Read Kurumba, Kannada எபேசியரு 2 Bible Online

எபேசியரு 2 - Kurumba, Kannada bible

எபேசியரு 2

¹நீமு தேவரு கொட்ட கட்டளெகோளுன கேளி நெடைலாதுனாலைவு, பாவகோளுன மாடிதுனாலைவு தேவரோட காரியகோளியெ சத்தோதோரு மாதர இத்துரி. ஆதர தேவரு நிம்முன உசுரோட எத்துருசிரு.

²ஆவொத்திய நீமு ஈ ஒலகதோட பழக்கவழக்கோளுபடி மாடிகோண்டு இத்துரி. பானதுல இருவுது கெட்ட ஆவிகோளோட அதிகாரி[2] ஏளுவுது மாத்துன கேளிநெடது பந்துரி. ஈக ஆ அதிகாரி தேவரு மாத்துன கேளி நெடைனார்தோருன ஆட்சிமாடுத்தான.

³முந்தால நாமு எல்லாருவு ஈ நெலெமெலத்தா இத்துரி. நம்முன பாவமாடுவுக்கு தூண்டுவுது கொணா விரும்புவுது மாதர நெடது, நம்மு மைய்யிவு, மனசுவு, விரும்பிது எல்லாத்துனவு மாடிரி. அதுனால நாமு எல்லாருவு மத்தோரு மாதரயே தேவரோட தொட்டு கோப்பக்கு ஆளாதுரி.

⁴ஆதர தேவரு தும்ப எரக்கவாதவரு. அவுரு நம்மு மேல தும்ப அன்புமடகி இத்தார.

⁵நாமு மாடித பாவகோளுனால தேவரோட காரியகோளுல சத்தோதோரு மாதரயித்த நம்முன தேவரு கிறிஸ்துன உசுரோட எத்துருசிது மாதர அவுருகூட உசுரோட எத்துருசிரு. அவுரு நிம்மு மேல தோர்சித கருணெனால மட்டுவே நிம்முன காப்பாத்திரு.

⁶அவுரு கிறிஸ்து மூலியவாங்க நம்மு மேல மடகித எரக்காவு, அளைவுக்கு முடுஞ்சுனார்த அவுரோட கருணெயுவு ஏசு தொட்டுது அந்து இனி பருவுது காலதுல சென்னங்க தெளிவுக்காக

⁷கிறிஸ்து யேசுகூட ஐக்கியவாங்க இருவுது நம்முனவு தேவரு கிறிஸ்துகூட உசுரோட எத்துருசி அவுருகூட சொர்கதுல ஒசரவாத எடகோளுல குத்துயிருவுக்கு மடகிரு.

⁸நீமு அவுரு மேல மடகித நம்பிக்கெ மூலியவாங்க அவுரு நிமியெ தோர்சித ஆ கருணெனால நிம்முன பாவதோட தண்டனெல இத்து காப்பாத்திரு. இது நீமு மாடித ஏ ஒள்ளிதுனாலைவு இல்லா. இது தேவரு நிமியெ கொட்ட கிப்டு.

⁹அவுது, இது நீமு மாடித ஏ ஒள்ளி காரியதுனாலைவு இல்லா. அதுனால இதுன பத்தி ஒந்தொப்புருவு பெருமெபடுவுக்கு முடுஞ்சுனார்து.

¹⁰நாமு மாடுபேக்கு அந்து தேவரு முந்தாலயே தயாருமாடி இத்த ஒள்ளி காரியகோளுன மாடுவுக்காக தேவரு கிறிஸ்து யேசு மூலியவாங்க நமியெ ஒச பதுக்குன கொட்டுயித்தார.

¹¹அதுனால நீமு முந்தால காலதுல இத்த நெலெமென நெனசி நோடுரி. மனுஷரு மூலியவாங்க அவுருகோளு மைய்யில சுன்னத்து மாடிகோண்டு இத்த யூதருகோளு[3] உட்டுவாங்க யூதரல்லாத பேற ஜனகோளாங்க உட்டித நிம்முன சுன்னத்து மாடுனார்தோரு அந்து கேலியாங்க மாத்தாடுத்தார.

