Read Kurumba, Kannada கலாத்தியரு 4 Bible Online

கலாத்தியரு 4 - Kurumba, Kannada bible

கலாத்தியரு 4

¹நானு ஈ உதாரணா மூலியவாங்க இதுன இன்னுவு வெளக்கவாங்க ஏளுத்தினி. ஒந்தொப்புனோட அப்பா சத்தோததுக்கு இந்தால அவுனு அப்பனோட சொத்து எல்லாத்துலைவு அவுனியெ உரிமெ இத்துரிவுகூட அவ ஒந்து சின்னு கண்டாங்க இருவுது வரெக்குவு அவ ஒந்து அடிமெ மாதரயே இத்தான.

²அவுனோட அப்பா அவுனியெ மடகித காலா பருவுது வரெக்குவு அவுன்ன கவுனுசுவுக்குவு, அவுனோட சொத்துகோளுன நோடிகோம்புக்குவு இருவுது ஆளுகோளு ஏளுவுதுனத்தா அவ கேளி நெடைத்தான.

³ஈங்கேத்தா நாமுவு கிறிஸ்துன தெளுகோம்புக்கு முந்தால ஈ சின்னு மொகு மாதர ஈ ஒலகதுல இருவுது சாங்கியகோளியெ அடிமெகோளாங்க இத்துரி.

⁴நாமு தேவரோட மக்குளுகோளாங்க ஆவுக்காக நம்முன யூதமத சட்டகோளுல இத்து விடுதலெ மாடுவுக்காக

⁵தேவரு அவுரு முடுவுமாடித காலா பருவாங்க அவுரோட மகன்ன கெளுசிரு. அவுரு ஒந்து எங்கூசு மூலியவாங்க மனுஷனாங்க உட்டி, தேவரு மோசேயெ கொட்ட யூதமத சட்டகோளுன கேளி நெடைவோராங்க இத்துரு.

⁶ஈக நீமு தேவரோட மக்குளுகோளாங்க இருவுதுனால அவுரு மகனோட தும்ப சுத்தவாத ஆவியாதவருன நிம்மு[6] மனசொழக கெளுசிரு. ஆ தும்ப சுத்தவாத ஆவியாதவருத்தா நாமு தேவருன “அப்பா, நன்னு அப்பாவே” அந்து கூங்குவுக்கு மாடுத்தார.

⁷அதுனால இனிமேலு நீமு அடிமெகோளு இல்லாங்க அவுரோட மக்குளுகோளாங்க இத்தாரி. நீமு அவுரோட மக்குளுகோளாங்க இருவுதுனால அவுரு வாக்கு கொட்டு இருவுது எல்லாத்துக்குவு தேவரு நிம்முன உரிமெ இருவோராங்கவு மாடி இத்தார.

⁸நீமு நெஜவாத தேவருன தெளிலாங்க இருவுக்கு முந்தால சாமிகோளு அந்து நீமு மடகிகோண்டு இத்துதுன கும்புட்டுகோண்டு அதுகோளியெ நீமு அடிமெகோளாங்க இத்துரி.

⁹ஆதர ஈக நீமு நெஜவாத தேவருன ஏத்துகோண்டு இத்தாரி. அதுனபுட தேவரு நிம்முன அவுரோட மக்குளுகோளாங்க ஏத்துகோண்டு இத்தார. அப்பறா திருசிவு ஏக்க நீமு ஒந்துக்குவே பிரியோஜனவில்லாத ஈ ஒலகதுல இருவுது ஆ அள சாங்கியகோளுபடி நெடைவுக்குவு, அதுகோளியெ அடிமெகோளாங்க ஓவுக்குவு விரும்புத்தாரி?

¹⁰திருசிவு நீமு ஏக்க மனுஷரோட வழக்ககோளுபடி விசேஷவாத தினகோளுனவு, திங்களுகோளுனவு, காலகோளுனவு, வருஷகோளுனவு எல்லாத்துனவு மடகுத்தாரி?

¹¹நானு நிமியாக கஷ்டபட்டு கெலசமாடிது எல்லாவு வீணாங்க ஓய்புடுத்தோ அந்து அஞ்சுத்தினி.

