Read LAYIDUKURA MATIYO 5 Bible Online

MATIYO 5 - LAYIDUKURA bible

MATIYO 5

¹Yezu ye jama ye minkɛ, a yɛlɛla kulu kan ka sigi. A ka kalandenw gwɛrɛla a la.

²A y'a daminɛ k'u kalan. A ko:

³“Mɔgɔ minw b'a lɔn k'u mako bɛ Ala la, olu ye dubadenw ye, bari sankolo tigi ye u ka masa ye.

⁴Mɔgɔ minw bɛ kasira, olu ye dubadenw ye, bari Ala bɛna u dusu saalon.

⁵Mɔgɔ minw sabalinin lo, olu ye dubadenw ye, bari u bɛna dugukolo tɔnɔ sɔrɔ.

⁶Ala sago kɛli nigɛ bɛ minw na i n'a fɔ kɔngɔ ni minnɔgɔ, olu ye dubadenw ye, bari Ala bɛna see d'u ma k'a kɛ.

⁷Mɔgɔ minw bɛ makari tɔw la, olu ye dubadenw ye, bari Ala bɛna makari u la.

⁸Mɔgɔ minw kɔnɔ gwɛnin lo, olu ye dubadenw ye, bari u bɛna Ala ye.

⁹Hɛrɛnyinibagaw ye dubadenw ye, bari u bɛna wele ko Ala deenw.

¹⁰U bɛ minw tɔɔrɔ u ka tilenninya kɔsɔn, olu ye dubadenw ye, bari sankolo tigi ye u ka masa ye.

¹¹“Ni mɔgɔw b'aw nɛni, k'aw tɔɔrɔ, ka galon la aw kan ko aw bɛ kojugu sifa bɛɛ kɛ, bari aw ye ne ka kalandenw ye, o tuma na, aw ye dubadenw ye.

¹²Aw ka nisɔndiya kosɛbɛ, bari aw bɛna tɔnɔba sɔrɔ sankolo la. Kira minw tɛmɛna aw nya, u ye olu fana tɔɔrɔ ten.

¹³“Aw kɛra dinyɛ ka kɔgɔ ye. Nga ni kɔgɔ ka timiya bɔra a la, a bɛ mun nya tugu? A tɛ foyi nya tugu. A ka nyi ka fili le, mɔgɔw ka taama a kan.

¹⁴Aw kɛra i n'a fɔ yeelen dinyɛ kɔnɔ. Dugu min siginin bɛ kulu kan, o tɛ se ka dogo.

¹⁵Mɔgɔ si tɛ lanpan mana k'a bila daga jukɔrɔ, nga a b'a bila fɛɛn dɔ kan janko a ka yeelen bɔ soo kɔnɔ mɔgɔw bɛɛ ye.

¹⁶Aw ka kɛwalinyumanw kɛ ka yeelen bɔ mɔgɔw ye ten, waasa u ka aw sankolo la Faa bonya.

¹⁷“Sariya minw sigira aw ye Musa ka waati la, aw kan'a miiri ko ne nana olu bɔ yen, ani ka kiraw ka kuma cɛn. Nga ne nana janko u tun y'a fɔ ko koo minw bɛna kɛ, olu ka kɛ.

¹⁸Tinyɛ na, ne b'a fɔ aw ye ko ka sankolo ni dugukolo to yen, Ala ye sariya minw sigi, foyi tɛna bɔ u la, hali kuma kelen tɛna yɛlɛma u la, a bɛɛ ka kan ka labato fɔɔ a bɛɛ ka kɛ.

¹⁹O le y'a to, sariya minw sigira, min koo ka nɔgɔ u bɛɛ ye, ni mɔgɔ min t'o labato, n'a b'a fɔ mɔgɔw ye k'u kan'a labato, o tigi tɛna jati mɔgɔba ye sankolo tigi nyakɔrɔ. Nga, ni mɔgɔ min b'o sariyaw labato, n'a b'a fɔ mɔgɔw ye k'u k'o labato, o tigi bɛna jati mɔgɔba ye sankolo tigi nyakɔrɔ.

²⁰Ne b'a fɔ aw ye ko ni aw ka tilenninya ma tɛmɛ sariya karamɔgɔw ni Farizinyɛw ta kan, aw tɛna se ka don arijana na fewu.

²¹“Aw b'a lɔn ko a fɔra an faaw ye ko: ‘I kana mɔgɔ faga,’ ko mɔgɔfagala ka kan ka kiti.

²²Ayiwa, ne b'a fɔ aw ye ko ni mɔgɔ o mɔgɔ dimina a balima kɔrɔ, o tigi ka kan ni kiti ye. Ni mɔgɔ min y'a balima nɛni ko naloman, o tigi fana ka kan ni kiti ye. Ni mɔgɔ min y'a balima nɛni ko fatɔ, o tigi ka kan ni jahanama tasuma ye.

²³O kama, n'i b'i ka saraka bɔ Ala ye, n'i hakili jigira a la ko i balima dɔ diminin bɛ i kɔrɔ,

²⁴i k'i ka saraka bila fɔlɔ ka taa yafa dali a fɛ. O kɔ, i ka segi k'i ka saraka bɔ.

