Read LAYIDUKURA MATIYO 23 Bible Online

MATIYO 23 - LAYIDUKURA bible

MATIYO 23

¹Yezu tun bɛ kumana a ka kalandenw ni jama fɛ. A tun y'a fɔ u ye ko:

²“Ala ye sariya min di Musa ma, sariya karamɔgɔw ni Farizinyɛw le ka kan ka mɔgɔw kalan o la.

³N'u y'aw kalan ni sariya koo min ye, aw k'o kɛ. Nga aw kana u ka kɛwali filɛ, bari u bɛ min fɔ, u t'o kɛ.

⁴U bɛ doni gwiliman siri k'o la mɔgɔw kuun na, nga olu yɛrɛ tɛ sɔn k'u dɛmɛ haali dɔɔni.

⁵U ka koo bɛɛ kɛra tɔgɔnyini ye. O le y'a to u bɛ sɛbɛ minw bɛɛ siri u teen na, ani u bolo la, u bɛɛ ka bonbon. U b'u ka faniw kalan ka masirifɛn kɛ u la.

⁶Sigiyɔrɔnyuman koo le ka d'u ye, forobadumuni kɛyɔrɔw la, ani Alabatoso kɔnɔ nyafɛ sigiyɔrɔnyumanw.

⁷Jamayɔrɔw la, u b'a fɛ ko mɔgɔw k'u fo i n'a fɔ mɔgɔbaw, ani k'u wele karamɔgɔ.

⁸Nga aw kɔni, aw kana sɔn u b'aw wele karamɔgɔ, bari aw bɛɛ ye balimaw ye, aw bɛɛ ka karamɔgɔ ye kelen ye.

⁹Aw kana mɔgɔ si wele ko aw facɛ, dugukolo kan, bari aw Facɛ ye kelen ye, Ala min bɛ sankolo la.

¹⁰Aw kana sɔn u b'aw wele ko kuntigi, bari aw ka kuntigi ye kelen ye, o ye Ala ka Mɔgɔwolomanin nin ye.

¹¹Mɔgɔ min ye mɔgɔba ye aw cɛma, o ka kan ka kɛ aw ka baaraden ye.

¹²Ni mɔgɔ min b'a yɛrɛ majigi, Ala bɛna o tigi kɔrɔta, ni mɔgɔ min b'a yɛrɛ kɔrɔta, Ala bɛna o tigi majigi.

¹³“Bɔnɛ y'aw ta ye, aw sariya karamɔgɔw ni Farizinyɛ nanbaranmɔgɔw, bari aw bɛ Ala ka masaya yɔrɔ donda tugu, aw tɛna don, minw b'a fɛ ka don fana, aw t'a to olu fana ka don.

¹⁴[Bɔnɛ y'aw ta ye, aw sariya karamɔgɔw ni Farizinyɛ nanbaranmɔgɔw, bari aw bɛ firiyamusow bololafɛnw bɛɛ bɔsi u la, o kɔ, aw bɛ mɛn Ala dali la, waasa k'aw yɛrɛ yira mɔgɔsɛbɛw ye. O la, aw ka jalaki tɔɔrɔ bɛna bonya kosɛbɛ.]

¹⁵Bɔnɛ y'aw ta ye, aw sariya karamɔgɔw ni Farizinyɛ nanbaranmɔgɔw, aw bɛ kɔgɔji tigɛ ka taa dugukolo faan bɛɛ la ka tuubiden nyini. Ni dɔ sɔrɔla, aw b'a kɛ jahanamaden ye ka tɛmɛ aw yɛrɛ kan fɔɔ sinyɛ fila.

¹⁶Aw sirayirabaga finyɛntɔw, bɔnɛ y'aw ta ye. Aw b'a fɔ ko ni mɔgɔ dɔ kalila Alabatosoba la, k'o tɛ jati, nga ko ni mɔgɔ min kalila Alabatosoba kɔnɔ sanu na, k'o le bɛ jati.

¹⁷Naloman ni finyɛntɔw, jumɛn le ka fisa u fila la: sanu wa, walima Alabatosoba?

¹⁸Aw b'a fɔ fana ko ni mɔgɔ kalila sarakabɔlan na, k'o tɛ jati, nga ko saraka min b'a kan, ko ni mɔgɔ kalila o la, k'o le bɛ jati.

¹⁹Finyɛntɔ nunu, jumɛn ka fisa u fila la: saraka wa, walima sarakabɔlan?

²⁰Ayiwa, mɔgɔ min bɛ kali sarakabɔlan na, o tigi kalila a sanfɛ saraka fana na.

²¹Mɔgɔ min bɛ kali Alabatosoba la, o tigi kalila Ala fana na.

