Read LAYIDUKURA MATIYO 18 Bible Online

MATIYO 18 - LAYIDUKURA bible

MATIYO 18

¹O waati la, Yezu ka kalandenw gwɛrɛla a la k'a nyininga ko Ala ka masaya yɔrɔ la, jon le ye mɔgɔba ye?

²Yezu ye denmisɛn dɔ wele k'o lɔ u cɛma,

³k'a fɔ u ye ko: “Tinyɛ na, n b'a fɔ aw ye ko n'aw m'aw sɔɔn yɛlɛma k'a kɛ i n'a fɔ denmisɛnw ta, aw tɛna don Ala ka masaya yɔrɔ la.

⁴O la, mɔgɔ min b'a yɛrɛ majigi ka kɛ i n'a fɔ denmisɛn nin, o tigi bɛna bonya sɔrɔ Ala nyakɔrɔ.

⁵Mɔgɔ o mɔgɔ bɛ denmisɛn nin nyɔgɔn minɛ ka nya ne kɔsɔn, o tigi bɛ ne le minɛ ka nya fana.

⁶“Mɔgɔ minw lara ne la a ma mɛn, ni mɔgɔ dɔ kɛra sababu ye k'olu dɔ kunna cɛn, yan ni a k'o kɛ, ni kabakuru belebeleba tun sirila a kaan na, k'a fili kɔgɔji kɔnɔ, o bɛ fisaya a ma.

⁷Bɔnɛ ye dinyɛ mɔgɔw ta ye. Olu bɛ kɛ sababu ye ka mɔgɔ caaman kunna cɛn. Wajibi lo dɔw kunna bɛna cɛn, nga mɔgɔ min bɛna kɛ o dɔ sababu ye, bɔnɛ y'o tigi ta ye.

⁸N'i bolo kelen, walima n'i seen kelen bɛ kɛ sababu ye i bɛ kojugu kɛ, i k'a tigɛ k'a fili yɔrɔjan. I bolo kelenman, walima i seen kelenman ka don arijana na, o ka fisa i ma, i ka don jahanama na n'i bolo fila, walima n'i seen fila ye.

⁹N'i nyaden kelen le bɛ kɛ sababu ye i ma ka kojugu kɛ, i k'a wɔgɔbi k'a fili yɔrɔjan. Ka don arijana na n'i nyaden kelen ye, o ka fisa i ma, k'i nyaden fila to i fɛ ka don jahanama na.

¹⁰“Aw k'aw yɛrɛ kɔlɔsi, aw si kana denmisɛn nunu dɔ dɔgɔya, bari ne b'a fɔ aw ye k'olu mɛlɛkɛw bɛ Ala nyakɔrɔ arijana na tuma bɛɛ. [

¹¹Mɔgɔ minw ni Ala cɛ bɛnnin tɛ, Mɔgɔ Dencɛ nana ka bɛɛn sigi olu ni Ala cɛ.]

¹²Aw ka miiri la, ni saga kɛmɛ bɛ mɔgɔ dɔ fɛ, ni olu dɔ tununa, sagatigi nin tɛna saga bi kɔnɔntɔn ni kɔnɔntɔn to kulu kan ka taa kelen nin yaala wa?

¹³Ne b'a fɔ aw ye ko n'a y'a ye, a nisɔn bɛna diya ale koo la ka tɛmɛ bi kɔnɔntɔn ni kɔnɔntɔn nunu kan.

¹⁴O cogo la, aw Faa min bɛ sankolo la, a t'a fɛ denmisɛn nunu dɔ ka tunu.

¹⁵“N'i balima ye kojugu kɛ, ta'a fɛ k'a ladi i kelen ale kelen. N'a sera k'i faamu ka sɔn a la, i y'i balima tanga.

¹⁶Nga n'a banna k'i lamɛn, i ka mɔgɔ kelen walima fila fara i kan ka ta'a fɛ tugu, waasa mɔgɔ fila walima mɔgɔ saba k'o koo nyanabɔ.

¹⁷N'a ma sɔn olu ka fɔta ma, i k'o koo fɔ Ala ka jama ye. N'a ma sɔn olu ka fɔta ma fana, i k'a jati Alalɔnbali, walima wusuruminɛla ye.

