Read LAYIDUKURA MATIYO 27 Bible Online

MATIYO 27 - LAYIDUKURA bible

MATIYO 27

¹Dugu gwɛra tuma min na, sɔgɔmadafɛ, sarakalasebagaw ni cɛkɔrɔbaw ye nyɔgɔnye kɛ ka bɛn a la k'u bɛna Yezu faga.

²U ye Yezu siri ka ta'a di masacɛ ka lasigiden Pilati ma.

³Zuda min tun ye Yezu don bolo la, a y'a mɛn ko Yezu bɛna faga minkɛ, a nimisara kosɛbɛ ka taa ni warigwɛ bi saba nunu ye sarakalasebagaw ni cɛkɔrɔbaw fɛ,

⁴k'a fɔ u ye ko: “Ne ye kojugu kɛ ka mɔgɔ jalakibali don aw bolo n'a bɛna faga.” Olu y'a jaabi ko: “O tɛ an ka sira la, o y'i ka koo ye.”

⁵Zuda ye wari nin fili Alabatosoba kɔnɔ ka tɛmɛ ka taa a yɛrɛ kaan don juru la.

⁶Sarakalasebagaw ye wari nin cɛ k'a fɔ nyɔgɔn ye ko: “A daganin tɛ an ka nin wari nin nyɔgɔn don Alabatosoba kɛsu la, bari mɔgɔ dɔ ka nii sɔngɔ lo.”

⁷O kɔ, u bɛnna a la k'u bɛna o wari ta ka taa dagadilanbaga ka foro san n'o ye, waasa o yɔrɔ ka kɛ lonanw suu donyɔrɔ ye.

⁸O le y'a to, fɔɔ ka na se bii ma, u b'o yɔrɔ nin wele ko Nisɔngɔ foro.

⁹O cogo la, kira Zeremi tun ye min fɔ, o kɛra. A tun ko: “U ye warigwɛ bi saba ta, o min kɛra mɔgɔ tilennin ka nii sɔngɔ ye, Isirayɛlidenw bɛɛ tun sɔnna o min na.

¹⁰U y'o wari di dagadilanbaga ma a ka foro sɔngɔ ye, i n'a fɔ Matigi tun y'a latigɛ cogo min na.”

¹¹Yezu lɔra masacɛ ka lasigiden nyafɛ. Lasigiden y'a nyininga ko: “I ye Zuwifuw ka masacɛ ye wa?” Yezu y'a jaabi ko: “E ko ten.”

¹²Sarakalasebagaw ni cɛkɔrɔbaw tun bɛ galon minw lara a kan waasa k'a jalaki, a ma sɔn ka foyi fɔ o koo la.

¹³Pilati y'a fɔ a ye ko: “Mɔgɔ nunu bɛ minw fɔra i koo la, i t'o mɛnna wa?”

¹⁴Nga Yezu ma sɔn k'a jaabi. O yɔrɔ la masacɛ ka lasigiden kabakoyara kosɛbɛ.

¹⁵Hɔrɔnya nyanagwɛ o nyanagwɛ la, masacɛ ka lasigiden Pilati tun bɛ deli ka kasoden dɔ labila, ka kɛnyɛ ni jama ka lanyini ye.

¹⁶O waati la, cɛɛ dɔ tun bɛ kaso la, o min tɔgɔjugu tun bɔra kosɛbɛ, a tɔgɔ tun ko Barabasi.

¹⁷Pilati ye jama nyininga ko: “Aw b'a fɛ ne ka Barabasi labila wa, walima Yezu, u ko Ala ye min woloma?”

¹⁸Bari a tun y'a lɔn ko nyagoya le y'a to u y'a minɛ ka na n'a ye ale fɛ.

¹⁹K'a to kiti tigɛyɔrɔ la, a ka muso ye cii bila k'a fɔ a ye ko: “I kana i niin don mɔgɔtilennin nin ka koo la, bari kunun sufɛ ne ye sigojugu kɛ a koo la.”

²⁰Sarakalasebagaw ni cɛkɔrɔbaw ye jama kɔnɔnasu, waasa u ka Pilati dali ko a ka Barabasi labila ka Yezu faga.

²¹A y'u nyininga tugu ko: “U mɔgɔ fila la, aw b'a fɛ ne ka jon le labila?” U y'a jaabi ko Barabasi.

²²A y'u nyininga ko: “Ne ka mun kɛ Yezu la u bɛ min wele Ala ka Mɔgɔwolomanin?” U y'a jaabi ko: “A ka kan ka gwengwen lɔgɔ kan.”

