Read LAYIDUKURA MATIYO 19 Bible Online

MATIYO 19 - LAYIDUKURA bible

MATIYO 19

¹Yezu tilara kuma na tuma min na, a bɔra Galile mara la ka taa Zude mara yɔrɔ dɔ la, Zurudɛn baa kɔfɛ.

²O yɔrɔ la jamaba tugura a kɔ, a y'olu ka banabagatɔw kɛnɛya.

³Farizinyɛ dɔw nana ka Yezu darabɔ k'a filɛ. U y'a nyininga ko: “A daganin bɛ cɛɛ k'a muso furu sa koo sugu bɛɛ la wa?”

⁴Yezu y'u jaabi ko: “Aw m'a mɛn Ala ka kuma na, ko Ala ye dinyɛ dan tuma min na, a ye cɛɛ ni muso dan wa?

⁵A y'a fɔ fana k'o le kɔsɔn cɛɛ bɛn'a faa n'a bamuso to yen ka nɔrɔ a muso la, u fila bɛɛ bɛna kɛ kelen ye.

⁶O cogo la, u tɛna kɛ mɔgɔ fila ye tugu, fɔɔ kelen. Ala ye min jɛn ka kɛ kelen ye, mɔgɔ si kana o faran.”

⁷U ye Yezu nyininga ko: “Mun na Musa y'a fɔ ko wajibi lo n'an b'a fɛ ka muso furu sa, ko an ka kan ka furu sa sɛbɛ kɛ k'o d'a ma?”

⁸Yezu y'a fɔ u ye ko: “Aw ka dusukungwɛlɛya le y'a to Musa sɔnna ko aw bɛ se k'aw ka muso bila, n'o tɛ, fɔlɔfɔlɔ a tun tɛ ten.

⁹Ne b'a fɔ aw ye ko mɔgɔ min b'a ka muso furu sa, ni nyamɔgɔya sababu tɛ, ka tila ka dɔ wɛrɛ furu, o tigi ye kakalaya kɛ.”

¹⁰Yezu ka kalandenw y'a fɔ a ye ko: “Ni nin le kɛra furuko cogo ye, o tuma na, kuun t'a la mɔgɔ ka furu kɛ.”

¹¹Yezu y'a fɔ u ye ko: “Mɔgɔ bɛɛ tɛ se k'o kɛ, fɔɔ ni Ala y'a see di mɔgɔ min ma.

¹²Nga mɔgɔ dɔw bɛ wolo ni furubaliya ye. Dɔw kɛra cɛgwanaw ye mɔgɔ wɛrɛ sababu la. Dɔw fana banna furu ma Ala ka baara kɔsɔn. Mɔgɔ min bɛ se ka sɔn furubaliya ma, o tigi k'a sɔn.”

¹³Mɔgɔw nana Yezu fɛ ni denmisɛnw ye, waasa a k'a bolo la u kan ka Ala dali u ye. Nga kalandenw y'u sɔngɔ.

¹⁴Yezu y'a fɔ u ye ko: “Aw ka denmisɛnw to u ka na ne fɛ, aw kana u bali, bari mɔgɔ minw sɔɔn kɛra i n'a fɔ denmisɛnw ta, olu le bɛ se ka don arijana na.”

¹⁵A y'a bolo la u kan, o kɔ, a taara.

¹⁶Cɛɛ dɔ gwɛrɛla Yezu la k'a nyininga ko: “Karamɔgɔ, ne ka kan ka konyuman jumɛn le kɛ, waasa ne ka hɛrɛ banbali sɔrɔ?”

¹⁷Yezu y'a fɔ a ye ko: “Mun na i bɛ ne nyininga konyuman koo la? Fɛɛn kelen dama le ka nyi. N'i b'a fɛ ka hɛrɛ banbali sɔrɔ, i ka Ala ka sariyaw labato.”

¹⁸Cɛɛ nin ye Yezu nyininga ko: “O ye sariya jumɛn ye?” Yezu y'a fɔ a ye ko: “ ‘I kana mɔgɔ faga, i kana nyamɔgɔya kɛ, i kana sonyali kɛ, i kana galon tigɛ.

¹⁹E k'i faa n'i bamuso bonya. Ani k'i mɔgɔnyɔgɔn kanu i n'a fɔ i b'i yɛrɛ kanu cogo min na.’ ”

²⁰Kanbelen nin y'a jaabi ko ale sera k'o bɛɛ labato, ko mun b'ale jɛn tugu.

²¹Yezu y'a fɔ a ye ko: “N'i b'a fɛ i ka koow bɛɛ ka dafa, taa k'i bololafɛnw bɛɛ feere k'o wari tilan faantanw cɛ, o cogo la, i bɛna nafoloba sɔrɔ arijana na. O kɔ, e ka na ka tugu ne kɔ.”

²²Nga kanbelen nin y'o kuma mɛn tuma min na, a hakili nyagaminin le taara, bari nafoloba tun b'a fɛ.

²³Yezu y'a fɔ a ka kalandenw ye ko: “Tinyɛ na, ne b'a fɔ aw ye ko nafolotigi donko ka gwɛlɛ Ala ka mara kɔnɔ.

²⁴Ne b'a fɔ aw ye tugu ko nyɔgɔmɛ donko ka nɔgɔ miseli woo fɛ ka tɛmɛ nafolotigi donko Ala ka mara kɔnɔ.”

²⁵Kalandenw y'o kuma mɛn minkɛ, u kabakoyara kosɛbɛ. Olu tun b'a fɔra k'o tuma na, jon le bɛna se ka kisi?

²⁶Yezu y'u filɛ, o kɔ, a y'a fɔ u ye ko mɔgɔw fɛ, o tɛ se ka kɛ, nga koo bɛɛ ka nɔgɔ Ala fɛ.

²⁷Piyɛri ye Yezu nyininga ko: “A filɛ, an y'an ka fɛɛn bɛɛ to yen, ani ka tugu ele kɔ. An ta bɛna kɛ cogo di?”

²⁸Yezu y'a fɔ u ye ko: “Tinyɛ na, ne b'a fɔ aw ye ko ni dinyɛ nana kɛ dinyɛkura ye tuma min na, Mɔgɔ Dencɛ bɛna sigi a ka masasigilan kan. Aw minw tugura a kɔ, aw fana bɛna sigi masasigilan tan ni fila kan, ka Isirayɛli jama ka koow nyanabɔ.

²⁹Ani mɔgɔ o mɔgɔ min y'a ka soo bila, walima a balimacɛw, walima a balimamusow, walima a facɛ, walima a bamuso, walima a deenw, walima a ka foro ne ka baara kɔsɔn, o tigi bɛna o nyɔgɔn caaman sɔrɔ, ani ka sini hɛrɛ banbali sɔrɔ.

³⁰Nga nyafɛmɔgɔ caaman bɛna kɛ kɔfɛmɔgɔw ye, ani kɔfɛmɔgɔ caaman bɛna kɛ nyafɛmɔgɔw ye.