Read LAYIDUKURA MATIYO 28 Bible Online

MATIYO 28 - LAYIDUKURA bible

MATIYO 28

¹Lafinyɛlon tɛmɛna, lɔgɔkun daminɛlon sɔgɔmadafɛ, Mariyamu ka bɔ Magidala ni Mariyamu dɔ nin taara kaburu yɔrɔ la.

²O yɔrɔnin bɛ, dugukolo yɛrɛyɛrɛla kosɛbɛ. Ala ka mɛlɛkɛ dɔ jigira ka kabakuru kolonkolon k'a bɔ kaburu daa la, ka sigi a kan.

³Mɛlɛkɛ nin nyada tun bɛ manamana i n'a fɔ saan manamanatɔ, a ka fani tun gwɛra parapara.

⁴Kɔlɔsilikɛbagaw siranna kosɛbɛ fɔɔ u yɛrɛyɛrɛla ka kirin.

⁵Mɛlɛkɛ y'a fɔ muso nunu ye ko: “Aw kana siran, bari ne y'a lɔn ko aw bɛ Yezu le yɔrɔ nyinina, u tun ye min gwengwen lɔgɔ kan.

⁶A tɛ yan tugu, bari a kununna i n'a fɔ a tun y'a fɔ cogo min na. Aw ye na a layɔrɔ filɛ.

⁷Aw ye teliya ka ta'a fɔ a ka kalandenw ye ko a kununna, a ko a bɛ taa aw nya Galile mara la. Aw bɛna ta'a sɔrɔ o yɔrɔ la. Koo min tun bɛ ne fɛ k'a fɔ aw ye, o le ye nin ye.”

⁸Muso nunu siranna ka teliya ka bɔ kaburu la. U nisɔn nana diya, u bolila k'u bɛ taa o kibaru fɔ Yezu ka kalandenw ye.

⁹O yɔrɔnin bɛ, Yezu y'u kunbɛn k'a fɔ u ye ko: “Aw dansɛ.” U gwɛrɛla a la k'u kunbiri gwan a kɔrɔ, k'a bato.

¹⁰Yezu y'a fɔ u ye ko: “Aw kana siran, aw ye ta'a fɔ n balimaw ye k'u ka taa Galile, k'u bɛna n ye o yɔrɔ le la.”

¹¹Ka muso nunu to sira la, kɔlɔsilikɛbaga nunu dɔw taara dugu kɔnɔ, k'o koow bɛɛ lakali sarakalasebagaw ye.

¹²Olu ni cɛkɔrɔbaw ye nyɔgɔnye kɛ, ka bɛn a la, ka wari caaman di kɔlɔsilikɛbagaw ma,

¹³k'a fɔ u ye ko: “Aw ka to k'a fɔ ko k'aw to sinɔgɔ la sufɛ, a ka kalandenw nana k'a suu bɔ ka taa n'a ye.

¹⁴N'o koo mana se masacɛ ka lasigiden ma tuma min na, an bɛna koo bɛɛ kɛ k'a dusu suma, waasa a kana kojugu kɛ aw la.”

¹⁵Kɔlɔsilikɛbagaw y'o wari minɛ, k'a daminɛ k'o kibaru jɛnsɛn i n'a fɔ u tun y'a nyini u fɛ cogo min na. O cogo la, o kibaru sera yɔrɔ bɛɛ la Zuwifuw cɛma fɔɔ ka na se bii ma.

¹⁶Yezu ka kalanden tan ni kelen nunu taara Galile, A tun ye kulu min koo fɔ u ye, u taara ale kan.

¹⁷U ye Yezu ye tuma min na, u y'a bato, nga u dɔw sigasigara.

¹⁸Yezu gwɛrɛla u la k'a fɔ u ye ko: “Ala ye sebagaya bɛɛ di ne ma sankolo la ani dugukolo kan.

¹⁹O la, aw ye taa siyaw bɛɛ kɛ ne ka kalandenw ye k'u batize Faa, ni Dencɛ ni Nii Senuman tɔgɔ la,

²⁰k'u kalan, waasa u ka ne ka kuma labato. Ne kɔni bɛna to n'aw ye loon o loon fɔɔ ka taa dinyɛ wili.”