²³A y'u nyininga ko: “A ye kojugu jumɛn le kɛ min kɔsɔn a ka kan ka faga?” U pɛrɛnna kosɛbɛ ko: “A ka kan ka gwengwen lɔgɔ kan.”

²⁴Pilati y'a ye ko jama bɛ murutira ka taa minkɛ, ko ale tɛna se ka foyi kɛ, a ye jii nyini k'a tigɛ ko u bɛɛ nyana, k'a fɔ u ye ko: “Ne seen tɛ mɔgɔtilennin nin ka fagako la, o y'aw yɛrɛ ka koo ye.”

²⁵Jama bɛɛ y'a fɔ ko: “An kɔni n'an deenw bɛ lɔ n'a ka saya kunko ye.”

²⁶O kɔ, a ye Barabasi labila, ka sira di k'u ka Yezu bugɔ, ka sɔrɔ ka ta'a gwengwen lɔgɔ kan.

²⁷Masacɛ ka lasigiden ka sɔlidasiw taara ni Yezu ye a ka luu kɔnɔ, ka sɔlidasi tɔw bɛɛ wele k'a lɔ u cɛma.

²⁸U y'a ka fani bɔ a kaan na ka fani wuleman dɔ don a la.

²⁹U ye ;nɔni tigɛ k'o meleke k'o kɛ i n'a fɔ masafugulan, k'a don a kuun na. U ye bere dɔ don a bolo la, n'u bɛ to k'u kunbiri gwan a kɔrɔ, ka to ka yɛlɛ a ma, k'a fɔ a ye ko: “I dansɛ, Zuwifuw ka masacɛ,”

³⁰ka to k'u daji tutu a kan, ani ka bere nin minɛ a la k'a bugɔbugɔ a kuun na.

³¹U y'a lɔgɔbɔ ka ban tuma min na, u ye dulokiwulen nin bɔ a kaan na, k'a ka fani don a ye. O kɔ, u taara n'a ye gwengwenyɔrɔ la.

³²U taatɔ, u ye cɛɛ dɔ kunbɛn min tun ye Sirɛnika ye ka bɔ Libi jamana na, a tɔgɔ ko Simɔn. U y'ale karaba ka Yezu ka gwengwenlɔgɔ ta.

³³U taara se yɔrɔ dɔ la u bɛ min wele ko Gɔligota, o kɔrɔ ko kungolo yɔrɔ.

³⁴U ye duvɛn nyagami ni kunakuna ye, k'u b'o di Yezu ma waasa a k'o min. Yezu y'o nɛnɛ tuma min na, a ma sɔn k'a min.

³⁵U y'a gwengwen ka ban tuma min na, u ye kala bon[6] ka Yezu ka faniw tilantilan ka kɛnyɛ n'o ye.

³⁶U bɛɛ tun sigira n'u b'a kɔlɔsira.

³⁷U tun y'a fagakun sɛbɛn k'o gwengwen a kuun sanfɛ. A tun sɛbɛnna ko: “Nin ye Yezu ye, Zuwifuw ka masacɛ.”

³⁸Benkannikɛla mɔgɔ fila tun gwengwenna a gɛrɛfɛ fana. Kelen tun b'a kinibolo la, tɔ kelen a numanbolo la.

³⁹Mɔgɔ minw tun bɛ tɛmɛna, olu tun bɛ Yezu nɛni ka to k'u kuun karikari.

⁴⁰U tun b'a fɔra ko: “E min bɛ se ka Alabatosoba ci, ani ka tila k'a lɔ tile saba kɔnɔ, e k'i yɛrɛ kisi. N'i ye Ala Deen ye, i ka jigi ka bɔ gwengwenlɔgɔ kan.”

⁴¹Sarakalasebagaw ni sariya karamɔgɔw ani cɛkɔrɔbaw tun b'a lɔgɔbɔra fana ko:

⁴²“A ye mɔgɔ dɔw kisi, nga a tɛ se k'a yɛrɛ kisi. N'a ye Isirayɛli ka masacɛ ye, a ka jigi ka bɔ gwengwenlɔgɔ kan. O la, an bɛna la a la.

⁴³A y'a jigi bɛɛ la Ala kan k'a fɔ ko ale ye Ala Deen ye. An k'a filɛ sisan ni Ala bɛn'a kisi.”

⁴⁴O cogo la, benkannikɛla minw tun gwengwenna a gɛrɛfɛ, olu tun b'a nɛni fana.