²⁵Ni koo dɔ bɛ e n'i balima dɔ cɛ, i ka banba k'o nyanabɔ janko a kana taa n'i ye faamaw fɛ, faamaw kana i di polisiw ma, olu kana i don kaso la.

²⁶Tinyɛ na, ne b'a fɔ i ye ko i tɛna bɔ o kaso la n'e m'i ka juru nin bɛɛ sara.

²⁷“Aw y'a mɛn, a fɔra ko: ‘I kana kakalaya kɛ.’

²⁸Ayiwa, ne b'a fɔ aw ye ko ni mɔgɔ o mɔgɔ ye muso filɛ k'a nyaa bɔ a fɛ, o tigi ye kakalaya kɛ a dusu la n'o muso ye ka ban.

²⁹O la, n'i kinibolo nyaa bɛ kɛ sababu ye k'i don kojugu la, a wɔgɔbi ka fili yɔrɔjan. I ka bɔnɔ i farikolo yɔrɔ dɔ la, o ka fisa a bɛɛ dafanin ka don jahanama kɔnɔ.

³⁰N'i kinibolo bɛ kɛ sababu ye k'i don kojugu la, a tigɛ ka fili yɔrɔjan. I ka bɔnɔ i farikolo yɔrɔ dɔ la, o ka fisa a bɛɛ dafanin ka don jahanama kɔnɔ.

³¹“A fɔra fana ko: ‘Ni cɛɛ min b'a fɛ k'a muso bila, a ka kan ka sɛbɛ di muso ma min b'a yira ko a banna a la.’

³²Nga, ne kɔni b'a fɔ aw ye ko ni mɔgɔ o mɔgɔ y'a ka muso bila ni kakalaya kama tɛ, o tigi b'a ka muso bila kakalaya la. Cɛɛ min y'a ka muso bila, ni cɛɛ wɛrɛ y'o muso nin furu, o tigi bɛ kakalaya kɛ.

³³“Aw y'a mɛn fana, a fɔra an faaw ye ko: ‘I ka kɛ kantigi ye i ka fɔtaw bɛɛ la, n'i y'i daa di Ala ma koo min na, i ka banba k'o kɛ.’

³⁴Ayiwa, ne b'a fɔ aw ye ko aw kana kali fewu. Aw kana kali sankolo la, bari Ala siginin bɛ masaya la o yɔrɔ la.

³⁵Aw kana kali dugukolo la bari o ye Ala seen bilayɔrɔ ye. Aw kana kali Zeruzalɛmu na bari o ye masaba Ala ka dugu ye.

³⁶I kana kali i kungolo fana na bari i tɛ se k'i kunsigi deen kelen gwɛya walima k'a fin.

³⁷Aw ka jaabili ka kɛ ɔnhɔn ye, walima ɔn ɔn ye. Ni dɔ farala o kan, o bɔra Sutana fɛ.

³⁸“Aw y'a mɛn, a fɔra ko: ‘N'i ye mɔgɔ dɔ nyaa ci, u ka kan k'i fana ta ci. N'i ye dɔ nyiin kari, u ka kan k'i fana ta kari.’

³⁹Ayiwa, ne b'a fɔ aw ye ko aw kana kojugu juru sara ni kojugu ye. Ni mɔgɔ dɔ y'i tulo kelen ci, i ka tɔ kelen nin sin a ma fana.

⁴⁰Ni mɔgɔ dɔ b'a fɛ k'i wele faamaw fɛ janko a k'i ka funteni duloki bɔsi i la, i k'i ka nɛnɛ duloki fana d'a ma.

⁴¹Ni mɔgɔ dɔ y'i karaba ko i k'a ka doni nyun ka kilo kelen nyɔgɔn kɛ n'a ye, i ka kilo fila nyɔgɔn kɛ n'a ye.

⁴²Ni mɔgɔ o mɔgɔ ye fɛɛn dɔ dali i fɛ, i k'o d'a ma. Ni mɔgɔ dɔ nana fɛɛn dɔndɔ i fɛ, i kana ban.

⁴³“Aw y'a mɛn, a fɔra ko: ‘I ka i nyiin kanu k'i jugu kɔniya.’

⁴⁴Ayiwa, ne b'a fɔ aw ye ko aw ka aw juguw kanu ka Ala dali aw tɔɔrɔbagaw ye.

⁴⁵Aw k'o kɛ janko aw ka kɛ aw sankolo la Faa deenw ye, bari ale bɛ tile bɔ mɔgɔjuguw ni mɔgɔnyumanw ye, ka sanji di konyumankɛlaw ni kojugukɛlaw ma.

⁴⁶N'aw b'aw nyiinw dɔrɔn kanu, aw bɛna mun tɔnɔ sɔrɔ o la? Hali wusuruminɛlaw tɛ o nyɔgɔn kɛ wa?

⁴⁷N'aw b'aw balimaw dɔrɔn fo, aw bɛ mun koo kɛ ni tɔw t'a kɛ? Hali Alalɔnbaliw tɛ o nyɔgɔn kɛ wa?

⁴⁸Aw ka kɛ mɔgɔnyumanw ye i n'a fɔ aw Faa min bɛ sankolo la.