Read LAYIDUKURA MATIYO 2 Bible Online

MATIYO 2 - LAYIDUKURA bible

MATIYO 2

¹Yezu wolola Bɛtilehɛmu, Zuda mara la. O waati la, Erɔdi tun ye o yɔrɔ masacɛ ye. A wolola minkɛ, lɔnnikɛla dɔw bɔra kɔrɔn fɛ ka taa Zeruzalɛmu

²k'a koo nyininga ko: “Zuwifuw ka masacɛ min wolola sisan, o bɛ min? An nan'a bonya bari an y'a ka lolo ye k'an to kɔrɔn fɛ.”

³Masacɛ Erɔdi y'o mɛn tuma min na, ale ni Zeruzalɛmukaw bɛɛ kɔnɔnafilila.

⁴Erɔdi ye sarakalasebagaw kuntigiw ni sariya karamɔgɔw bɛɛ lajɛn k'u nyininga ko Ala ka Mɔgɔ wolomanin nin ka kan ka wolo min.

⁵U y'a jaabi ko: “A ka kan ka wolo Bɛtilehɛmu, Zude mara la, bari kira dɔ tun y'a sɛbɛn ko:

⁶‘Bɛtilehɛmu min ye Zude mara dugubaw dɔ ye, kuntigi bɛna bɔ yen ka Isirayɛlidenw mara olu minw ye ne ka mɔgɔw ye.’ ”

⁷O kɔ, Erɔdi ye lɔnnikɛla nunu wele dogo la k'u nyininga ko: “Aw ye lolo nin ye waati jumɛn?”

⁸A ye sira d'u ma k'a fɔ u ye ko: “Aw ye taa Bɛtilehɛmu ka dennyɛnin yɔrɔ nyini ka nya. N'aw y'a ye, aw ye kɔsegi ka n'a fɔ ne ye janko ne fana ka ta'a bonya.”

⁹Masacɛ tilanna a ka kuma na tuma min na, u ye sira minɛ. K'u to taama na, u tun ye lolo min ye k'u to kɔrɔn fɛ, u y'o ye u nyafɛ tugu. Dennyɛnin tun bɛ yɔrɔ min na, lolo nin bilara u nyafɛ fɔɔ ka taa lɔ o yɔrɔ sanfɛ.

¹⁰U ye lolo nin ye tuma min na, u nisɔn diyara kosɛbɛ.

¹¹U donna soo kɔnɔ, ka dennyɛnin n'a bamuso Mariyamu ye. U y'u kunbiri gwan ka deen bonya. O kɔ, u y'u ka minanw dayɛlɛ, ka sanu ni wusulan ani tulu kasa diman di deen ma.

¹²Ala y'a fɔ lɔnnikɛla nunu ye sigo la k'u kana segi ka taa bɔ Erɔdi kan. O la, u ye sira wɛrɛ ta ka taa u ka jamana na.

¹³Lɔnnikɛlaw taanin kɔ, Matigi ka mɛlɛkɛ dɔ y'a yɛrɛ yira Yusufu la sigo la. A y'a fɔ Yusufu ye ko a ka wili ka boli ka taa ni deen n'a baa ye Ezipiti jamana na, bari Erɔdi bɛna deen yɔrɔ nyini ko a b'a faga. Ko a ka to o yɔrɔ la fɔɔ n'ale ka kuma sera a ma tuma min na.

¹⁴Yusufu wilila o suu nin yɛrɛ la ka taa ni deen n'a baa ye Ezipiti jamana na.

¹⁵U tora yen fɔɔ Erɔdi nana sa. O koow kɛra janko kira tun ye Matigi ka kuma min fɔ, o ka kɛ. A tun y'a fɔ ko: “Ne ye n dencɛ wele ka bɔ Ezipiti jamana na.”

¹⁶Erɔdi y'a lɔn tuma min na ko lɔnnikɛlaw y'ale janfa, a dimina kosɛbɛ. A y'a ka sɔlidasiw ci Bɛtilehɛmu n'a dafɛ duguw la, ka deen cɛmanw bɛɛ faga minw bɛɛ sii ma tɛmɛ saan fila kan, bari a tun y'a jati ko deen sii ma tɛmɛ saan fila kan, ka kɛnyɛ ni lɔnnikɛlaw ka fɔta ye.

¹⁷O tuma na, kira Zeremi tun ye min fɔ, o kɛra. A tun y'a fɔ ko:

¹⁸“Kulekan bɔra Arama. Kasikan ni mankan caaman lo. Arasɛli le bɛ kasira bari a deenw sara. A t'a fɛ ka je bari a ka deenw banna.”

¹⁹Erɔdi sanin kɔ, ka Yusufu to Ezipiti, Matigi ka mɛlɛkɛ dɔ y'a yɛrɛ yira a la sigo la,

²⁰k'a fɔ a ye ko a ka wili ka segi ni deen n'a bamuso ye Isirayɛli jamana na, bari mɔgɔ minw tun b'a fɛ ka deen faga, olu banna.

²¹O la, a wilila ka taa ni deen n'a bamuso ye Isirayɛli jamana na.

²²Nga, a y'a mɛn minkɛ ko Arikelayusi kɛra masa ye Zude mara la a facɛ Erɔdi nɔɔ na, a siranna, a ma sɔn ka taa sigi yen. Ala y'a fɔ Yusufu ye sigo la ko a ka taa Galile mara la. O la, a taara yen,

²³ka taa sigi dugu dɔ la, min tɔgɔ ko Nazarɛti. O kɛra ten janko kiraw tun ye min fɔ, o ka kɛ. U tun y'a fɔ ko: “U bɛn'a wele ko Nazarɛtika.”