¹²ஆ காலதுல நிமியெ கிறிஸ்துவொத்ர ஏ ஒறவுவு இல்லாங்க இத்துதுனால நீமு தேவரு தெளுகோண்ட ஜனகோளாத இஸ்ரவேலருன சேருனார்தோராங்கவு, தேவரு அவுருகோளியெ கொட்டுயித்த வாக்குகோளியெ உரிமெ இருனார்தோராங்கவு, ஏ நம்பிக்கெயுவு இருனார்தோராங்கவு, ஈ ஒலகதுல தேவரு இல்லாதோராங்கவு இத்துரி.

¹³ஆதர ஒந்து காலதுல ஆங்கே தேவருனபுட்டு தூரவாங்க இத்த நிம்முன கிறிஸ்து நிமியாக செல்லித நெத்ரது மூலியவாங்க தேவரு ஈக அவுரொத்ர கொண்டுகோண்டு பந்துயித்தார.

¹⁴ஏங்கந்துர சமாதானக்கு காரணவாங்க இருவுது அவுரே ஈ எரடு ஜனகோளுனவு பிருசி இத்த பகெ அம்புது கோடென ஒடது அவுருகோளுன ஒந்தே ஜனகோளாங்க மாடிரு.

¹⁵ஈங்கே அவுருகோளுன பிருசித கோடெ மாதரயிருவுது யூதமத சட்டகோளுனவு, அதோட சாங்கியகோளுனவு அழுசி எரடு ஜனகோளுனவு அவுருகூட ஐக்கியவாதோராங்க மாடி ஒந்து ஒச ஜனகூட்டவாங்க மாடிரு.

¹⁶கிறிஸ்து சிலுவெல சத்தோதது மூலியவாங்க ஈ எரடு ஜனகோளியெ இத்த பகென அழுசி அவுருகோளுன ஒந்தே மைய்யி மாதர மாடி அவுருகோளுன தேவரியெ சிநேகிதராங்க மாடிரு.

¹⁷கிறிஸ்து பந்து, தேவருனபுட்டு தூரவாங்க இத்த யூதரல்லாத நீமுவு, அவுரியெ ஒத்ர இருவுது யூதருகோளுவு சமாதானவாங்க இருவுக்கு மாடுவுது ஒள்ளிமாத்துன ஏளிரு.

¹⁸அதுனால கிறிஸ்து மூலியவாங்க நாமு எரடு ஜனகோளுவு ஒந்தே ஆவியாதவருனால அப்பாவாத தேவரொத்ர பருவுக்கு முடுஞ்சுத்தாத.

¹⁹அதுனால நீமு இனிமேலு தேவரியெ தெளினார்த ஆளுகோளாங்கவு, பேற எடதுல இத்து பந்த ஜனகோளாங்கவு இருலாங்க அவுரோட ஜனகோளாங்கவு அவுரோட குடும்பதுல இருவோராங்கவு இத்தாரி.

²⁰தேவரோட ஜனகோளாத நீமு ஒந்து கட்டடா மாதர இத்தாரி. கிறிஸ்து யேசுத்தா ஆ கட்டடதோட தலெகல்லாங்கவு, அவுரோட விசேஷவாத தூதாளுகோளுவு, தேவரு மாத்துன ஏளுவோருவு அதோட அஸ்திபாரவாங்கவு இத்தார.

²¹ஆ கட்டடான ஆண்டவரியெ ஒந்து தும்ப சுத்தவாத குடியாங்க மாடுவுக்கு கிறிஸ்து அதோட பாககோளுன அவுரு மூலியவாங்க ஒந்தாங்க சேர்சுத்தார.

²²நீமு கிறிஸ்துகூட ஐக்கியவாங்க இருவுதுனால தேவரோட ஆவியாதவரு பதுக்குவுது ஆ கட்டடகூட நிம்முனவு சேர்சி கட்டுத்தார.