һʼәмуйарʼа[139] бә.