Read Kwanga Hipuru 1 Bible Online

Hipuru 1 - Kwanga bible

Hipuru 1

¹Imbihumbwa Gotri nui metele leni ele wunu ri ondiyasiro gisi ki ele ba fo ba fo sumbu ki Gotri mwanji bwarakarandaro hima lei takisopo tiki mwanji miyafo ri bwandaro.

²Woroti apa do gisi oti gisi jipe ti kamindache ya dawani Gotri ri Che ri takisopo tiki bwasiro mwanji ti apa do ya nu mendinda. Gotri ri Che tapa rihi tiki do nuwe ri wosiro. Wosini rini ondiyasiro ti, ele mwaꞌambwe tinda rihi ri na kinani.

³Gotri lindana naha sini dau hinga ri Che ri nunu keke o hingambwa ri dau. Rini funda Gotri naha hinga. Ri mwanji ti kwambu tinga dawani o mwanji ni ele mwaꞌambwe hinga tinda ete sirinandau. Rini kapwa sumbu rani ri rumbwendau tau rihi ti ri humbusini kari kau Gotri Apukolaka ri tapa mama tokwe ya ri lininda. Gotri Che ensel leni dikindau

⁴Ka hi ri Yapai rini uchasiro ti, ensel leni uchasiro hi tini dikisindau. Wosiwani rini ensel leni dikisiwani wunu ri tako tokwe wu dau.

⁵Hinde wowani, injelembwa Gotri ka hinga sawero,“Mini ai che naha. Apambwa naha mini a raro.” Wosini ri ai sawe,“Ani ri yapai naha a sirawa rini ai che naha ri dano.” Woroti ele ensel ni o mwanji hinga fo ri sawe nambwe, mina.

⁶Ri Che funda naha ri do nuwe ki ri rawakakoni rini ni ya ri sawe,“Ele Gotri ensel hinga hi rihi tumbwa sa wu rasai.”

⁷Wosini ensel ele ni ka hinga ya wunu ri sawe,“Rini ele ri ensel leni ri wosiwani wui ichiꞌucha ti ausuwa sindau hinga.Rini ele ri tau ra himache ni ri wosiwani wu randau tau ti hi hinga wu undau.”

⁸Woroti Gotri Che ni ka hinga ya ri sawe,“O Gotri ahi, mini ete da ete da King Apukolaka.Mini sumbu kipe naha tunumbwa mi sirinani apa ele mwaꞌambwe tinda ete mi aulindano.

⁹Mini sumbu kipe naha kekembwa mi wondani ele kapwa sumbu ni mi diyahandau.O sumbu hinga ti keke Gotri, o mi Gotri naha, rindo rihi mini nani ri ondiyasiwani eripeꞌaripe sumbu ti mini ki miyafo naha sukwaro.O hinga keke mi nau le wui eripeꞌaripe sumbu ti mi eripeꞌaripe sumbu hinga hinde apa wu toro kumbwa.”

¹⁰Wosini o hingambwa rini ai sawe,“Apukolaka, injelembwa do nuwe mi wosisiwani kwambu naha ete dau, e, niri ti okwe mi tapa tiki mi wosiro.

¹¹Woroti niri tinga nuwe tinga nikaꞌari simba hinga yini humbuno. Mini mina. Mini ete mi dano.

¹²Wosiwa hima to nikaꞌari simba tini lepehendau hinga mi toroni mi lepeheno.Wosini nikaꞌari ako ni ai injindau hinga nuwe tinga niri tinga o hingambwa mi wosino.Woroti, mini apa hinde mi ha kumbwa, o mi dau hinga ete mi dano. Gisi mihi ti okwe hinde apa humbu kumbwa.”

¹³E, injelembwa Gotri ete sawero,“Mini ai tapa mama tokwe ma liti. Wowa ichai ele mi miho hima le a wosiwa mi seke tako tokwe wu dano.” Woroti do mwanji Gotri ensel forini ri sawe nambwe. Mina.

¹⁴Ensel le wunu hima minde hinga mina, wunu himamwale. Wunu Gotri tau tini wu randau. Gotri to wunu rumbwewani wu ini ele ri ai rata ki hambwandau sembe ha hima leni wu okulandau.