Read LAYIDUKURA MATIYO 21 Bible Online

MATIYO 21 - LAYIDUKURA bible

MATIYO 21

¹Yezu n'a ka nɔfɛmɔgɔw surunyana Bɛtifaze la, Olivuyirikulu gɛrɛfɛ. U yɔrɔ tun man jan Zeruzalɛmu na tugu. A y'a ka kalandenw fila ci a nyafɛ.

²A y'a fɔ u ye ko: “Aw ye taa aw nyafɛ dugu nin na. Aw bɛna falimuso n'a deen sirinin sɔrɔ yen. Aw k'u foni ka na n'u ye yan.

³Ni mɔgɔ dɔ y'aw nyininga, aw k'a fɔ o tigi ye ko Matigi mako le b'u la, o yɔrɔnin bɛ, a bɛna aw to aw bɛ na n'u ye.”

⁴O koo kɛra ten waasa kira tun ye kuma min fɔ, o ka kɛ.

⁵A tun ko: “Aw y'a fɔ Zeruzalɛmukaw ye, k'u ka masacɛ bɛ nana u fɛ, a y'a yɛrɛ majigi ka yɛlɛ faliden kan.”

⁶Kalanden nunu taar'a kɛ i n'a fɔ Yezu tun y'a fɔ u ye cogo min na.

⁷U nana ni falimuso n'a deen ye, k'u ka faniw la u kan. Yezu sigira faniw kan.

⁸Mɔgɔ caaman tora k'u ka faniw lala sira kan, dɔw tun bɛ yiri furaburu tigɛ k'o lala sira kan fana k'a bonya n'o ye.

⁹Jama min tun bɛ taama Yezu nyafɛ, ani minw tun b'a kɔfɛ, olu bɛɛ tun bɛ pɛrɛnna k'a fɔ ko: “An b'i tɔgɔ tando Dawuda dencɛ! E min bɛ nana Matigi tɔgɔ la, Ala ka barika don i la. Ala tɔgɔ ka tando arijana na.”

¹⁰Yezu donna Zeruzalɛmu dugu kɔnɔ tuma min na, dugu mɔgɔw bɛɛ nyagamina, u tun bɛ nyɔgɔn nyiningana ko cɛɛ nin ye jon ye.

¹¹U tun bɛ nyɔgɔn jaabi ko kira Yezu lo ka bɔ Nazarɛti, Galile mara la.

¹²Yezu donna Alabatosoba kɔnɔ waati min na, a ye feerekɛlaw, ni sannikɛlaw gwɛn ka bɔ yen, ka warifalenbagaw ka tabaliw ni jɛnɛtugan feerebagaw ka sigilanw nyɔnti k'u benben duguma.

¹³O kɔ, a y'a fɔ u ye ko a fɔra Ala ka kuma na ko: “Ne Ala ka soo bɛna kɛ dalili kɛyɔrɔ ye. Nga aw kɔni y'a kɛ soonw ka yɔrɔ ye.”

¹⁴Finyɛntɔw ni senkelenninw taara Yezu fɛ Alabatosoba kɔnɔ. Yezu y'u kɛnɛya.

¹⁵Sarakalasebagaw ani sariya karamɔgɔw y'o kabako kɛninw ye tuma min na, ani denmisɛnw tun bɛ pɛrɛn n'u b'a fɔra ko: “An b'i tando Dawuda dencɛ,” u dimina kosɛbɛ.

¹⁶U ye Yezu nyininga ko: “I ma denmisɛn nunu ka kuma mɛn wa?” Yezu y'u jaabi ko: “Ɔnhɔn, aw fana m'a mɛn Ala ka kuma na ka ye wa? A ko: ‘E y'e tandoli kuma don denmisɛnw ani dennyɛninw daa la.’ ”

¹⁷A y'o kuma fɔ ka ban, a y'u to yen ka bɔ dugu kɔnɔ ka taa si Betani.

