Read LAYIDUKURA MATIYO 15 Bible Online

MATIYO 15 - LAYIDUKURA bible

MATIYO 15

¹O kɔ, Farizinyɛ ni sariya karamɔgɔ dɔw bɔra Zeruzalɛmu ka na Yezu nyininga ko:

²“Mun na i ka kalandenw tɛ an bɛmaw ka landa labato? Bari u bɛ dumuni kɛ n'u tɛ u tigɛ ko ka nya.”

³Yezu y'olu nyininga fana ko: “Aw do, mun na Ala bɛ fɛɛn minw nyini aw fɛ, aw t'o kɛ, aw ka landaw kɔsɔn?

⁴Bari Ala y'a fɔ ko i ka i faa n'i baa bonya, ko ni mɔgɔ min y'a faa walima a baa dɔgɔya, k'o tigi ka kan ka faga.

⁵Nga aw b'a fɔ ko ni mɔgɔ dɔ y'a fɔ a faa, walima a baa ye ko ale tun ka kan k'a dɛmɛ ni fɛɛn min ye, ko ale y'o di Ala ma,

⁶o cogo la a ma kɛ wajibi ye o tigi ma k'a faa n'a baa dɛmɛ tugu. Aw bɛ ban Ala ka kuma na ten k'a kɛ fu ye aw ka landaw kɔsɔn.

⁷Nanbaranmɔgɔ nunu! Kira Ezayi bɛ min fɔ, o bɛnna aw ka kɛwaliw ma kosɛbɛ. A ko:

⁸‘Nin mɔgɔ nunu bɛ ne bonya u daa la dɔrɔn, nga u kɔnɔnako yɔrɔ ka jan ne la.

⁹U bɛ ne bato gwansan, bari u bɛ nyɔgɔn kalan koo minw na, o ye mɔgɔw ka sariya ye, ne ta tɛ.’ ”

¹⁰Yezu ye jama wele k'a fɔ u ye ko: “Aw k'aw tulo malɔ ka n ka kuma faamu.

¹¹A ma kɛ i n'a fɔ ko mɔgɔ bɛ fɛɛn min dumu, o le b'a nɔgɔ, nga a kɔnɔnako le b'a nɔgɔ.”

¹²A ka kalandenw gwɛrɛla a la k'a fɔ a ye ko: “I m'a lɔn ko i ka kuma nin digira Farizinyɛw na k'u hakili nyagami wa?”

¹³Yezu y'u jaabi ko: “Ne Faa min bɛ sankolo la ma yiri o yiri tutu, olu bɛna bɔn ka bɔ yen.

¹⁴Aw y'u ye k'u to yen, finyɛntɔw lo. Ni finyɛntɔ ye a tɔnyɔgɔn ka bere minɛ, u fila bɛɛ bɛna kori ka ben dingɛ kɔnɔ.”

¹⁵Piyɛri ye kuma ta, k'a fɔ Yezu ye ko: “Talen nin kɔrɔ fɔ an ye.”

¹⁶Yezu y'a fɔ u ye ko: “Aw fana tɛ faamuli kɛ halibi wa?

¹⁷Aw m'a lɔn ko mɔgɔ bɛ fɛɛn min dumu, k'o bɛ don a kɔnɔ na, o kɔ a bɛ taa o fili banakɔ wa?

¹⁸Nga mɔgɔ daa bɛ fɛɛn min fɔ, o bɛ bɔ a kɔnɔ le. Olu le bɛ mɔgɔ nɔgɔ.

¹⁹Bari miirijugu bɛɛ bɛ bɔ mɔgɔ dusu le la, i n'a fɔ mɔgɔfaga, kakalaya, mɔgɔkolonya, sonyali, galontigɛ, ani mɔgɔnɛni.

²⁰O koo nunu le bɛ mɔgɔ nɔgɔ, nga ka dumuni kɛ n'i ma i tigɛ ko, o tɛ mɔgɔ nɔgɔ.”