¹²கூடவுட்டிதோரு மாதரயிருவோரே, நானு ஆ அள சாங்கியகோளுன புட்டுகோட்டு இருவுது மாதர நீமுவு நன்னு மாதர ஆகுரி அந்து நிம்முன கெஞ்சிகேளுத்தினி. ஏக்கந்துர நானுவு யூதமத சட்டகோளு இருனார்த யூதரல்லாத பேற ஜனகோளாத நிம்மு மாதர ஆயோதே. நீமு நனியெ ஏ அநியாயவு மாடுலாங்க நன்னுன தும்ப சென்னங்க நோடிகோண்டுரி.

¹³நிமியெ தெளுது இருவுது மாதர, நானு மொதலு தடவெ நிமியெ கிறிஸ்துன பத்தித ஒள்ளிமாத்துன ஏளிகொடுவுக்கு நிம்மொத்ர பருவாங்க தும்ப பெலா இல்லாதோனாங்க இத்தே.

¹⁴நானு ஆங்கே பெலா இல்லாதோனாங்க இத்துது நிமியெ தும்ப கஷ்டான கொண்டுகோண்டு பந்து இத்துரெகூட, நீமு நன்னுன வெறுத்து ஒதுக்குலா. ஆதர நீமு நன்னுன தேவரொத்ர இத்து பந்த ஒந்து தூதாளு மாதரைவு, கிறிஸ்து யேசு மாதரைவு ஏத்துக்கோண்டுரி.

¹⁵ஆக நீமு நன்னு மேல மடகியித்த தும்ப சந்தோஷா ஈக எல்லியோத்து? முடுஞ்சுரெ நிம்மு கண்ணுகோளுனகூட கித்து நனியாக கொட்டு இருவுரி அந்து நானு நிம்முன பத்தி சாச்சி ஏளுத்தினி.

¹⁶நானு நெஜவாங்க இருவுதுன ஏளிகொட்டுதுனாலயா ஈக நிமியெ எதுராளியாங்க ஆயோதே?

¹⁷நெஜவில்லாங்க இருவுதுன நிமியெ ஏளிகொடுவோரு நிம்மு மேல அக்கறெ இருவோரு மாதர இத்தார. ஆதர அவுருகோளு நிம்மு ஒள்ளிதுக்காக ஆங்கே நெனசுவுது இல்லா. அவுருகோளு நீமு நன்னுன புட்டுகோட்டு அவுருகோளு ஏளுவுதுன மட்டுவே கேளுபேக்கு அந்து விரும்புத்தார.

¹⁸ஆங்கே அவுருகோளு நிம்மு ஒள்ளிதுக்காக நிம்மு மேல அக்கறெ மடகி இத்துரெ அது ஒள்ளிதுத்தா. ஆங்கே இருவுது ஆர்வா நானு நிம்முக்கூட இருவாங்க மட்டுவு இல்லாங்க, ஏவாங்குவு இருபேக்கு.

¹⁹நன்னு மக்குளுகோளு[7] மாதர இருவோரே, கிறிஸ்துவோட கொணகோளு நிம்மொழக பருவுது வரெக்குவு, ஒந்து எங்கூசு மொகு எருவுது கஷ்டான அனுபவுசுவுது மாதர நானு திருசிவு நிமியாக ஈங்கே கஷ்டான அனுபவுசுத்தினி.

²⁰நீமு ஏக்க ஈங்கே மாடிரி அந்து நனியெ கொழப்பவாங்க இத்தாத. அதுனால நிம்முகூட பேற மாதர மாத்தாடுவுக்காக ஈக நானு நிம்முகூட இருவுக்கு தும்ப விரும்புத்தினி.

²¹நனியெ ஏள்ரி; யூதமத சட்டகோளுன கேளி நெடைவுக்கு விரும்புவோராத நிமியெ ஆ சட்டகோளு ஏனு ஏளுத்தாத அந்து தெளிலவா? நானு ஏளுத்தினி.

²²ஆபிரகாமியெ எரடு மகனுகோளு இத்துரு அந்து எழுதி இத்தாத. ஒந்தொப்பா அடிமெயாங்க இத்த ஆகாரொத்ர உட்டிதா. இன்னொந்தொப்பா அடிமெயாங்க இருனார்த அவுனோட இன்று சாராளொத்ர உட்டிதா.

²³அடிமெயாங்க இத்தோளொத்ர உட்டித ஆ மகா, மனுஷரோட திட்ட மாதர உட்டிதா. ஆதர அடிமெயாங்க இருனார்தோளொத்ர உட்டித மகா தேவரு ஆபிரகாமியெ கொட்ட வாக்குபடி உட்டிதா.

