Read Пәймана Ну (Инщил) Әʼйанти 5 Bible Online

Әʼйанти 5 - Пәймана Ну (Инщил) bible

Әʼйанти 5

¹Һьнге мьн дәсте Ԝийи рʼастеда, Йе кӧ ль сәр тʼәхт рʼуньштьбу, кʼьтебәкә гӧломатккьри дит кӧ һәр дӧ алийава һатьбу ньвисаре у бь һʼәфт мора һатьбу моркьрьне[25].

²Мьн дина хԝә дайе, ԝе мьлйакʼәтәки ԛәԝат бь дәнгәки бьльнд дьгот: «Кʼи һежа йә кӧ моред ве кʼьтебе же рʼакә у кʼьтебе вәкә?»

³Ле тʼӧ кәс тʼӧнәбу, нә ль әʼзмен, нә ль сәр әʼрде у нә жи жь бьне әʼрде, кӧ бькарьбуйа әва кʼьтеба вәкьра ле бьньһерʼийа.

⁴Әз жи кʼәлә-кʼәл дьгьрийам, кӧ йәки һежа нәһатә дитьне, ԝәки әԝ кʼьтеба вәкьра ле бьньһерʼийа.

⁵Һьнге жь рʼуспийа йәки мьнрʼа гот: «Нәгьри! Ва Шере жь ԛәбила Щьһуда, тамара Даԝьд сәркʼәт у дькарә һәр һʼәфт моред ԝе кʼьтебе же рʼакә у вәкә»[26].

⁶Һьнге мьн дина хԝә дайе, ԝе говәка ԝи тʼәхтида, кʼижан һәр чар рʼӧһʼбәр у рʼуспийа доре гьртьбун, Бәрхәк сәкьни бу, чаԝа кӧ сәржекьри бә. Һʼәфт стьруйед Ԝи у һʼәфт чʼәʼвед Ԝи һәбун, Әԝ һәр һʼәфт рʼӧһʼед Хԝәде нә, кӧ ль тʼәмамийа дьнйайе һатьнә шандьне[27].

⁷Әԝ һат у кʼьтеб жь дәсте Ԝийи рʼасте, Йе кӧ ль сәр тʼәхт рʼуньштьбу һьлда.

⁸Чахе Ԝи әԝ һьлда, әԝ һәр чар рʼӧһʼбәр у һәр бист чар рʼуспи ль бәр ԝи Бәрхи дәвәрʼуйа чун. Дәсте һәр йәкида чәнг у тʼасед зерʼинә тʼьжи бьхур һәбун. Әԝ бьхур дӧайед щьмәʼта Хԝәде нә[28].

⁹У стьранәкә ну дьстьран дьготьн: «Тӧ һежа йи, кӧ ԝе кʼьтебе һьлди у моред ԝе же рʼаки. Чьмки Тӧ һати сәржекьрьне у пе хуна хԝә Тә мәрьв жь һәр бәрәке, жь һәр зьмани, жь һәр щьмәʼте у жь һәр мьләти кʼьрʼин бона Хԝәде,

¹⁰Тә әԝ кьрьн пʼадшатийа кʼаһина бона хьзмәткʼарийа Хԝәде у әԝе ль сәр дьнйайе пʼадшатийе бькьн»[29].

¹¹Һьнге мьн дина хԝә дайе, мьн дәнге гәләк мьлйакʼәта бьһист кӧ дора тʼәхт, ԝан рʼӧһʼбәра у рʼуспийа гьртьбун. Рʼәԛәма ԝан дьгьһиштә бь һʼәзара у милийона.

¹²Бь дәнгәки бьльнд дьстьран дьготьн: «Әԝ Бәрхе сәржекьри һежа йә кӧ ԛәԝате, дәԝләмәндтийе, сәрԝахтийе, карине, һӧрмәте, рʼумәте у пәсьне бьстинә»[30].

¹³Мьн бьһист кӧ һәр әʼфьринед ль әʼзмен, ль сәр әʼрде, йед бьн әʼрде, йед бәʼреда у һʼәмуйед нава ԝанда, дьстьран: «Бьра һʼәта-һʼәтайе пәсьн, һӧрмәт, рʼумәт у ԛӧдрәт ль Йе сәр тʼәхт рʼуньшти, ӧса жи ль ԝи Бәрхи бә!»[31]

¹⁴У ԝан һәр чар рʼӧһʼбәра дьготьн: «Амин!» у рʼуспи дәвәрʼуйа чун, сәре хԝә бәр Ԝи данин.