¹⁸Sɔgɔmadafɛ Yezu tun bɛ kɔsegira ka taa Zeruzalɛmu, kɔngɔ y'a minɛ.

¹⁹A ye torosun dɔ ye sira daa la minkɛ, a gwɛrɛla a la k'a filɛ, nga a ma deen si sɔrɔ a la furaburu kɔ. Yezu y'a fɔ yiri nin ma ko: “A banna, ele kɔni tɛna deen kɛ tugu!” O waati yɛrɛ la yiri nin jara.

²⁰Kalandenw y'o ye minkɛ, u kabakoyara kosɛbɛ. U y'a nyininga ko a kɛra cogo di torosun nin jara yɔrɔnin kelen.

²¹Yezu y'u jaabi ko: “Tinyɛ na, ne b'a fɔ aw ye ko n'aw lara ne la, n'aw tɛ sigasiga fewu, ne ye min kɛ torosun na, aw bɛna se k'o nyɔgɔn kabakow kɛ. Aw bɛna dɔ wɛrɛw yɛrɛ kɛ ka tɛmɛ a kan. Hali n'aw y'a fɔ kulu nin ye ko: ‘Bɔ i lɔyɔrɔ la ka taa ben kɔgɔji kɔnɔ,’ o bɛn'a kɛ.

²²N'aw lara ne la, n'aw ye Ala dali fɛɛn o fɛɛn na, a bɛna o d'aw ma.”

²³Yezu taara Alabatosoba kɔnɔ. K'a to mɔgɔw kalan na, sarakalasebagaw ni Zuwifu ka cɛkɔrɔbaw nana k'a nyininga ko: “E bɛ koo minw kɛ, jon le y'o sira d'i ma? Jon le y'o kɛ see d'i ma?”

²⁴Yezu y'u jaabi ko: “Ne fana bɛna aw nyininga koo kelen dɔrɔn na. N'aw ye ne jaabi, o tuma na, min ye see di ne ma ka koo nunu kɛ, ne bɛna o fɔ aw ye.

²⁵Jon le tun ye Zan ci ka na mɔgɔw batize, Ala lo wa, walima mɔgɔw lo?” Nga u tora ka nyɔgɔn sɔsɔ gɛrɛfɛ k'a fɔ ko: “N'an y'a jaabi ko Ala lo, a bɛna an nyininga ko mun na an ma la a la?

²⁶Nga n'an y'a fɔ ko mɔgɔw lo fana, an bɛ siran jama nya, bari mɔgɔ bɛɛ tun lar'a la ko Zan ye kira ye.”

²⁷O la, u ye Yezu jaabi ko: “An t'o lɔn.” Ale fana y'a fɔ u ye ko: “N'o lo, mɔgɔ min ye sira di ne ma ka koo nunu kɛ, ne fana tɛna o fɔ aw ye.”

²⁸Yezu y'u nyininga tugu ko: “Aw bɛ mun le miiri nin na? Deen fila tun bɛ cɛɛ dɔ fɛ. A y'a fɔ deen fɔlɔ ye ko: ‘Bii, ne b'a fɛ i ka taa baara kɛ foro kɔnɔ.’

²⁹Deen fɔlɔ nin y'a jaabi ko: ‘Ne tɛna se ka taa.’ Dɔɔni a nimisara, a ye sira minɛ ka taa foro la.

³⁰Facɛ nin taara deen filanan fɛ, k'a fɔ ale ye fana, ale ko: ‘Ɔnhɔn baba, ne bɛna taa.’ Nga a ma taa.

³¹O deen fila nunu cɛma, jumɛn le ye o facɛ sago kɛ?” U y'a jaabi ko deen fɔlɔ kɛ. Yezu y'a fɔ u ye ko: “Ne b'a fɔ aw ye tinyɛ na ko wusuruminɛlaw ni kakalamusow bɛna kɔn ka don aw nya Ala ka mara kɔnɔ.