²⁴நாமு இதுன ஒந்து உதாரணக்கு ஏளுவுது கதெயாங்க எத்திகோம்பேக்கு. ஈ எரடு எங்கூசுகோளுவு எரடு ஒப்பந்தகோளியெ அடெயாளவாங்க இத்தார. தேவரு இஸ்ரவேலு ஜனகோளொத்ர சீனாயி பெட்டதுல மாடித ஒப்பந்தா ஆகாரு மாதர இத்தாத. இது தேவரு மோசேயொத்ர கொட்ட சட்டகோளுத்தா. ஈ சட்டகோளுபடி நெடைவோரு ஆகாரு மாதர அடிமெயாங்க இத்தார.

²⁵ஆகாரு அரேபியா தேசதுல இருவுது சீனாயி பெட்டக்கு ஒப்பாங்க இத்தாள. ஈ ஆகாரு ஈக இருவுது எருசலேமு பட்டணக்குவு ஒப்பாங்க இத்தாள. ஆகாருவு அவுளு மக்குளுகோளுவு அடிமெயாங்க இருவுது மாதர, மோசேயோட சட்டகோளுபடி நெடைவோருவு ஆ சட்டகோளியெ அடிமெயாங்க இத்தார.

²⁶ஆதர ஆபிரகாமோட இன்று சாராளு ஒந்து அடிமெ இல்லா. அவுளு சொர்கதுல இருவுது எருசலேமியெ ஒப்பாங்க இத்தாள. நாமு மோசேயோட சட்டகோளியெ அடிமெயாங்க இருனார்துனால அவுளு நம்மு எல்லாரியெவு அவ்வெயாங்க இத்தாள.

²⁷ஏக்கந்துர, “மலடியாங்க இருவுது எங்கூசே, மொகுன எருலாங்க இருவோளே, நிய்யி சந்தோஷவாங்க இரு; மொகு உட்டுவுது கஷ்டான அனுபவுசுனார்தோளே, நிய்யி தும்ப சந்தோஷவாங்க சத்தவாக்கு; ஏக்கந்துர கண்டா இருவுது எங்கூனபுட, கண்டா புட்டுகோட்டு ஓத அனாதெயாங்க இருவுது எங்கூசியெத்தா தும்ப மக்குளுகோளு இத்தார.” அந்து தேவரோட மாத்து எழுதி இருவுது புஸ்தகதுல எழுதி இத்தாத.

²⁸கூடவுட்டிதோரு மாதரயிருவோரே, தேவரு கொட்ட வாக்குபடி நாமு அவுரோட மக்குளுகோளாங்க இருவுதுனால நாமு தேவரு ஆபிரகாமியெ கொட்ட வாக்குபடி உட்டித ஈசாக்கு மாதர இத்தவரி.

²⁹ஆ காலதுல, மனுஷரோட திட்டா மாதர உட்டித ஆபிரகாமோட மகா இஸ்மவேலு, தேவரு ஆபிரகாமியெ கொட்ட வாக்குபடி உட்டித அவுனோட மகா ஈசாக்குன கஷ்டபடுசிதா. அதே மாதரத்தா ஈகவு நெடைத்தாத. தும்ப சுத்தவாத ஆவியாதவரோட விருப்பபடி நெடைவுது நம்முன மோசே கொட்ட சட்டகோளுபடித்தா நெடைபேக்கு அந்து ஏளுவோரு கஷ்டபடுசுத்தார.

³⁰ஆதர தேவரோட மாத்து எழுதி இருவுது புஸ்தகா ஏனு ஏளுத்தாத? “அடிமெயாத எங்கூசுனவு, அவுளோட மகன்னவு தொரத்திபுடு. ஏக்கந்துர அடிமெயாங்க இருவுது எங்கூசோட மகா, அடிமெயாங்க இருனார்த எங்கூசோட மகனுகூட உரிமெ சொத்துல பங்கு ஈசுவுக்கு முடுஞ்சுனார்து.”

³¹அதுனால கூடவுட்டிதோரு மாதரயிருவோரே, நாமு அடிமெயாத ஆகாரோட மக்குளுகோளு இல்லா. ஆதர நாமு அடிமெயாங்க இருனார்த சாரளோட மக்குளுகோளாங்க இத்தவரி.