Read LAYIDUKURA MATIYO 13 Bible Online

MATIYO 13 - LAYIDUKURA bible

MATIYO 13

¹O loon na, Yezu bɔra ka taa sigi bada la.

²Jamaba taara lajɛn a kɔrɔ fɔɔ a y'u to kɛnɛma ka don kurun kɔnɔ ka sigi.

³A ye kuma caaman fɔ u ye talen na. A ko: “Loon dɔ, sɛnɛkɛla dɔ bɔra ka taa suman seri a ka foro la.

⁴K'a to serili la, kisɛ dɔw taara ben sirada la. Kɔnɔw nana olu kunu.

⁵Dɔw fana kɛnyɛna fara yɔrɔ ma, bɔgɔ bɛrɛ tun tɛ yen. U falenna joona bari u ma don duguma ka se yɔrɔjan.

⁶Tile nana gwan tuma min na, yɔrɔ jara, u sara, bari lili nyanaman tun t'u la.

⁷Dɔw fana kɛnyɛna binjugu yɔrɔ ma, u ni biin falenna nyɔgɔn fɛ. Biin wilila joona joona k'u datugu.

⁸Nga dɔw kɛnyɛna dugukolonyuman ma. O yɔrɔ suman nyana kosɛbɛ. Dɔw ye deen kɛmɛ sɔrɔ, dɔw ta bi wɔɔrɔ, dɔw ta bi saba.”

⁹Yezu sɔrɔla k'a fɔ ko: “Ni min b'a fɛ ka mɛnni kɛ, o k'a tulo malɔ ka nya.”

¹⁰O kɔ, Yezu ka kalandenw gwɛrɛla a la k'a nyininga ko: “Mun na i bɛ to ka kuma mɔgɔw fɛ talen na?”

¹¹A y'u jaabi ko: “Aw kɛra Ala ka masaya gundo lɔnbagaw ye, nga a lɔnniya ma di tɔw ma,

¹²bari fɛɛn bɛ mɔgɔ min bolo, Ala bɛna dɔ fara o tigi ta kan kosɛbɛ. Nga, fɛɛn tɛ mɔgɔ min bolo, hali dɔɔni min b'a bolo, Ala bɛna o bɔsi a la.

¹³O le y'a to ne bɛ talen la u ye, bari u bɛ filɛli kɛ, nga, u tɛ foyi ye, u b'u tulo malɔ, nga, u tɛ foyi faamu.

¹⁴O cogo la, kira Ezayi ye kuma min fɔ, o bɛ kɛ. A tun ko: ‘U bɛna u tulo malɔ ka sɛgɛn, u tɛna foyi faamu. U bɛna filɛli kɛ fɔɔ u nyaa ka ja, u tɛna foyi ye.

¹⁵Bari u tulo ka gwɛlɛ, u tɛ miiri, u t'a fɛ ka yeli kɛ, u t'a fɛ ka mɛnni kɛ. N'u tun ye yeli kɛ ka mɛnni kɛ, u tun bɛna sɔn ne Ala ma. Ne tun bɛna u kisi.’

¹⁶“Aw kɔni ye dubadenw ye bari aw nyaa yɛlɛnin lo, aw tulo bɛ mɛnni kɛ.

¹⁷Tinyɛ na, ne b'a fɔ aw ye ko aw bɛ fɛɛn minw yera, kira caaman ni Ala ka mɔgɔ caaman tun b'a fɛ k'u ye, nga u nyaa ma la u kan. Aw bɛ kuma minw mɛnna, u tun b'a fɛ k'u mɛn, nga, u m'u mɛn.

¹⁸“Ne ye serilikɛla koo fɔ talen min na, aw k'aw tulo malɔ o talen kɔrɔ la.

¹⁹Minw bɛ Ala ka kuma mɛn n'u t'a faamu, olu bɔnin bɛ sira daa fɛ, kisɛ benna o yɔrɔ min na. U man'a mɛn dɔrɔn, Sutana bɛ na o bɔ u kɔnɔ.

²⁰Mɔgɔ minw b'o kuma mɛn ka sɔn a ma joona ni nisɔndiya ye, olu bɔnin bɛ fara yɔrɔ fɛ.

²¹U t'a to o kuma ka sigiyɔrɔ sɔrɔ u kɔnɔ, u bɛ nyinɛ a kɔ joona. O le y'a to ni mɔgɔ b'u tɔɔrɔ o kuma kɔsɔn dɔrɔn, u bɛ sin ka ban Ala ma.