²¹Yezu bɔra o yɔrɔ la ka taa Tiri ni Sidɔn mara la.

²²Muso dɔ tun b'o yɔrɔ la, Zuwifu tun tɛ. Ale nana Yezu fɛ ka pɛrɛn ko: “Dawuda dencɛ, makari ne la Matigi, ne ka denmuso tɔɔrɔnin lo kosɛbɛ, jina b'a la.”

²³Nga Yezu m'a jaabi. A ka kalandenw gwɛrɛla a la k'a dali ko a ka muso nin nyafilɛ, ko n'o tɛ, a bɛ tugura u kɔ n'a ka mankan ye.

²⁴Yezu y'a fɔ ko: “Ne cira Isirayɛli ka soo dama ma, o min tununa i n'a fɔ sagaw.”

²⁵Nga muso nin nana a kunbiri gwan Yezu kɔrɔ k'a fɔ ko: “Matigi, n dɛmɛ.”

²⁶Yezu y'a jaabi ko: “A daganin tɛ ka denmisɛnw ka dumuni ta k'a di wuluw ma.”

²⁷Muso y'a fɔ Yezu ye ko: “O ye tinyɛ ye Matigi, nga wulutigi ka dumuni murumuru minw bɛ ben, wuluw b'o dumu.”

²⁸Yezu y'a fɔ a ye ko: “Muso, i lara ne la kosɛbɛ. I bɛ min fɛ, o ka kɛ i ye ka kɛnyɛ n'i ka lanyini ye.” O waati kelen na, a denmuso kɛnɛyara.

²⁹Yezu bɔra o yɔrɔ la ka taa Galile baa daa la. A yɛlɛla kulu dɔ kan ka sigi yen.

³⁰Jamaba tun nan'a fɛ n'u ka banabagatɔw ye. O banabagatɔ dɔw tun ye senkelenninw ye, ni finyɛntɔw, ani murukuw, ni bobow, ani banabagatɔw sifa wɛrɛw. U tun bɛ na n'u ye Yezu fɛ, n'a b'o kɛnɛya.

³¹Mɔgɔw y'a ye ko bobow bɛ kumana, ni murukuw bɛ kɛnɛyara, ani senkelenninw bɛ taamana ka nya, ni finyɛntɔw bɛ yeli kɛra, u kabakoyara kosɛbɛ, fɔɔ u y'a daminɛ ka Isirayɛli ka Ala tando.

³²Yezu y'a ka kalandenw wele k'a fɔ u ye ko: “Mɔgɔ nunu makari bɛ ne la, u bɛ ni ne ye, a tile saba ye bii ye. N y'a lɔn ko dumunifɛn si tɛ u bolo tugu. N t'a fɛ ka sira d'u kɔngɔtɔman ma, u barika bɛna dɛsɛ sira la.”

³³Kalandenw y'a nyininga ko: “Anw bɛna se ka jama nin nyɔgɔn daladumuni sɔrɔ yɔrɔ jumɛn yan kongo nin kɔnɔ?”

³⁴A y'u nyininga ko: “Burukun joli le b'aw fɛ?” U ko burukun wolonwula ni jigɛmisɛn damani.

³⁵O kɔ, a y'a nyini jama fɛ k'u ka sigi duguma.

³⁶A ye buru ni jigɛ nunu ta ka barika la Ala ye k'o tilantilan k'o di kalandenw ma, olu y'o tilan jama ye.

³⁷Mɔgɔw bɛɛ ye dumuni kɛ fɔɔ ka fa, kalandenw ye dumuni tɔɔ cɛ ka segi wolonwula fa n'o ye.

³⁸Mɔgɔ minw y'o dumuni kɛ, cɛɛw dama tun ye mɔgɔ waa naani ye, musow ni denmisɛnw ma jati.

³⁹Yezu ye sira di ka ban jama ma waati min na, a donna kurun kɔnɔ ka taa Magadan mara la.