Read LAYIDUKURA MATIYO 12 Bible Online

MATIYO 12 - LAYIDUKURA bible

MATIYO 12

¹Loon dɔ, Yezu n'a ka kalandenw tun bɛ tɛmɛna forow dɔw kɔnɔ. Lafinyɛlon tun lo. Kɔngɔ tun b'a ka kalandenw na. O la, u y'a daminɛ ka suman tigɛtigɛ ka to k'o nyimi.

²Farizinyɛw y'o ye minkɛ, u y'a fɔ Yezu ye ko: “A filɛ, koo min daganin tɛ lafinyɛlon na, i ka kalandenw b'o kɛra.”

³Yezu y'u jaabi ko: “Kɔngɔ tun ye Dawuda n'a teriw minɛ loon min na, u ye koo min kɛ, aw m'o kalan ka ye Ala ka kuma na wa?

⁴Buru minw maranin tun bɛ Ala ye, u donna Ala ka soo kɔnɔ ka olu nyimi, k'a sɔrɔ mɔgɔ wɛrɛ man kan k'o nyimi ni sarakalasebagaw dɔrɔn tɛ.

⁵Aw m'a kalan ka ye sariya sɛbɛ kɔnɔ wa, ko sarakalasebagaw bɛ baara kɛ Alabatosoba kɔnɔ lafinyɛlon, k'a sɔrɔ u tɛ jalaki fana.

⁶Ne b'a fɔ aw ye ko mɔgɔ bɛ yan min ka fisa ni Alabatosoba ye.

⁷Ala y'a fɔ a ka kuma na ko: ‘N b'a fɛ aw ka makari nyɔgɔn na le, nga n t'aw ka sɔnnifɛnw fɛ.’ N'aw tun b'o kɔrɔ lɔn, mɔgɔ minw ma kojugu kɛ, aw tun tɛna sariya boli olu kɔɔ kan,

⁸bari Mɔgɔ Dencɛ ye lafinyɛlon kuntigi ye.”

⁹Yezu bɔra o yɔrɔ la ka taa don Alabatoso dɔ kɔnɔ.

¹⁰Cɛɛ tigɛ janin dɔ tun bɛ mɔgɔw cɛma yen. Mɔgɔ dɔw ye Yezu nyininga ko: “A daganin bɛ mɔgɔ ka banabagatɔw kɛnɛya lafinyɛlon na wa?” U y'a nyininga o la bari u tun b'a fɛ k'a minɛ sababu sɔrɔ.

¹¹Yezu y'u jaabi ko: “Ni saga kelen bɛ aw dɔ fɛ, n'o saga benna kɔlɔn kɔnɔ lafinyɛlon na, o tigi tɛn'a bɔ wa?

¹²Mɔgɔ ka fisa ni saga ye kosɛbɛ. O kama, a bɛnnin lo mɔgɔ ka konyuman kɛ mɔgɔ ye lafinyɛlon na.”

¹³Yezu sɔrɔla k'a fɔ cɛɛ tigɛjanin ye ko a k'a tigɛ jan. A y'a jan, a kɛnɛyara ka kɛ i n'a fɔ tɔ kelen nin bɛ cogo min na.

¹⁴Farizinyɛw bɔra ka taa nyɔgɔn ye ka Yezu fagacogo nyini.

¹⁵Yezu bɔra Farizinyɛw ka koo nin kala ma minkɛ, a bɔra o yɔrɔ la ka taa. Jamaba tugura a kɔ. A ye banabagatɔw bɛɛ kɛnɛya.

¹⁶Nga a y'a gwɛlɛya u ma k'u kana ale koo fɔ mɔgɔ si ye.

¹⁷O kɛra ten janko Ala tun ye min fɔ kira Ezayi ye, o ka kɛ. A tun ko:

¹⁸“Ne ye baaraden min woloma, o filɛ nin ye. Ne b'a kanu, a diyara ne ye k'a woloma. Ne bɛna n ka Nii Senuman d'a ma, a bɛna n ka kuma fɔ siyaw bɛɛ ye.