³²Bari Zan nana aw fɛ ka taamacogonyuman yira aw la. Aw ma sɔn o ma, nga wusuruminɛlaw ni kakalamusow sɔnna o ma. Aw y'o ye, aw ma sɔn k'aw dusu yɛlɛma ka la a la.”

³³Yezu y'a fɔ u ye tugu ko: “Aw y'aw tulo malɔ talen dɔ wɛrɛ la. Forotigi dɔ ye foro bɔ ka ɛrɛzɛnyiriw tutu yen. A ye kogo kɛ k'a koori, ka dingɛ sogi ka ɛrɛzɛn nin jii bɔyɔrɔ dilan, ka sangaso lɔ a kɔlɔsibagaw ye. A y'a don baarakɛla dɔw bolo. O kɔ, a taara taama na.

³⁴Ɛrɛzɛn mɔna tuma min na, a y'a ka jɔɔnw ci baarakɛla nunu fɛ k'u ka taa ale niyɔrɔ minɛ.

³⁵Baarakɛla nunu y'o jɔɔnw minɛ, ka kelen bugɔ kosɛbɛ, ka kelen faga ani ka tɔ kelen nin bon ni kabakuruw ye.

³⁶Forotigi y'a ka jɔɔn dɔ wɛrɛw ci minw cayara ni fɔlɔtaw ye. Baarakɛla nunu y'olu minɛ k'u kɛ i n'a fɔ u tun ye fɔlɔtaw kɛ cogo min na.

³⁷A laban na, a y'a dencɛ ci u ma, a tun y'a fɔ a yɛrɛ kɔnɔ ko: ‘U bɛna ale bonya, bari n dencɛ lo.’

³⁸Nga baarakɛlaw y'o ye tuma min na, u y'a fɔ nyɔgɔn ye ko: ‘A ka cɛntala filɛ, an k'a faga. A ka cɛɛn bɛna kɛ an ta ye.’

³⁹U y'a sama ka bɔ n'a ye foro kɔnɔ k'a faga k'a fili yen.”

⁴⁰Yezu y'u nyininga ko: “Sisan ni forotigi nana tuma min na, a bɛna mun le kɛ o baarakɛlaw la?”

⁴¹U y'a jaabi ko: “Wajibi lo, a tɛna makari o mɔgɔjugu nunu na, a bɛna u faga, k'a ka foro kalifa baarakɛla dɔ wɛrɛw ma, o minw bɛn'a ka niyɔrɔ d'a ma ɛrɛzɛnmɔtuma na.”

⁴²O kɔ, Yezu y'a fɔ u ye ko: “Min fɔra Ala ka kuma na, aw m'o mɛn ka ye wa? Ko: ‘Bonlɔlaw tun banna kabakuru min na, ale lo nana kɛ jigilakabakuru ye ka boon nin kogo tilen. O ye Matigi ka baara ye, a kɛra kabako ye an nyana.’ ”

⁴³Yezu y'a fɔ u ye tugu ko: “Ne b'a fɔ aw ye k'o cogo la, Ala ka koo nyamɔgɔya bɛna bɔsi aw la, ka di siya wɛrɛw ma. Olu bɛna kɛwalinyuman kɛ. [

⁴⁴Ni mɔgɔ min benna o kabakuru nin kan, o tigi kolow bɛna karikari, nga n'o kabakuru nin benna mɔgɔ min kan, a bɛna o tigi nyɔnyɔ.]”

⁴⁵Sarakalasebagaw ani Farizinyɛw ye Yezu ka talen nunu mɛn ka ban tuma min na, u y'a faamu ko Yezu tun bɛ kuma olu le koo la.

⁴⁶U tun bɛ cogoya nyinina waasa ka Yezu minɛ, nga u siranna jama nya, bari olu bɛɛ tun bɛ Yezu jati kira ye.