Read LAYIDUKURA MATIYO 3 Bible Online

MATIYO 3 - LAYIDUKURA bible

MATIYO 3

¹O waati la, Zan batizelikɛla tun bɛ waajuli kɛ Zude kongo kɔnɔ.

²A tun b'a fɔ mɔgɔw ye ko: “Aw ye nimisa ka faran aw ka kojuguw la, bari Sankolo tigi ka masaya waati surunyana.”

³Kira Ezayi tun ye mɔgɔ min koo fɔ ko: “Mɔgɔ dɔ bɛ pɛrɛnna kongo kɔnɔ ko: ‘Aw ka Matigi ka sira dilan k'a tilen,’ ” o ye Zan ye.

⁴Zan ka fani tun ye nyɔgɔmɛsi ye, a ka cɛsirilan tun ye golo ye, ani a tun b'a yɛrɛ balo ni tɔɔn ni lii ye.

⁵Mɔgɔw tun bɛ bɔ Zurudɛn baa daa la ani Zeruzalɛmu ni Zude mara faan bɛɛ la ka taa Zan sɛgɛrɛ.

⁶U tun ye kojugu minw kɛ, u tun b'olu fɔ kɛnɛ kan, o kɔ, Zan tun b'u batize Zurudɛn baji la.

⁷Zan y'a ye ko Farizinyɛ caaman ni Sadusenyɛ caaman bɛ nana batize ale fɛ minkɛ, a y'a fɔ u ye ko: “Aw fɔnfɔnnidenw, jon y'aw lasɔmi ko aw ka boli Ala ka kiti nata nya?

⁸Aw ka kɛwalinyumanw kɛ k'a yira ko aw nimisara ka faran aw ka kojuguw la.

⁹Aw kan'a fɔ aw yɛrɛ kɔnɔ ko Ala bɛna aw kisi bari Ibrayima ye aw faa ye. Ne b'a fɔ aw ye ko Ala bɛ se ka kabakuru nunu yɛlɛma k'u kɛ Ibrayima deenw ye.

¹⁰Jende labɛnnin lo yiriw tigɛli kama. Yiri o yiri tɛ dennyuman kɛ, o bɛɛ bɛna tigɛ ka fili tasuma na.

¹¹“Ne b'aw batize ni jii ye k'a yira ko aw nimisara ka faran aw ka kojuguw la. Nga, min bɛna na ne kɔ, o ka sebagaya ka bon ni ne ta ye. K'a ka sanbara bɔ a seen na, ne kuun ka dɔgɔ o ma. Ale bɛna aw batize ni Nii Senuman ni tasuma ye.

¹²A ka sumanfiyɛminan b'a bolo. A bɛn'a ka suman gosinin fiyɛ k'a kisɛ don a ka bondo kɔnɔ k'a nyaga jɛni tasuma fagabali la.”

¹³O tuma na, Yezu bɔra Galile mara la ka taa Zan sɛgɛrɛ Zurudɛn baa daa la ko a k'ale batize.

¹⁴Zan tun b'a fɛ ka ban, o la, a y'a fɔ Yezu ye ko: “E lo ka kan ka ne batize. E do nana ne sɛgɛrɛ ko ne k'i batize cogo di?”

¹⁵Yezu y'a fɔ a ye ko: “A to a ka kɛ ten fɔlɔ, bari a bɛnnin lo an ka Ala ka kuma bɛɛ labato.” Zan sɔrɔla ka sɔn.

¹⁶Yezu batizenin kɔ, a bɔra jii la. O yɔrɔnin bɛ sankolo dayɛlɛla. Yezu ye Ala Nii jigitɔ ye a yɛrɛ kan i n'a fɔ tubanin bɛ cogo min na.

¹⁷Kumakan dɔ bɔra sankolo la k'a fɔ ko: “Nin ye ne Dencɛ ye. A koo ka di ne ye haali. A diyara ne ye, n y'a woloma.”