¹⁹A tɛna kɛlɛ kɛ ni mɔgɔ si ye, a tɛna pɛrɛn. Mɔgɔ si tɛn'a kaan mɛn sira daa la.

²⁰A tɛna fariya barikatanw ma. A bɛna baara kɛ ten fɔɔ ne ka kuma ka see sɔrɔ.

²¹Siyaw bɛɛ bɛna u jigi la a kan.”

²²O kɔ, mɔgɔw taara ni jinatɔ dɔ ye Yezu fɛ. Finyɛntɔ tun lo, a tun tɛ se ka kuma fana. Yezu ye jina gwɛn fɔɔ cɛɛ sera ka kuma, a nyaa fana yɛlɛla.

²³Jama bɛɛ kabakoyara. U ko: “An bɛ masacɛ Dawuda dencɛ min kɔnɔna, kɔni ale le tɛ nin ye?”

²⁴Nga Farizinyɛw y'o kuma mɛn tuma min na, u y'a fɔ ko: “Jinaw ka kuntigi Belezebuli le bɛ see dir'a ma ka jinaw gwɛn ka bɔ mɔgɔw la.”

²⁵Yezu y'u ka miiriya lɔn minkɛ, a y'a fɔ u ye ko: “Ni jamana min mɔgɔw bɛ nyɔgɔn kɛlɛ, o jamana nin tɛ se ka nya. Ni dugu, walima somɔgɔ minw bɛ nyɔgɔn kɛlɛ, o bɛ ci.

²⁶Ni Sutana b'a yɛrɛ ka mɔgɔw gwɛn, a b'a yɛrɛ kɛlɛ, a ka fanga bɛna taa nya cogo di?

²⁷Aw ko Belezebuli le bɛ see dira ne ma ka jinaw gwɛn ka bɔ mɔgɔw la. Jon le bɛ see dira aw ka kalandenw ma k'u gwɛn? Sutana tɛ dɛ! Aw ka kalandenw yɛrɛ le bɛna kɛ sababu ye aw bɛ jalaki aw ka kuma nunu kɔsɔn.

²⁸Ni n bɛ jinaw gwɛn ka bɔ mɔgɔw la Nii Senuman barika la, o b'a yira ko Ala sera aw ma n'a ka masaya ye.

²⁹Mɔgɔ si tɛ se ka don cɛɛ barikaman ka soo kɔnɔ k'a bololafɛnw cɛ n'a m'o cɛɛ minɛ k'a siri fɔlɔ. N'a y'a siri tuma min na, a bɛ se k'a ka soo kɔnɔ fɛɛnw bɛɛ cɛ.

³⁰Ni mɔgɔ min tɛ ne nyiin ye, o tigi ye ne jugu ye. Ni mɔgɔ min tɛ ne dɛmɛ ka nyani kɛ, o tigi bɛ cɛnni le kɛ.

³¹“O le y'a to ne b'a fɔ aw ye ko Ala bɛna mɔgɔw ka kojuguw bɛɛ yafa n'u ka Ala tɔgɔcɛnkumaw bɛɛ. Nga ni mɔgɔ min ye Nii Senuman tɔgɔ cɛn, Ala tɛna yafa o tigi ma.

³²Ni mɔgɔ min ye Mɔgɔ Dencɛ tɔgɔ cɛn, Ala bɛna yafa o tigi ma, nga ni mɔgɔ min ye Nii Senuman tɔgɔ cɛn, Ala tɛna yafa o tigi ma bii, a tɛna yafa a ma sini fana.

³³“Yirinyuman deen ka di, nga yirijugu ka deen man di, bari mɔgɔ bɛ yiri lɔn a ka deen le fɛ.

³⁴Aw minw ka jugu i n'a fɔ fɔnfɔnni, aw bɛ se ka kumanyuman fɔ cogo di, bari aw ka jugu. Mɔgɔ kɔnɔ fanin bɛ miiriya min na, a daa b'o le fɔ.

³⁵Kumanyuman bɛ bɔ mɔgɔnyuman daa la, kumajugu bɛ bɔ mɔgɔjugu daa la.

