Read LAYIDUKURA MATIYO 14 Bible Online

MATIYO 14 - LAYIDUKURA bible

MATIYO 14

¹O waati la, Erɔdi min tun ye masacɛ ye Galile mara la, ale ye Yezu koo mɛn.

²A y'a fɔ a ka baaradenw ye ko: “Zan batizelikɛla yɛrɛ yɛrɛ lo. Ale le kununna. O le y'a to a bɛ se ka kabakow kɛ.”

³Tinyɛ na, Erɔdi yɛrɛ tun ye Zan minɛ k'a siri k'a don kaso la. Fɛɛn min y'a to a y'o kɛ, o filɛ: Ale Erɔdi tun y'a yɛrɛ dɔgɔcɛ Filipi ka muso Erodiyadi bɔsi a la k'a furu.

⁴O le y'a to Zan tun b'a fɔ a ye ko: “I man kan ka Erodiyadi bɔsi i dɔgɔcɛ la k'a furu.”

⁵Erɔdi tun b'a fɛ ka Zan faga, nga a tun bɛ siran Zuwifuw nya, bari u bɛɛ tun bɛ Zan jati kira ye.

⁶O bɛɛ la, Erɔdi ka wololon saan yɛlɛma nyanagwɛ la, Erodiyadi ka denmuso wilila ka dɔɔn kɛ nyanagwɛ dumunikɛlaw nyana. O diyara Erɔdi ye kosɛbɛ,

⁷fɔɔ a kalila ko n'a ye fɛɛn min dali ale fɛ, ko ale bɛna o d'a ma.

⁸A bamuso ye kuma min fɔ a ye, a y'o le ta k'a fɔ Erɔdi ye ko: “Zan batizelikɛla kuun don minan dɔ kɔnɔ k'a di ne ma.”

⁹Masacɛ nyaa sisira. Nga, a kalila nyanagwɛ dumunikɛlaw nyana minkɛ, a sɔnna.

¹⁰O la, a ye mɔgɔ dɔ ci ko a ka taa Zan kuun tigɛ kaso boon na ka na n'a ye.

¹¹U ye Zan kuun tigɛ k'a bila minan dɔ kɔnɔ ka n'a di sungurunin nin ma. Ale fana y'a ta ka ta'a di a bamuso ma.

¹²Zan ka kalandenw taar'a suu ta ka ta'a don. O kɔ, u taar'a nyafɔ Yezu ye.

¹³Yezu ye Zan fagako mɛn tuma min na, a bɔra o yɔrɔ la. A kelen donna kurun kɔnɔ ka taa kongo kɔnɔ. Nga, mɔgɔw bɔra a taatuma kala ma, u bɔra duguw kɔnɔ ka ta'a fɛ u seen na.

¹⁴Yezu bɔra kurun kɔnɔ tuma min na, ka jamaba ye, u hinɛ donna a la, a y'u ka banabagatɔw kɛnɛya.

¹⁵Wulafɛ, Yezu ka kalandenw gwɛrɛla a la k'a fɔ a ye ko: “Suu bɛ nyini ka ko, yan yɔrɔ fana ye kongo ye, e tɛ sira di jama ma u ka taa dugudenninw na ka dumuni san u yɛrɛw ye wa?”

¹⁶Yezu y'u jaabi ko: “A daganin tɛ u ka taa yɔrɔ dɔ la, aw yɛrɛ ka dumuni d'u ma.”

¹⁷U y'a fɔ a ye ko: “Burukun duuru ni jigɛ deen fila le b'an fɛ yan.”

¹⁸Yezu y'a fɔ u ye ko: “Aw ka na n'u ye yan.”

¹⁹O kɔ, a y'a fɔ jama ye k'u ka sigi biin kan. A ye burukun duuru ni jigɛ deen fila nunu ta, k'a nyaa kɔrɔta sanfɛ ka barika la Ala ye, k'o tilantilan k'o di a ka kalandenw ma, kalandenw y'o tilan jama cɛ.

²⁰Mɔgɔ bɛɛ ye dumuni kɛ fɔɔ ka fa, kalandenw ye dumuni tɔɔ cɛ ka segi tan ni fila fa n'o ye.

²¹Mɔgɔ minw ye dumuni kɛ, cɛɛw dama tun ye mɔgɔ waa duuru nyɔgɔn ye, musow ni denmisɛnw ma jati.

²²O koo kɛnin kɔ dɔrɔn, Yezu y'a fɔ a ka kalandenw ye ko u ka don kurun kɔnɔ ka taa ale nya baa kɔfɛ, yan ni ale bɛ sira di jama ma u ka taa soo.

²³Yezu ye sira di ka ban jama ma waati min na, a yɛlɛla kulu kan a kelen na waasa ka Ala dali, suu kora k'a sɔrɔ o yɔrɔ la yen.

²⁴O y'a sɔrɔ kurun yɔrɔ tun janyana ka ban dugukolo la. Kalandenw tun tɛ se ka kurun boli jikuru fɛ, bari fɔnyɔ tun b'u kunbɛnna.

²⁵Dugu tun bɛ nyini ka gwɛ waati min na, Yezu taamana jii kan ka taa u fɛ.

²⁶Kalandenw ye Yezu taamatɔ ye jii kan, u jaa tigɛra siranya bolo, fɔɔ u b'a fɔra ko suja lo, u y'a daminɛ ka kule kosɛbɛ.

²⁷O yɔrɔnin kelen, Yezu kumana u fɛ k'a fɔ ko: “Aw k'aw jaa gwɛlɛya, ne lo, aw kana siran.”

²⁸Piyɛri y'a fɔ Yezu ye ko: “Matigi, ni ele lo tinyɛ na, a fɔ ko ne ka na e fɛ yen jii kan.”

²⁹Yezu y'a fɔ a ye ko: “Na.” Piyɛri bɔra kurun kɔnɔ ka taama jii kan n'a bɛ taara Yezu fɛ.

³⁰Nga Piyɛri y'a ye ko fɔnyɔ fanga ka bon minkɛ, siranya y'a minɛ. A daminɛna ka jigi jii jukɔrɔ, o la, a kulera ko: “Matigi, n dɛmɛ.”

³¹O yɔrɔnin kelen, Yezu y'a minɛ k'a fɔ a ye ko: “I ma la ne la wa? Mun na i sigasigara?”

³²U donna kurun kɔnɔ tuma min na, fɔnyɔ lɔra.

³³Kalanden tɔ minw tun bɛ kurun kɔnɔ, olu y'u kunbiri gwan Yezu kɔrɔ k'a fɔ a ye ko: “Tinyɛ na, i ye Ala Deen ye.”

³⁴U ye jii tigɛ ka ban waati min na, u sera Zenezarɛti mara la.

³⁵O yɔrɔ mɔgɔw ye Yezu ye k'a lɔn minkɛ, u ye mɔgɔw ci ka taa yɔrɔ bɛɛ la, k'a fɔ ko Yezu nana. U y'u ka banabagatɔw bɛɛ ta ka na n'u ye a fɛ.

³⁶U ye Yezu dali ko a ka sɔn u bɛ maga a ka fani dakun dama na. Minw bɛɛ magara o la, olu bɛɛ kɛnɛyara.