Read LAYIDUKURA MATIYO 20 Bible Online

MATIYO 20 - LAYIDUKURA bible

MATIYO 20

¹“Ala ka koo bɔnin bɛ forotigi dɔ ta fɛ. A bɔra sɔgɔma joona ko a bɛ sɛnɛkɛlaw ta k'u ci a ka foro kɔnɔ.

²A kɔnna ka minw sɔrɔ, a bɛnna n'olu ye ko a bɛna u sara ni deniye wari kelen ye tile kɔnɔ, ka sɔrɔ k'u ci a ka foro la.

³Tile gwanna dɔɔni, forotigi bɔra tugu ka dɔ wɛrɛw siginin ye yiriba kɔrɔ, u tun tɛ baara la.

⁴A y'a fɔ olu fana ye ko: ‘Aw ye taa ne ka foro la ka baara kɛ, ni tile banna, ne bɛna aw sara.’

⁵Olu taar'a ka foro la. Tilefɛ forotigi nin bɔra tugu ka mɔgɔ dɔw sɔrɔ, n'u tɛ baara la, tile sumana dɔɔni, a ye dɔ wɛrɛw sɔrɔ fana, k'u bɛɛ ci a ka foro la.

⁶Tile banna tuma min na, a ye mɔgɔ dɔ wɛrɛw ye tugu minw tun tɛ baara la. A y'a fɔ olu ye ko: ‘Mun n'aw ye tile bɛɛ ban yan n'aw ma taa baara la?’

⁷U y'a jaabi k'u ma baara sɔrɔ mɔgɔ si fɛ. A y'a fɔ olu ye k'u ka taa baara kɛ ale ka foro la.

⁸Baara jigira tuma min na, forotigi y'a fɔ a ka baarakuntigi ye ko a ka baarakɛla nunu wele k'u ka sara d'u ma, k'a daminɛ minw taara laban na fɔɔ ka ta'a bila fɔlɔ taw ma.

⁹Mɔgɔ minw taara o y'a sɔrɔ tile banna, olu gwɛrɛla, a ye deniye wari kelen kelen di olu bɛɛ ma.

¹⁰Mɔgɔ minw taara sɔgɔmadafɛ, olu nana gwɛrɛ. U tun b'a miiri k'u bɛna sɔrɔli kɛ ka tɛmɛ dɔ nunu kan. Nga u kelen kelen bɛɛ ye deniye wari kelen kelen le sɔrɔ.

¹¹Olu y'u ka sara minɛ tuma min na, u tun bɛ ;nunu;nunu forotigi kama.

¹²U tun b'a fɔra ko: ‘Nunu nana kɔfɛ, u yɛrɛ ma tile kelen baara kɛ ani u ma sɛgɛn i n'a fɔ anw. U ye baara kɛ waati dɔɔni dɔrɔn. Ele y'olu ka sara kɛ kelen ye n'an ta ye.’

¹³Forotigi y'a fɔ u kelen ye ko: ‘N teri, ne ma i tɔnyɔ. An tun ma bɛn a la ko ne bɛna i sara ni deniye wari kelen ye wa?

¹⁴E k'i ka sara minɛ ka tɛmɛ ka bɔ yan. Mɔgɔ minw taara baara la kɔfɛ, ne bɛna e ka sara nyɔgɔn di olu bɛɛ ma.

¹⁵O tuma na, ne man kan ka n sago kɛ ni n ka wari ye wa, walima ne ye konyuman min kɛ, o nyagoya le b'i la?’ ”

¹⁶Yezu tilara k'a fɔ ko: “O cogo la, kɔfɛmɔgɔw bɛna kɛ nyafɛmɔgɔw ye, ani nyafɛmɔgɔw bɛna kɛ kɔfɛmɔgɔw ye.”