²²Mɔgɔ min bɛ kali sankolo la, o tigi kalila Ala ka masasigilan na, ani Ala min siginin bɛ o kan.

²³Bɔnɛ b'aw ye, aw sariya karamɔgɔw ni Farizinyɛ nanbaranmɔgɔw, aw bɛ nanaye, ani nanfuraburu sifa bɛɛ jaka bɔ. Nga sariya ka koo minw ka gwɛlɛ, i n'a fɔ tilenninya, ni makari ani kantigiya, aw tɛ olu labato. Aw tun ka kan ka olu le kɛ fɔlɔ ka dɔ nunu fara o kan.

²⁴Sirayirabaga finyɛntɔw, aw b'aw ka minji sɛnsɛn ka limɔgɔmisɛnw bɔ, ka sɔrɔ k'o min, k'a sɔrɔ aw bɛ nyɔgɔmɛ kunu.

²⁵Bɔnɛ b'aw ye, aw sariya karamɔgɔw ani Farizinyɛ nanbaranmɔgɔw, aw bɛ filen ni tasa kɔfɛlaw ko k'o gwɛ, nga u kɔnɔ fanin bɛ aw ka sonyalifɛnw na, ani aw ka miirijuguw la.

²⁶Farizinyɛ finyɛntɔ, i ka filen kɔnɔ ko fɔlɔ, ka sɔrɔ k'a kɔfɛla ko.

²⁷Bɔnɛ b'aw ye, aw sariya karamɔgɔw ni Farizinyɛ nanbaranmɔgɔw, aw minw bɛ i n'a fɔ kaburu, u ye min dilan k'a kɛ gwɛman ye. Kɛnɛmala filɛ ka di nyaa na, nga a kɔnɔna bɛɛ fanin lo kolo, ni nyamanyama sifa bɛɛ la.

²⁸Aw fana bɛ ten, kɛnɛma aw kɛra mɔgɔnyumanw ye, nga nanbaran, ani juguya jiidinin bɛ aw kɔnɔ.

²⁹“Bɔnɛ y'aw ta ye, aw sariya karamɔgɔw ni Farizinyɛ nanbaranmɔgɔw, aw minw bɛ kiraw ka kaburuw lalaga k'u lɔ ka nya. Mɔgɔ minw tun kɛra mɔgɔtilenninw ye Ala sira la, aw bɛ olu ka kaburuw masiri ni feerennyumanw ye.

³⁰Aw bɛ sɔrɔ k'a fɔ ko n'aw tun bɛ yen aw bɛmaw ka waati la, ko aw tun tɛna sɔn k'u dɛmɛ ka kira nunu faga.

³¹O cogo la, aw b'a yira aw yɛrɛ ma ko aw kɛra kira nunu fagabagaw ka deenw ye.

³²O ka nyi, aw ka taa nya ka aw bɛmaw ka kɛwali tɔɔ dafa.

³³Aw bɛ i n'a fɔ saaw, fɔnfɔnniden nunu, aw bɛn'a kɛ cogoya jumɛn na ka tila jahanama tasuma na?

³⁴Ayiwa, aw ye mɛnni kɛ. Ne bɛna n ka ciradenw ci aw ma, hakilitigiw ani mɔgɔkalanninw. Aw bɛna dɔw faga ka dɔw gwengwen lɔgɔ kan, ka dɔw bugɔ ni golokami ye Alabatosow kɔnɔ, ani aw bɛna tugu dɔw kɔ ka taa u tɔɔrɔ dugu wɛrɛw la.

³⁵Mɔgɔtilennin minw fagara, olu ka fagako jalaki bɛna ben aw kan, k'a ta Abɛli ma, ale min tun kɛra mɔgɔtilennin ye, fɔɔ ka na se Barasi dencɛ Zakari ma, aw tun y'o min faga Alabatosoba yɔrɔ senuman ni sarakabɔlan cɛ.

³⁶Ne b'a fɔ aw ye tinyɛ na k'olu ka fagako kunkow bɛna la bii mɔgɔw kan.”

³⁷Yezu y'a fɔ ko: “Zeruzalɛmukaw, Zeruzalɛmukaw, aw minw bɛ kiraw faga, ka Ala ka cidenw bon ni kabakuru ye k'u faga, sinyɛ joli ne tun b'a fɛ k'aw lajɛn n kɔrɔ, i n'a fɔ sisɛ b'a deenw lajɛn a gamanw kɔrɔ cogo min na, aw ma sɔn.

³⁸Ayiwa, aw ka dugu lakolon bɛna to aw fɛ.

³⁹O la, ne b'a fɔ aw ye ko aw tɛna ne ye tugu, fɔɔ loon min na aw bɛn'a fɔ ko: ‘Mɔgɔ min natɔ ye, Matigi ka barika don o la.’ ”