²²Mɔgɔ minw bɛ o kuma mɛn, nga, ni nafolo koo, ni dinyɛ hami koo, ni nyanagwɛ koow b'o kuma kɛ kuma gwansan ye u nyana, n'a tɛ foyi nya u ye, olu bɔnin bɛ binjugu yɔrɔ fɛ.

²³Mɔgɔ minw bɛ kuma nin mɛn, k'o faamu, olu bɛ kɛ i n'a fɔ suman nyanin. Dɔw bɛ kisɛ kɛmɛ kɛ, dɔw ta bɛ se bi wɔɔrɔ, dɔw ta bi saba.”

²⁴Yezu ye talen wɛrɛ la u ye. A ko: “Koo min bɛ masa Ala ka baara kɛcogo gwɛya aw ye, o filɛ: Cɛɛ dɔ ye sumansi nyanaman dan a ka foro la.

²⁵Ka mɔgɔ bɛɛ to sinɔgɔ la sufɛ, a jugu taara binjugu kisɛ seri suman cɛma ka tɛmɛ n'a yɛrɛ ye.

²⁶U nana falen, u y'a daminɛ ka kuun bɔ tuma min na, binjugu lɔnna ka bɔ suman na.

²⁷Forotigi ka baaradenw taar'a fɔ a ye ko: ‘I tun ma sumansi nyanaman le dan i ka foro la wa? Binjugu nin do bɔra min?’

²⁸A y'u jaabi ko: ‘Ne jugu dɔ le y'o baara kɛ.’ Baaraden nunu tilara k'a nyininga ko: ‘I b'a fɛ an ka taa binjugu nin bɔn ka bɔ yen wa?’

²⁹A y'u jaabi ko: ‘Ayi. Aw kana ta'a bɔn, bari aw bɛ se ka fili ka suman dɔ bɔn.

³⁰Aw k'a to u ka wili nyɔgɔn fɛ fɔɔ sumantigɛtuma ka se. N'o tuma sera, n bɛn'a fɔ sumantigɛlaw ye k'u ka binjugu nin tigɛ fɔlɔ, k'a siri, k'a jɛni, u ka sɔrɔ ka suman tigɛ k'a kɛ n ka bondo kɔnɔ.’ ”

³¹Yezu ye talen wɛrɛ la u ye tugu. A ko: “Ala ka masaya koo bɔnin bɛ mutaridi kisɛ fɛ, cɛɛ dɔ y'o min ta k'a dan a ka foro la.

³²Mutaridi kisɛ ka dɔgɔ ni fɛɛn bɛɛ kisɛ ye. Nga, n'a falenna, a bɛ bonya ka tɛmɛ nankɔ fɛɛn sɛnɛta tɔw bɛɛ kan. A bɛ kɛ yiri ye, kɔnɔw b'u ka nyaga la a bolo kan.”

³³O kɔ, Yezu ye talen wɛrɛ la u ye ko: “Koo min bɛ Ala ka masaya koo gwɛya aw ye, o filɛ: Muso dɔ ye burufununan ta k'a kɛ farinimugu fiyɛ nyaa kelen na k'a nɔɔni, k'a bila fɔɔ a bɛɛ fununa.”

³⁴Yezu y'o kuma bɛɛ fɔ jama ye talen na. A tun tɛ kuma u fɛ n'a ma talen la u ye.

³⁵A tun b'a kɛ ten janko kira tun ye min fɔ, o ka kɛ. A tun y'a fɔ ko: “N bɛna kuma u fɛ talenw na. Mɔgɔw ma koo minw lɔn kabini dinyɛ dantuma, ne bɛna olu fɔ u ye.”

³⁶Yezu bɔra jama kɔrɔ ka taa soo tuma min na, a ka kalandenw gwɛrɛla a la k'a fɔ a ye ko: “I ye talen min la ko mɔgɔ dɔ taara binjugu kisɛ seri a jugu ka foro la, o talen kɔrɔ fɔ an ye.”

³⁷Yezu y'u jaabi ko: “Mɔgɔ min ye sumansi nin dan, o ye Mɔgɔ Dencɛ ye.

³⁸Foro nin, o ye dinyɛ ye. Sumansi, o ye Ala ka mɔgɔw ye. Binjugu nin, o ye Sutana ka mɔgɔw ye.

³⁹Jugu min ye binjugu kisɛ seri foro nin kɔnɔ, o ye Sutana yɛrɛ ye. Sumantigɛtuma, o ye dinyɛ laban tuma ye. Sumantigɛlaw ye mɛlɛkɛw ye.