⁴⁵Tilegwangwanfɛ, dibi donna yɔrɔ bɛɛ la, fɔɔ ka taa se tile sumawaati ma.

⁴⁶Tile sumana tuma min na, Yezu pɛrɛnna k'a fɔ ko: “Eli, Eli, lamasabakitani”, o kɔrɔ ko: “Ne ka Ala, ne ka Ala, mun na e bɔra ne kɔ?”

⁴⁷Mɔgɔ minw tun lɔnin bɛ yen, olu dɔw y'o mɛn minkɛ, u y'a fɔ ko a bɛ kira Eli welela.

⁴⁸Olu dɔ bolila ka taa fuu ta, k'a don kumuji la k'a siri kalajan dɔ la, ko a bɛna o d'a ma a k'a min.

⁴⁹A tɔnyɔgɔnw y'a fɔ a ma ko: “A to yen, an bɛn'a filɛ ni Eli bɛna n'a kisi.”

⁵⁰O kɔ, Yezu kulera kosɛbɛ ka sɔrɔ ka sa.

⁵¹O yɔrɔnin bɛ, Alabatosoba cɛtigɛfani faranna fila ye, k'a ta a sanfɛ fɔɔ duguma. Dugukolo yɛrɛyɛrɛla, kabakuruw cicira.

⁵²Kaburuw daa yɛlɛla. Ala ka mɔgɔ minw tun sara, olu caaman kununna.

⁵³Olu bɔra kaburuw la ka don dugu senuman kɔnɔ Yezu kununnin kɔ. Mɔgɔ caaman y'u ye.

⁵⁴Sɔlidasi kuntigi min tun bɛ Yezu kɔlɔsira n'a ka sɔlidasiw ye, olu ye dugukolo ye a yɛrɛyɛrɛla, ani koo minw kɛra o waati la, u y'o bɛɛ ye, u siranna kosɛbɛ. U y'a fɔ ko tinyɛ na, cɛɛ nin tun ye Ala Deen ye.

⁵⁵Muso caaman tun lɔra yɔrɔjan ka to k'o filɛ. O muso nunu tun tugura Yezu kɔ ka bɔ Galile mara la, waasa k'a dɛmɛ.

⁵⁶O muso nunu cɛma, Mariyamu ka bɔ Magidala tun bɛ yen, ni Zaki ani Yusufu bamuso Mariyamu, ni Zebede muso.

⁵⁷Wuladafɛ, nafolotigi dɔ nana, Arimateka tun lo, a tɔgɔ tun ko Yusufu. Ale fana tun ye Yezu ka kalandenw dɔ ye.

⁵⁸O cɛɛ nin taara Pilati fɛ ka Yezu suu dali. Pilati k'u k'a d'a ma.

⁵⁹Yusufu taara Yezu suu ta k'a meleke fanikura gwɛman kɔnɔ,

⁶⁰ka ta'a don a yɛrɛ ka kaburu kɔnɔ, a tun y'o min bɔ fara la a yɛrɛ ka suturali kama. A ye kabakuru belebele dɔ kolonkolon ka kaburu datugu n'o ye, ka sɔrɔ ka taa.

⁶¹O y'a sɔrɔ, Mariyamu ka bɔ Magidala, ni Mariyamu dɔ nin tun bɛ yen. Olu tun siginin bɛ kaburu nyafɛ.

⁶²O dugusagwɛ, n'o kɛra lafinyɛlon ye, sarakalasebagaw ni Farizinyɛw ye nyɔgɔn lajɛn ka taa Pilati fɛ.

⁶³U y'a fɔ a ye ko: “An hakili jigira a la ko galontigɛla nin tun y'a fɔ ko n'ale sara, ko ale bɛna kunun a tile sabanan loon.

⁶⁴O la, an b'a fɛ i ka sira di kaburu daa ka kɔlɔsi fɔɔ ka taa se tile saba, bari an bɛ siran, a ka kalandenw kana taa a suu bɔ, ka tila k'a fɔ jama ye ko a kununna. O galon bɛna juguya ka tɛmɛ fɔlɔta kan.”

⁶⁵Pilati y'a fɔ u ye ko: “Kɔlɔsilikɛbaga bɛ aw fɛ fana. Aw ye taa ka kaburu daa kɔlɔsi ka kɛnyɛ n'aw seko ye.”

⁶⁶U taara taamasinyɛ kɛ kabakuru kan. O kɔ, u ye kɔlɔsilikɛbagaw bila k'olu ka kaburu kɔlɔsi.