³⁶Ne b'a fɔ aw ye ko Ala bɛna mɔgɔw kiti loon min na, u ye kuma kuntan minw bɛɛ fɔ, a bɛna u nyininga u fɔkun na.

³⁷Ala bɛna i kiti ka kɛnyɛ n'i ka dalakuma ye. O sababu la, Ala bɛ joo d'i ma, walima a b'i jalaki.”

³⁸O kɔ, sariya karamɔgɔ dɔw, ni Farizinyɛ dɔw y'a fɔ Yezu ye ko: “Karamɔgɔ, an b'a fɛ i ka kabako dɔ kɛ an b'o ye.”

³⁹Yezu y'u jaabi ko: “Bii mɔgɔw ka jugu, u murutira Ala ma. U b'a fɛ ne ka kabako kɛ u nyana, nga ne tɛna kabako si kɛ k'a yira u la ni kira Zonasi ta nyɔgɔn tɛ.

⁴⁰Jigɛba ye Zonasi kunu a ye tile saba ni suu saba kɛ a kɔnɔ cogo min na, Mɔgɔ Dencɛ fana bɛna tile saba, ni suu saba kɛ kaburu kɔnɔ ten.

⁴¹Ala bɛna mɔgɔw kiti loon min na, Ninivukaw ni bii mɔgɔw bɛna kunun nyɔgɔn fɛ. Ninivukaw ka kɛwali bɛna kɛ sababu ye Ala bɛ bii mɔgɔw jalaki, bari Zonasi taara Ninivukaw waaju tuma min na, u nimisara ka faran u ka kojuguw la. Mɔgɔ bɛ yan min lɔyɔrɔ ka bon ni Zonasi ta ye.

⁴²Ala bɛna mɔgɔw kiti loon min na, muso min tun kɛra masa ye Saba jamana na, bii mɔgɔw n'o muso bɛna kunun nyɔgɔn fɛ. A ka kɛwali bɛna kɛ sababu ye Ala bɛ bii mɔgɔw jalaki, bari a bɔra yɔrɔjan ka taa a tulo malɔ Solomani ka hakilitigiya kuma na. Mɔgɔ bɛ yan min lɔyɔrɔ ka bon ni Solomani ta ye.

⁴³“Ni jina bɔra mɔgɔ la tuma min na, a bɛ taa yɔrɔlakolon yaala ka lafinyɛyɔrɔ wɛrɛ nyini. N'a m'o sɔrɔ,

⁴⁴a b'a fɔ a yɛrɛ kɔnɔ ko: ‘Ne bɔra yɔrɔ min na, ne bɛna segi ka taa yen.’ N'a segira tuma min na, a bɛ taa o yɔrɔ lakolon sɔrɔ, a labɛnnin lo kosɛbɛ.

⁴⁵O tuma na, a bɛ segi ka taa jina wolonwula wɛrɛw wele minw ka jugu n'ale yɛrɛ ye, ka na n'u ye. U bɛ sigi yen nyɔgɔn fɛ. O tuma na, cɛɛ ka bana bɛ wili, ka juguya ka tɛmɛ fɔlɔta kan. O nyɔgɔn le bɛna kɛ bii mɔgɔw la.”

⁴⁶Yezu tun bɛ kumana jama fɛ. K'a to o la, a bamuso n'a dɔgɔninw sera. U lɔra kɛnɛma. U tun b'a fɛ ka kuma a fɛ.

⁴⁷Mɔgɔ dɔ sɔrɔla k'a fɔ Yezu ye ko: “I bamuso n'i dɔgɔninw lɔnin bɛ kɛnɛma, u mako b'i la.”

⁴⁸Yezu y'a fɔ o tigi ye ko: “Jon ye ne bamuso ye? Jon ni jon le ye ne dɔgɔninw ye?”

⁴⁹O kɔ, a y'a bolo sin a ka kalandenw ma k'a fɔ ko: “Ne bamuso ni ne dɔgɔninw filɛ yan,

⁵⁰bari mɔgɔ min bɛ ne Faa Ala sago kɛ, o tigi le ye ne dɔgɔcɛ, walima ne dɔgɔmuso walima ne bamuso ye.”