Read LAYIDUKURA MATIYO 11 Bible Online

MATIYO 11 - LAYIDUKURA bible

MATIYO 11

¹Yezu y'o ladili di a ka kalanden tan ni fila ma ka ban tuma min na, a bɔra yen ka taa mɔgɔw waaju k'u kalan gɛrɛfɛ duguw la.

²O waati la, Zan batizelikɛla tun bɛ kaso la. A ye Yezu ka koo kɛtaw kibaru mɛn minkɛ, a y'a ka kalanden dɔw ci,

³k'a nyininga ko: “Ala ka Mɔgɔ wolomanin min ka kan ka na, ele lo wa, walima an ka kan ka dɔ wɛrɛ makɔnɔ?”

⁴Yezu y'u jaabi ko: “Aw bɛ min mɛnna, an'aw bɛ min yera, aw ye taa o lakali Zan ye.

⁵Finyɛntɔw bɛ yeli kɛra, nanbaranw bɛ taamana, kunatɔw bɛ kɛnɛyara, tulogwerenw bɛ mɛnni kɛra, suuw bɛ kununna, kibaru diman bɛ fɔra faantanw ye.

⁶Ni mɔgɔ min ma tigɛ ne la, o tigi ye dubaden ye.”

⁷Zan ka kalandenw kɔsegira ka taa tuma min na, Yezu y'a daminɛ ka kuma jama fɛ Zan koo la. A y'u nyininga ko: “Aw tun taara mun le filɛ kongo kɔnɔ? Fɔnyɔ bɛ waga min lamaga wa?

⁸N'aw ma taa o filɛ, o tuma na, mɔgɔ min bɛ dakamana fani don, aw taara ale le filɛ wa? Nga, mɔgɔ minw bɛ dakamana fani don, olu bɛ sɔrɔ masaluw le kɔnɔ.

⁹Aw taara mun filɛ sa? Kira lo wa? Tinyɛ na, ne b'a fɔ aw ye ko a tɛmɛna kira yɛrɛ kan.

¹⁰Bari ciden min koo fɔra Ala ka kuma na, o ciden nin ye Zan ye. A fɔra Ala ka kuma na ko: ‘Lamɛnni kɛ, ne Ala bɛna n ka ciden ci i nya k'i ka sira labɛn.’

¹¹“Tinyɛ na, ne b'a fɔ aw ye ko mɔgɔ si ma wolo dinyɛ na min kɛra mɔgɔba ye ka tɛmɛ Zan batizelikɛla kan. Nga Sankolo tigi ka mara kɔnɔ, mɔgɔ min lɔyɔrɔ ka dɔgɔ n'u bɛɛ ye, o tigi ka fisa ni Zan ye.

¹²K'a ta Zan ka waajuli kɛtuma ma fɔɔ ka na se bii ma, mɔgɔ bɛɛ bɛ jijara ka donyɔrɔ sɔrɔ sankolo tigi ka masaya yɔrɔ la. Ni mɔgɔ minw jijara, olu le bɛna don yen.

¹³Musa ni kiraw bɛɛ kumana sankolo tigi ka masaya koo la fɔɔ ka na se Zan ka waati ma.

¹⁴N'aw b'a fɛ k'o faamu, u tun y'a fɔ ko Eli min bɛna segi ka na, Zan ye o Eli nin le ye.

¹⁵Ni min b'a fɛ ka mɛnni kɛ, o k'a tulo malɔ ka nya.

¹⁶Bii mɔgɔw bɔnin bɛ jon fɛ? U bɔnin bɛ denmisɛn dɔw fɛ minw siginin bɛ kɛnɛba la, ka to k'u kaan sama nyɔgɔn ma ko:

¹⁷‘Anw ye fɔli kɛ aw ye, aw ma dɔɔn kɛ. Anw ye sanga dɔnkili la, aw ma kasi fana.’

¹⁸“N b'o fɔ bari Zan nana, a tɛ dumuni kɛ, a tɛ dɔrɔ min, mɔgɔw ko faa b'a la.[3]

¹⁹Mɔgɔ Dencɛ nana, a bɛ dumuni kɛ, a bɛ dɔrɔ min, mɔgɔw ko a nugu ka bon, ko a ye dɔrɔtɔ ye. U ko wusuruminɛlaw ni kojugukɛla wɛrɛw teri lo. Nga, nafa min sɔrɔla Ala ka baara la, o b'a ka hakilitigiya yira.”

²⁰O kɔ, Yezu y'a ka kabako caaman kɛ dugu minw kɔnɔ, a y'a daminɛ ka kumajugu fɔ o dugu mɔgɔw ma, bari u ma nimisa ka faran u ka kojuguw la. A ko:

²¹“Aw Korazɛnkaw ni Bɛtisayidakaw, bɔnɛ bɛna kɛ aw ta ye, bari ne ye kabako minw kɛ aw fɛ, ni olu tun kɛra Tirikaw ni Sidɔnkaw fɛ, bii tun y'a sɔrɔ u ye dusukasifani don u kaan na, ka bugurigwɛ mɔ u yɛrɛ la k'a yira k'u bɛ nimisara ka faran u ka kojuguw la.

²²O le y'a to ne b'a fɔ aw ye ko Ala bɛna dinyɛ mɔgɔw kiti loon min na, Tirikaw ni Sidɔnkaw ka tɔɔrɔ bɛna nɔgɔya ka tɛmɛ aw ta kan.

²³Aw Kafaranamukaw, aw bɛ miiri ko aw ka dugu bɛna taa nya wa? Abada! A bɛna halaki pewu. Bari ne ye kabako minw kɛ aw fɛ, ni olu tun kɛra Sodɔmu dugu kɔnɔ, bii tun bɛn'a sɔrɔ n'a bɛ yen.

²⁴O kama, ne b'a fɔ aw ye ko Ala bɛna dinyɛ mɔgɔw kiti loon min na, Sodɔmukaw ka tɔɔrɔ bɛna nɔgɔya ka tɛmɛ aw ta kan.”

²⁵O waati la, Yezu y'a fɔ ko: “Ne bɛ barika la i ye n Faa, sankolo ni dugukolo ka masa, bari i ye koo minw dogo lɔnnikɛlaw ni hakilitigiw la, i ye olu yira kolɔnbaliw la.

²⁶I y'o kɛ ten bari a diyara i ye tinyɛ na.”

²⁷O kɔ, a y'a fɔ mɔgɔw ye ko: “N Faa Ala ye sebagaya bɛɛ di ne ma. Mɔgɔ si tɛ Dencɛ lɔn n'a Faa dɔrɔn tɛ. Mɔgɔ si tɛ Faa fana lɔn fɔɔ Dencɛ kelenpe. Ni Dencɛ b'a fɛ ko mɔgɔ min k'a Faa lɔn, o tigi bɛn'a lɔn.

²⁸“Aw minw nii tɔɔrɔnin lo, ni sɛgɛn b'aw kan, aw ka na ne fɛ, ne bɛna lafiya di aw ma.

²⁹Aw ka kɛ ne ka kalandenw ye[4], bari ne sabalinin lo, n tɛ mɔgɔ si dɔgɔya fana. N'aw sɔnna ne ka kuma ma, aw bɛna lafiya sɔrɔ,

³⁰bari ne tɛna jɔnya ni sɛgɛn gwiliman la aw kan.”