Read Пәймана Ну (Инщил) Әʼйанти 6 Bible Online

Әʼйанти 6 - Пәймана Ну (Инщил) bible

Әʼйанти 6

¹Һьнге мьн дина хԝә дайе, ԝи Бәрхи морәкә жь ԝан һәр һʼәфт мора вәкьр у мьн жь ԝан һәр чар рʼӧһʼбәра дәнгәки мина дәнге гӧрʼинийа әʼԝра бьһист кӧ гот: «Ԝәрә».

²Мьн дина хԝә дайе, ва һәспәки боз хӧйа бу, дәсте йе лесийарбуйида тиркәванәк һәбу, тʼащәк ԝирʼа һатә дайине у әԝ чаԝа әʼгит чу, ԝәки сәркʼәвә.

³Чахе Бәрх мора дӧда вәкьр, мьн бьһист кӧ рʼӧһʼбәре дӧда гот: «Ԝәрә».

⁴Һьнге һәспәки дьнейи рʼәнге зәрда дәркʼәт[32] у сийаре ԝирʼа изьн һатә дайине, кӧ әʼдьлайийе жь дьнйайе һьлдә, ԝәки мәрьв һәвдӧ бькӧжьн. Шурәки мәзьн ԝирʼа һатә дайине.

⁵Чахе Ԝи мора сьсийа вәкьр, мьн бьһист кӧ рʼӧһʼбәре сьсийа гот: «Ԝәрә». Мьн дина хԝә дайе, ва һәспәки рʼәш у дәсте сийаре ԝида мезинәк һәбу.

⁶Һьнге те бежи мьн дәнгәк бьһист, жь нава һәр чар рʼӧһʼбәра һат у гот: «Чапәкә гәньмә бьчʼук пе зивәки у се чапед бьчʼук щәһ пе зивәки[33]. Ле зьраре нәдә зәйтʼе у шәраве».

⁷Чахе Ԝи мора чара вәкьр, мьн дәнге рʼӧһʼбәре чара бьһист кӧ гот: «Ԝәрә».

⁸Мьн дина хԝә дайе, ва һәспәки шиноԛи, кӧ наве сийаре ԝи Мьрьн бу, Дийаре Мьрийа пәй ԝи дьһат. Һʼӧкӧм ԝирʼа һатә дайине сәр пʼарәкә жь чар пʼаред дьнйайе, ԝәки пе шур, хәлайийе, нәхԝәшийа һʼал у рʼәʼԝьред дьнйайе ԝан бькӧжә.

⁹Чахе Ԝи мора пенща вәкьр, мьн бьн горигәһеда рʼӧһʼед ԝан мәрьва дитьн, йед кӧ бона Хәбәра Хԝәде у бона шәʼдәтийа кӧ дабун һатьбунә кӧштьне.

¹⁰Ԝан бь дәнгәки бьльнд кьрьнә гази у готьн: «Йа Хԝәйи-Хӧдане пироз у рʼаст! Те һʼәта кʼәнге диԝане нәки у һʼәйфа хуна мә жь бьнәлийед рʼубари дьне һьлнәди?»

¹¹Һьнге жь ԝан һәр йәкирʼа чӧхед чилә-ԛәрԛаш һатьнә дайине у ԝанрʼа һатә готьне, кӧ һьнәк ԝәхт жи һеса бьн, һʼәта кӧ һʼәсабе һәвал-хӧламед ԝан у хушк-бьред ԝанә кӧ ԝе мина ԝан бенә кӧштьне, тʼәмам бә.

¹²Чахе Ԝи мора шәша вәкьр, мьн дина хԝә дайе, әʼрд ԛайим һʼәжийа. Рʼо мина кʼӧрхе жь пьрʼчʼе чекьри рʼәш бу у һив сәрда-педа бу мина хуне[34].

¹³Стәйркед әʼзмен ӧса жорда кʼәтьнә әʼрде, чаԝа кӧ дара һежире жь бәр байе ԛайим дьһʼәжә у бәред ԝе[35] же дьԝарьн[36].

¹⁴Һьнге әʼзман бу мина кʼьтеба гӧломатккьри ль һәв һатә пʼечʼане, һьлкʼьшийа у һʼәму чʼийа у гьрав жь щийед хԝә һʼәжийан.

¹⁵Ԝи чахи пʼадшед дьнйайе, мәзьнед ԝе, сәрәскәред ԝе, дәԝләтийед ԝе, әʼгитед ԝе у һʼәму мәрьвед хӧлам у аза хԝә шкәфт у ԛәйед чʼийада вәшартьн[37],

¹⁶чʼийа у ԛәйарʼа дьготьн: «Сәр мәда бькʼәвьн у мә жь рʼуйе Ԝи вәшерьн, Йе кӧ ль сәр тʼәхт рʼуньшти йә, ӧса жи жь хәзәба Бәрх[38].

¹⁷Чьмки рʼожа хәзәба ԝанә мәзьн һат у кʼи дькарә тәйах кә?»[39]