Read LAYIDUKURA MATIYO 17 Bible Online

MATIYO 17 - LAYIDUKURA bible

MATIYO 17

¹Tile wɔɔrɔ o kɔ, Yezu taara ni Piyɛri ni Zaki an'a dɔgɔcɛ Zan ye kulujan dɔ kan u danna.

²O yɔrɔ la, Yezu cogo yɛlɛmana u nyana, a nyada tun bɛ manamana i n'a fɔ tile, a ka fani tun gwɛra parapara.

³O yɔrɔnin kelen, kalanden saba nunu ye Musa ni Eli lɔnin ye n'u bɛ kumana ni Yezu ye.

⁴O la, Piyɛri y'a fɔ Yezu ye ko: “Matigi, n'anw tora yan, o ka nyi dɛ! N'i sɔnna, ne bɛna bugu saba lɔ yan: e ta kelen, Musa ta kelen, Eli ta kelen.”

⁵Ka Piyɛri t'o kuma na, sankaba manamananin dɔ nana lɔ u kuun na. Kumakan dɔ bɔra o sankaba nin kɔnɔ k'a fɔ ko: “Nin ye ne dencɛ ye, a koo ka di ne ye haali. Ne sagoladen lo, n y'a ci, aw ka mɛnni kɛ a fɛ.”

⁶Kalanden saba nunu y'o kuma mɛn minkɛ, u lara k'u nyaa biri duguma, bari u tun siranna kosɛbɛ.

⁷Yezu gwɛrɛla u la, ka magamaga u la k'a fɔ ko: “Aw kana siran, aw ye wili.”

⁸U y'u nyaa kɔrɔ ta tuma min na, u ye Yezu dama le ye yen.

⁹U jigitɔ ka bɔ kulu kan, a ye kangari la u ye ko: “Aw ye koo minw ye kulu kan, aw kana o lakali mɔgɔ si ye, fɔɔ ni Mɔgɔ Dencɛ sara ka kunun tuma min na.”

¹⁰Yezu ka kalandenw y'a nyininga ko: “Mun na sariya karamɔgɔw ko Eli ka kan ka na kisibaga nya?”

¹¹A y'u jaabi ko: “Tinyɛ na, Eli ka kan ka na kisibaga nya ka fɛɛn bɛɛ labɛn fɔlɔ.

¹²Ne b'a fɔ aw ye ko Eli nana ka ban, nga u m'a lɔn, u y'a kɛ u yɛrɛ sago ye. O cogo la, u bɛna Mɔgɔ Dencɛ fana tɔɔrɔ.”

¹³Kalandenw y'a faamu o cogo la ko a bɛ kumana Zan batizelikɛla le koo la.

¹⁴Yezu n'a ka kalanden saba nunu sera jama yɔrɔ la waati min na, cɛɛ dɔ nana a kunbiri gwan a kɔrɔ k'a fɔ ko:

¹⁵“Matigi, makari ne ka deen na, bari kirikirimasinyɛ b'a la. Tuma o tuma a bɛ wili a la k'a ta k'a ben, a y'a ben tasuma na ani jii la sinyɛ caaman.

¹⁶Ne nana n'a ye i ka kalandenw fɛ, nga u ma se k'a kɛnɛya.”

¹⁷Yezu y'a fɔ ko: “Bii mɔgɔw ka jugu, u tɛ la Ala la, ne bɛna to n'aw ye k'aw ka koo munyu fɔɔ tuma jumɛn? Aw ka na ni deen nin ye yan.”

¹⁸Yezu ye jina nin sɔngɔ, a bɔra deen nin na, o yɔrɔnin bɛ a kɛnɛyara.

¹⁹O kɔ, Yezu ka kalandenw gwɛrɛla a la u danna, k'a nyininga ko: “Mun na an ma se ka jina nin gwɛn k'a bɔ deen nin na?”

²⁰Yezu y'a fɔ u ye ko: “Aw tɛ la ne la kosɛbɛ minkɛ, o lo. Tinyɛ na, ne b'a fɔ aw ye, ko n'aw ka lanaya bonya tun bɛ fonikisɛ bɔ, aw tun bɛ se k'a fɔ kulu nin ye ko a ka wili ka bɔ yan ka taa lɔ yen fɛ. O tun bɛn'a kɛ. O fɛɛn tɛ yen n'aw tɛna se ka min kɛ. [

²¹Nga nin jina nyɔgɔn tɛ se ka gwɛn ka bɔ mɔgɔ la n'i ma suun don ka Ala dali.]”

²²Loon dɔ, kalandenw ye nyɔgɔn lajɛn Galile, Yezu y'a fɔ u ye ko: “U bɛna Mɔgɔ Dencɛ don mɔgɔjuguw bolo,

²³k'a faga, tile saba a faganin kɔ, a bɛna kunun.” U bɛɛ hakili nyagamina kosɛbɛ.

²⁴Yezu n'a ka kalandenw sera Kafaranamu tuma min na, bolomafara min bɛ di Alabatosoba koo la, mɔgɔ minw tun bɛ to k'o minɛ, olu nana Piyɛri nyininga ko: “Aw ka karamɔgɔ nin tɛ to ka bolomafara di wa?”

²⁵Piyɛri y'u jaabi ko: “Ɔnhɔn, a bɛ to k'a di.” Piyɛri sera soo tuma min na, Yezu kɔnna k'a nyininga ko: “Simɔn, ele ka miiriya ye jumɛn ye koo nin na? Mɔgɔ jumɛnw le ka kan ka nisɔngɔ, walima wusuru sara faamaw ye? U deenw wa, walima mɔgɔ wɛrɛw?”

²⁶Piyɛri y'a jaabi ko: “Mɔgɔ wɛrɛw lo.” Yezu y'a fɔ a ye ko: “O kɔrɔ k'u ka deenw lafoninin bɛ kɛ!

²⁷Nga waasa miiriyajugu kana don mɔgɔ nunu kuun na, o kama, i ka dulen ta ka taa baa la k'a fili yen. N'i kɔnna ka jigɛ min minɛ, i k'o daa yɛlɛ ka filɛ yen. I bɛna wari sɔrɔ yen min bɛ i ka bolomafara ni ne ta bɔ. I ka taa o di.”