Read Kurumba, Kannada யோவானு 17 Bible Online

யோவானு 17 - Kurumba, Kannada bible

யோவானு 17

¹யேசு இதுகோளுன ஏளிதுக்கு இந்தால பானான அண்ணாந்து நோடி,

²“அப்பாவாத தேவரே, ஒத்து பந்துபுடுத்து, நீமு நிம்மு மகனியெ கொட்ட எல்லாரியெவு அவுரு ஏவாங்குவு பதுக்குவுது பதுக்குன கொடுவுக்காக நீமு எல்லா ஜனகோளு மேலைவு அவுரியெ அதிகாரான கொட்டுயித்தாரி. நீமு ஏசு மதுப்பாதவரு அம்புதுன நிம்மு மகா மூலியவாங்க ஜனகோளியெ வெளிபடுசுவுக்காக நீமு நிம்மு மகா ஏசு மதுப்பாதவரு அம்புதுன தோர்சுரி.

³நெஜவாத ஒந்தே தேவராத நிம்முனவு, நீமு கெளுசிதவராத யேசு கிறிஸ்துனவு தெளுகோம்புதுத்தா ஏவாங்குவு பதுக்குவுது பதுக்கு.

⁴நானு மாடுவுக்கு நீமு நனியெ கொட்ட கெலசான மாடிமுடிசிது மூலியவாங்க ஈ பூமில நிமியெ மதுப்புன கொட்டே.

⁵அப்பாவாத தேவரே, ஈ ஒலகான உண்டுமாடுவுக்கு முந்தால நிம்மொத்ர நனியெ இத்த மதுப்பு மாதர ஈகவு நிம்முகூட மதுப்பு இருவோனாங்க மாடுரி.

⁶நீமு ஒலகதுல இத்து தெளுதுயெத்தி நன்னொத்ர கொட்ட ஜனகோளியெ நிம்முன தெளுகோம்புக்கு மாடிதே. அவுருகோளு நிம்மு ஜனகோளாங்க இத்துரு. அவுருகோளுன நீமு நன்னொத்ர கொட்டுரி. அவுருகோளு நிம்மு மாத்துன கேளி நெடைத்தார.

⁷நீமு நனியெ கொட்டுது எல்லாவு நிம்முனாலத்தா பந்துத்து அந்து அவுருகோளு ஈக தெளுதுயித்தார.

⁸நீமு நனியெ கொட்ட மாத்துகோளுன நானு அவுருகோளியெ ஏளிதே. அவுருகோளு அதுன ஏத்துகோண்டு, நானு நிம்மொத்ர இத்து பந்தே அந்து நெஜவாங்கவே தெளுகோண்டுரு. நீமு நன்னுன கெளுசிரி அந்துவு நம்புத்தார.

⁹நானு அவுருகோளியாக வேண்டிகோத்தினி. ஒலகதுல இருவோரியாக வேண்டிகோலாங்க, நீமு நனியெ கொட்டோரியாக வேண்டிகோத்தினி. அவுருகோளு நிம்மு ஜனகோளாங்க இத்தாரையே.

¹⁰நன்னோடது எல்லாவு நிம்மோடதாங்க இத்தாத. நிம்மோடது நன்னோடதாங்க இத்தாத. இவுருகோளு நனியெ மதுப்புன கொட்டுயித்தார.

¹¹நானு இனிமேலு ஒலகதுல இருனார்ரே. ஆதர இவுருகோளு ஒலகதுல இத்தார. நானு நிம்மொத்ர பத்தினி; தும்ப சுத்தவாதவராங்க இருவுது அப்பாவாத தேவரே, நீமு நனியெ கொட்டுயிருவோரு நம்மு மாதர ஒந்தாங்க இருவுக்காக, நீமு நிம்மு பேரோட அதிகாரதுனால அவுருகோளுன காத்துகோரி.

¹²நானு அவுருகோளுகூட ஈ ஒலகதுல இருவாங்க, அவுருகோளுன நிம்மு பேரோட அதிகாரதுனால காத்துகோண்டே. நீமு நனியெ கொட்டோருன காத்துகோண்டு பந்தே[24]. தேவரோட மாத்து நெறெவேறுவுக்காக அழிவியாக இருவோனுத்தா கெட்டோதா. அவ ஒந்தொப்புன்ன தவர பேற ஒந்தொப்புருவு கெட்டோகுலா.

¹³ஈக நானு நிம்மொத்ர பத்தினி. அவுருகோளு நன்னு சந்தோஷான ஏ கொறெயுவு இல்லாங்க ஈசிகோம்புக்காக நானு ஒலகதுல இருவாங்கவே இதுகோளுன ஏளுத்தினி.