¹⁷Yezu n'a ka kalandenw tun bɛ taara Zeruzalɛmu. K'u to sira kan, a ye kalanden tan ni fila nunu wele u danna k'a fɔ u ye ko:

¹⁸“Ayiwa, an bɛ taara Zeruzalɛmu. O yɔrɔ la, u bɛna Mɔgɔ Dencɛ don sarakalasebagaw ni sariya karamɔgɔw bolo. U bɛn'a fɔ ko a ka kan ka faga.

¹⁹U bɛn'a don siya wɛrɛw bolo, olu bɛna yɛlɛ a ma, k'a bugɔ ni golokami ye, k'a gwengwen lɔgɔ kan. Nga tile sabanan loon a bɛna kunun.”

²⁰O kɔ, Zebede ka muso nana Yezu fɛ n'a ka dencɛw ye. A y'a kunbiri gwan Yezu kɔrɔ waasa k'a dali.

²¹Yezu y'a nyininga ko: “E bɛ mun le fɛ?” A y'a jaabi ko: “N'i sigira i ka masaya la tuma min na, a to n deen fila nunu ka sigi i kɔrɔ, mɔgɔ kelen i numanbolo fɛ, kelen i kinibolo fɛ.”

²²Yezu y'u jaabi ko: “Aw bɛ fɛɛn min dali, aw m'o lɔn. Ne bɛna tɔɔrɔ min sɔrɔ, aw bɛna se k'o nyɔgɔn munyu wa?” U y'a fɔ ko: “An bɛna se.”

²³Yezu y'a fɔ u ye ko: “Aw kɔni bɛna o munyu. Nga mɔgɔ min ka kan ka sigi ne kinibolo, walima ne numanbolo fɛ, ne t'o latigɛbaga ye. N Faa y'o yɔrɔw labɛn mɔgɔ minw ye, u maranin bɛ olu ye.”

²⁴Kalanden tan nunu y'o mɛn minkɛ, u dimina mɔgɔ fila nunu kɔrɔ.

²⁵Yezu y'u bɛɛ wele k'a fɔ u ye ko: “Aw b'a lɔn ko dinyɛ kɔnɔ, jamana kuntigiw b'u ka jamana mɔgɔw tɔɔrɔ, mɔgɔbaw bɛ fanga yira tɔw la.

²⁶A man kan ka kɛ ten aw cɛma. N'aw dɔ b'a fɛ ka kɛ kuntigi ye, o tigi ka kan k'a yɛrɛ kɛ aw ka baaraden ye.

²⁷Ni mɔgɔ min b'a fɛ ka kɛ nyamɔgɔ ye aw cɛma, o ka kan ka kɛ aw ka jɔɔn ye.

²⁸O cogo la, Mɔgɔ Dencɛ ma na waasa mɔgɔw ka baara kɛ a ye. Nga, a nana mɔgɔw mako nya, ani k'a yɛrɛ nii di ka kɛ mɔgɔ bɛɛ nii kunmabɔ sara ye.”

²⁹Yezu n'a ka kalandenw tun bɛ bɔra Zeriko tuma min na, jamaba tun tugura a kɔ.

³⁰Finyɛntɔ fila dɔ tun siginin bɛ sira daa la, olu y'a mɛn tuma min na ko Yezu le bɛ tɛmɛna, u y'a daminɛ k'a fɔ ko: “Matigi, makari an na, Dawuda dencɛ.”

³¹Jama sɔngɔra u kunna k'u ka je, nga u pɛrɛnna ka tɛmɛ fɔlɔta kan. U ko: “Makari an na Matigi, Dawuda dencɛ.”

³²Yezu lɔra k'u wele, k'u nyininga ko: “Aw b'a fɛ ne ka mun le kɛ aw ye?”

³³U y'a jaabi ko: “An b'a fɛ i k'an nyaaw yɛlɛ, Matigi.”

³⁴U hinɛ donna Yezu la minkɛ, a magamagara u nyaa na. O yɔrɔnin bɛ mɔgɔ fila nunu nyaa yɛlɛla. U wilila ka tugu Yezu kɔ.