¹⁸Tinyɛ na, ne b'a fɔ aw ye ko aw mana ban fɛɛn o fɛɛn na dugukolo kan, Ala bɛna ban o fana na sankolo la. N'aw sɔnna fɛɛn o fɛɛn ma dugukolo kan, Ala bɛna sɔn o fana ma sankolo la.

¹⁹“Tinyɛ na, ne b'a fɔ aw ye tugu ko ni mɔgɔ fila aw cɛma bɛnna ka Ala dali fɛɛn o fɛɛn na k'u to dugukolo kan yan, ne Faa min bɛ sankolo la bɛna o d'u ma.

²⁰Bari ni mɔgɔ fila walima mɔgɔ saba mana nyɔgɔn lajɛn yɔrɔ o yɔrɔ ne tɔgɔ la, ne b'u cɛma.”

²¹Piyɛri gwɛrɛla Yezu la k'a nyininga ko: “Matigi, ni n balima bɛ to ka ne hakɛ ta tuma bɛɛ, ne ka kan ka yafa a ma sinyɛ joli? Fɔɔ ka taa se sinyɛ wolonwula wa?”

²²Yezu y'a jaabi ko: “Ayi, ne t'a fɔ i ye sinyɛ wolonwula dɛ, nga sinyɛ wolonwula sigiyɔrɔman bi wolonwula.

²³“O le y'a to Ala ka koo bɔnin bɛ masacɛ dɔ ta fɛ. Ale tun b'a fɛ k'a ka nafolo jati minɛ n'a ka baaradenw ye.

²⁴K'a to jatili la, u nana ni baaraden dɔ ye min tun ka kan ka talan waa tan sara.

²⁵Masacɛ nin y'a ye ko a tɛna se k'a bɛɛ sɔrɔ k'a sara minkɛ, a k'u ka baaraden nin, n'a ka muso, an'a ka denmisɛnw, n'a bololafɛn bɛɛ feere, waasa juru nin ka se ka sara.

²⁶Baaraden nin y'a kunbiri gwan a ka kuntigi kɔrɔ k'a dali ko a ka munyu ale kɔrɔ dɔɔni, ko ale bɛna juru nin bɛɛ sara.

²⁷A ka kuntigi makarila a la, ka yafa a ma juru nin koo la.

²⁸O baaraden nin bɔra a ka kuntigi ka soo waati min na, a y'a tɔnyɔgɔn dɔ ye min tun ka kan ka deniye wari kɛmɛ d'ale ma. A y'o minɛ k'a kaan dɛrɛ kosɛbɛ fɔɔ a ninakili degunna, k'a fɔ a ye ko: ‘N ka wari sara.’

²⁹A ka tɔnyɔgɔn nin y'a yɛrɛ majigi a kɔrɔ k'a dali ko: ‘I ka munyu ne kɔrɔ, ne bɛn'a sara.’

³⁰Nga baaraden nin ma sɔn, a y'a don kaso la, k'a fɔ ko ni ale ka juru ma sɔrɔ, ko a tɛ bɔ.

³¹A ka tɔnyɔgɔn dɔw fana y'u ye minkɛ, olu nii tɔɔrɔla kosɛbɛ. Olu taara o koo fɔ u ka kuntigi ye.

³²O tuma na, u ka kuntigi k'u ka taa baaraden nin wele ka na. U taar'a wele, a nana tuma min na, a ka kuntigi y'a fɔ a ye ko: ‘Baaradenjugu, ne tun yafara i ma juru nin koo la, bari i ye ne dali.

³³Ne makarila i la cogo min na, ele fana tun ka kan ka makari i tɔnyɔgɔn na ten.’

³⁴A ka kuntigi dimina kosɛbɛ, a ye baaraden nin don kaso la, a ko ni juru nin bɛɛ ma sara, ko a tɛ bɔ.”

³⁵O kɔ, Yezu ye nin fɔ k'a la a kan ko: “Ne Faa min bɛ sankolo la, o bɛna aw kɛ o cogo la, n'aw tɛ sɔn ka yafa aw tɔnyɔgɔn ma aw dusu bɛɛ la.”