¹⁴நிம்மு மாத்துன நானு அவுருகோளியெ ஏளிதே. நானு ஈ ஒலகான சேந்தோனாங்க இருனார்து மாதர அவுருகோளுவு ஈ ஒலகான சேந்தோரு இல்லா. அதுனால ஒலகதுல இருவோரு அவுருகோளுன வெறுத்துத்தார.

¹⁵நீமு அவுருகோளுன ஈ ஒலகதுல இத்து எத்திகோரி அந்து வேண்டிகோலாங்க, அவுருகோளுன மோசவாதோனாத சாத்தானொத்ர இத்து காப்பாத்துரி அந்து வேண்டுத்தினி.

¹⁶நானு ஈ ஒலகான சேந்தோனாங்க இருனார்து மாதர அவுருகோளுவு ஈ ஒலகான சேந்தோரு இல்லா.

¹⁷நீமு நெஜவாத நிம்மு மாத்துனால அவுருகோளுன நிம்மு பார்வெல சுத்தவாதோராங்க இருவுக்கு மாடுரி. நிம்மு மாத்துத்தா நெஜவாததாங்க இத்தாத.

¹⁸நீமு நன்னுன ஈ ஒலகதொழக கெளுசிது மாதர, நானுவு அவுருகோளுன ஈ ஒலகதொழக கெளுசுத்தினி.

¹⁹நெஜவாத நிம்மு மாத்துனால அவுருகோளுன நிம்மொத்ர ஒப்படெசுவுக்காக, அவுருகோளியாக நானுவு நன்னுன நிமியெ ஒப்படெசுத்தினி.

²⁰நானு இவுருகோளியாக மட்டுவில்லாங்க இவுருகோளு ஏளுவுது மாத்து மூலியவாங்க நன்னு மேல நம்பிக்கெ மடகுவோரியாகவு வேண்டிகோத்தினி.

²¹அவுருகோளு எல்லாருவு ஒந்தாங்க இருவுக்குவு, அப்பாவாத தேவரே, நீமுத்தா நன்னுன கெளுசிரி அம்புதுன ஒலகதுல இருவோரு நம்புவுக்காக, நீமு நன்னுலைவு நானு நிம்முலைவு இருவுது மாதர அவுருகோளு எல்லாருவு நம்முகூட ஒந்தாங்க இருவுக்குவு வேண்டிகோத்தினி.

²²நாமு ஒந்தாங்க இருவுது மாதரயே அவுருகோளுவு ஒந்தாங்க இருவுக்காக நானு, நீமு நனியெ கொட்ட மதுப்புன நானு அவுருகோளியெ கொட்டே.

²³ஒந்தாங்க இருவுதுல அவுருகோளு தேறிதோராங்க இருவுக்காகவு, நீமு நன்னுன கெளுசிதுனவு, நீமு நன்னு மேல அன்பாங்க இருவுது மாதர அவுருகோளு மேலைவு அன்பாங்க இருவுதுனவு, ஈ ஒலகதுல இருவோரு தெளுகோம்புக்காக நானு அவுருகோளுலைவு, நீமு நன்னுலைவு இருவுக்கு வேண்டுத்தினி.

²⁴அப்பாவாத தேவரே, ஒலகான உண்டுமாடுவுக்கு முந்தாலயே நீமு நன்னு மேல அன்பாங்க இத்துதுனால நீமு நனியெ கொட்ட மதுப்புன, நீமு நனியெ கொட்ட ஜனகோளு நோடுவுக்காக, நானு எல்லி இத்தானோ அல்லி அவுருகோளுவு நன்னுகூட இருவுக்கு விரும்புத்தினி.

²⁵நேர்மெயாங்க இருவுது அப்பாவாத தேவரே, ஒலகதுல இருவோரு நிம்முன தெளுகோலா. நானு நிம்முன தெளுது இத்தவனி. நீமு நன்னுன கெளுசிதுன இவுருகோளுவு தெளுது இத்தார.

²⁶நீமு நன்னு மேல மடகித அன்புன அவுருகோளு மேல மடகுவுக்காகவு, நானுவு அவுருகோளுகூட ஐக்கியவாங்க இருவுக்காகவு, நீமு யாரு அம்புதுன அவுருகோளு தெளுகோம்புக்கு மாடிதே. இன்னுவு அவுருகோளு தெளுகோம்புக்கு மாடுவே” அந்தேளிரு.