Read Пәймана Ну (Инщил) Әʼйанти 7 Bible Online

Әʼйанти 7 - Пәймана Ну (Инщил) bible

Әʼйанти 7

¹Пәй ве йәкерʼа мьн дина хԝә дайе, ԝе чар мьлйакʼәт ль һәр чар ԛӧлбед дьнйайе сәкьни нә у байед һәр чар ԛӧлбед дьнйайе һʼьшк гьртьнә, ԝәки ль әʼрде, бәʼре у тʼӧ даре нәхьн[40].

²Һьнге мьн мьлйакʼәтәки дьн жи дит кӧ жь рʼоһьлате дьһат у мора ԝийә жь Хԝәдейе Сах һәбу. Әԝи бь дәнгәки бьльнд ль ԝан һәр чар мьлйакʼәта кьрә гази, йед кӧ ԝанрʼа һатьбу дайине, кӧ зьраре бьдьнә әʼрде у бәʼре, ԝанрʼа гот:

³«Зьраре нәдьнә әʼрде, бәʼре у дара, һʼәта кӧ әм море ль әʼнийа хӧламед Хԝәдейе хԝә нәхьн»[41].

⁴Һьнге рʼәԛәма йед кӧ һатьбунә моркьрьне мьн бьһист: Жь һʼәму ԛәбилед зарʼед Исраел сәд чьл чар һʼәзар һатьбунә моркьрьне.

⁵Жь ԛәбила Щьһуда донздәһ һʼәзар, жь ԛәбила Рʼубен донздәһ һʼәзар, жь ԛәбила Гад донздәһ һʼәзар,

⁶жь ԛәбила Ашер донздәһ һʼәзар, жь ԛәбила Нәфтәли донздәһ һʼәзар, жь ԛәбила Мьнашә донздәһ һʼәзар,

⁷жь ԛәбила Шьмһʼун донздәһ һʼәзар, жь ԛәбила Леԝи донздәһ һʼәзар, жь ԛәбила Исахар донздәһ һʼәзар,

⁸жь ԛәбила Зәбулон донздәһ һʼәзар, жь ԛәбила Усьв донздәһ һʼәзар у жь ԛәбила Бьнйамин донздәһ һʼәзар һатьбунә моркьрьне.

⁹Пәй ве йәкерʼа мьн дина хԝә дайе, ва әʼлаләтәкә ӧса мәзьн, кӧ тʼӧ кәси нькарьбу бьжьмарта жь һәр мьләти, жь һәр бәрәке, жь һәр щьмәʼте у жь һәр зьмани ль бәр тʼәхт у ԝи Бәрхи сәкьни бун. Чӧхед чилә-ԛәрԛаш ль ԝан бун у чʼьԛьлед хӧрма жи дәстед ԝанда бун,

¹⁰бь дәнгәки бьльнд дькьрьнә гази дьготьн: «Хьлазбун жь дәсте Хԝәдейе мә йә, Йе кӧ ль сәр тʼәхт рʼуньшти йә у жь дәсте ԝи Бәрхи йә».

¹¹Һьнге әԝ һʼәму мьлйакʼәтед кӧ ль дора тʼәхт, рʼуспийа у ԝан һәр чар рʼӧһʼбәра гьртьбун, бәр тʼәхт дәвәрʼуйа чунә әʼрде, сәре хԝә бәр Хԝәде данин

¹²у готьн: «Амин! Пәсьн, рʼумәт, сәрԝахти, шькьри, һӧрмәт, ԛәԝат у зорайи бьра һʼәта-һʼәтайе Хԝәдейе мәрʼа бә. Амин!»

¹³Һьнге жь ԝан рʼуспийа йәки мьнрʼа гот: «Әвед кӧ чӧхед чилә-ԛәрԛаш ԝәргьрти нә, әԝ кʼи нә у жь кʼӧ дәре һатьнә?»

¹⁴Мьн ԝирʼа гот: «Әз хӧлам, әз ньзаньм, тӧ зани». Һьнге әԝи мьнрʼа гот: «Әвана әԝ ьн, йед кӧ жь ԝе тәнгасийа мәзьн һатьнә, чӧхед хԝә пе хуна ԝи Бәрхи шуштьнә, чил-ԛәрԛаш кьрьнә[42].

¹⁵Ләма әԝә ль бәр тʼәхте Хԝәде нә, пʼарьстгәһа Ԝида шәв у рʼож Ԝи дьһʼәбиньн. Йе ль сәр тʼәхт рʼуньшти, ԝе коне Хԝә ль сәр ԝан вәгьрә.

¹⁶Әԝе иди нә тʼи бьн, нә бьрʼчи бьн у нә жи тәʼв у гәрмайийе ль ԝан хә[43].

¹⁷Чьмки әԝ Бәрхе кӧ говәка тʼәхтда йә, ԝе шьвантийе ль ԝан бькә, ԝан бьбә сәр канийед ава жийине. У Хԝәде жи ԝе һʼәму һесьред чʼәʼвед ԝан паԛьж кә»[44].