⁴⁰U bɛ binjugu tigɛ k'a jɛni cogo min na, o koo nyɔgɔn bɛna kɛ dinyɛ laban tuma na.

⁴¹Mɔgɔ Dencɛ bɛn'a ka mɛlɛkɛw ci. Mɔgɔ minw bɛɛ bɛ kojugu kɛ ka tɔw fana nigɛ k'u bila a la, u bɛna olu woloma k'u bɔ Ala ka mɔgɔw cɛma.

⁴²Mɛlɛkɛw bɛna o mɔgɔjuguw fili tasuma kɔnɔ. U bɛna kasi yen k'a fɔ ko n'u tun y'a lɔn.

⁴³O kɔ, mɔgɔ minw bɛ Ala sago kɛ, olu bɛɛ bɛna bonya sɔrɔ ka manamana i n'a fɔ tile, u Faa Ala ka masaya yɔrɔ la. Ni min b'a fɛ ka mɛnni kɛ, o k'a tulo malɔ ka nya.

⁴⁴“Ala ka masaya yɔrɔ bɛ sɔrɔ cogo min na, koo min b'o gwɛya aw ye, o filɛ: A bɛ i n'a fɔ cɛɛ dɔ taara nafolo dogonin sɔrɔ foro dɔ la. A y'a ta k'a dogo tugu. A nisɔn diyara kosɛbɛ, fɔɔ a taar'a bololafɛn bɛɛ feere ka segi ka taa foro nin san.

⁴⁵“Ala ka masaya yɔrɔ bɛ sɔrɔ cogo min na, koo min b'o gwɛya aw ye, o filɛ: A bɛ i n'a fɔ jagokɛla dɔ, min bɛ kɔnɔkisɛnyuman nyini.

⁴⁶A nana dɔ ye min ka nyi, a taar'a bololafɛn bɛɛ feere k'o kɔnɔkisɛ nin san.

⁴⁷“Ala ka masaya koo bɔnin bɛ mɔnikɛla dɔ fɛ min y'a ka jɔɔ fili baji la, a ye jigɛ sifa bɛɛ minɛ.

⁴⁸A fanin kɔ, a y'a sama ka bɔ jii la ka sigi ka jigɛw woloma. Jigɛ minw ka nyi, a ye olu kɛ minan kɔnɔ. Jigɛ minw man nyi, a ye olu fili.

⁴⁹O koo nyɔgɔn bɛna kɛ dinyɛ labantuma na. Mɛlɛkɛw bɛna na mɔgɔjuguw woloma k'u bɔ mɔgɔnyumanw na.

⁵⁰U bɛna o mɔgɔjuguw fili tasuma na. O yɔrɔ la, u bɛna kasi k'a fɔ ko n'u tun y'a lɔn.”

⁵¹O kɔ, Yezu y'u nyininga n'u y'o talenw bɛɛ faamu. U y'a jaabi ko ɔnhɔn.

⁵²A y'a fɔ u ye tugu ko: “Ayiwa. Sariya karamɔgɔ min kalanna kosɛbɛ Ala ka masaya koo la, a bɔnin bɛ sotigi dɔ fɛ min bɛ fɛnkura ni fɛɛn kɔrɔman sɔrɔ a ka nafolo la.”

⁵³Yezu y'o talenw la ka ban tuma min na, a bɔra yen

⁵⁴ka ta'a ka dugu la. O yɔrɔ la, a donna Alabatoso kɔnɔ ka mɔgɔw kalan. Mɔgɔ minw tun bɛ yen, u bɛɛ kabakoyara. U tora k'a fɔ ko: “Haan! A bɔra ni hakilitigiya nin ye min? A bɛ kabako nunu kɛ cogo di?

⁵⁵Yirilɛsɛbaga ka deen nin tɛ wa? Mariyamu t'ale le bamuso ye wa? A dɔgɔcɛw tɛ Zaki ni Yusufu ni Simɔn ani Zude ye wa?

⁵⁶A dɔgɔmusow bɛɛ tɛ dugu nin kɔnɔ yan wa? A do ye hakilitigiya ni kabako kɛ see nin sɔrɔ min?”

⁵⁷O miiriya le y'a to u ma la Yezu la. O la, Yezu y'a fɔ u ye ko: “Kira tɛ bonya sɔrɔ a ka dugu mɔgɔw n'a ka somɔgɔw fɛ ka ye.”

⁵⁸Yezu ma kabako caaman kɛ yen bari u ma la a la.