Read LAYIDUKURA MATIYO 6 Bible Online

MATIYO 6 - LAYIDUKURA bible

MATIYO 6

¹“Aw ka aw yɛrɛw kɔlɔsi. Aw kana aw ka Alasira taama kɛ tɔgɔnyini koo ye. N'o tɛ, aw Faa min bɛ sankolo la, o tɛna tɔnɔ d'aw ma.

²O la, n'i bɛ fɛɛn dɔ di dɛsɛbagatɔw ma, i kana buru fiyɛ i nyafɛ i n'a fɔ tɔgɔnyinilaw b'o kɛ cogo min na Alabatosow kɔnɔ, ani sira daaw la janko mɔgɔw k'u tando. Tinyɛ na, ne b'a fɔ aw ye ko olu y'u ka tɔnɔ sɔrɔ ka ban.

³E kɔni, n'i bɛ fɛɛn dɔ di dɛsɛbagatɔw ma, i kan'a to mɔgɔ si ka bɔ a kala ma.

⁴I k'a kɛ dogo la. I Faa Ala min bɛ kodogoninw ye, ale bɛna i sara.

⁵“N'aw bɛ Ala dali, aw kan'a kɛ i n'a fɔ tɔgɔnyinilaw b'a kɛ cogo min na. Ka lɔ Alabatosow kɔnɔ ani sira daaw la ka Ala dali, o le ka di u ye. U b'a kɛ ten janko mɔgɔw k'u ye. Tinyɛ na, ne b'a fɔ aw ye ko u y'u ka tɔnɔ sɔrɔ ka ban.

⁶E kɔni, n'i b'a fɛ ka Ala dali tuma min na, i ka don i ka soo kɔnɔ ka daa tugu. I Faa Ala min b'o yɔrɔdogonin na, i k'ale dali yen. I Faa Ala min bɛ kodogoninw ye, ale bɛna i sara.

⁷N'aw bɛ Ala dali tuma min na, aw kana segi kuma kelen kan sinyɛ caaman i n'a fɔ Alalɔnbaliw, bari olu bɛ miiri ko u ka kuma caaman le bɛn'a to Ala b'u jaabi.

⁸Aw kana olu ladege, bari aw mako bɛ fɛɛn minw na, aw Faa Ala bɛ olu lɔn sanni aw k'u dali a fɛ.

⁹“Aw ka kan ka Ala dali cogo min na, o filɛ: ‘An Faa min bɛ sankolo la, i tɔgɔ ka bonya.

¹⁰I ka kɛ an ka masa ye tuma bɛɛ. I sago ka kɛ dugukolo kan i n'a fɔ a bɛ kɛ sankolo la cogo min na.

¹¹An ka bii dumuni di an ma.

¹²E ka yafa an ma i n'a fɔ an fana bɛ yafa an hakɛ tabagaw ma cogo min na.

¹³I kan'a to Sutana ka se an kɔrɔ, an tanga kojugu ma. Bari masaya ni sebagaya ani nɔɔrɔ y'i ta ye waati bɛɛ. Amiina.’[1]

¹⁴“N'aw bɛ yafa aw hakɛ tabagaw ma, aw Faa min bɛ sankolo la, ale fana bɛna yafa aw ma.

¹⁵Nga, n'aw tɛ yafa aw hakɛ tabagaw ma, aw Faa min bɛ sankolo la, ale fana tɛna yafa aw ma.

¹⁶“N'aw bɛ suun na tuma min na, aw kana aw nyaa kumu i n'a fɔ tɔgɔnyinilaw b'a kɛ cogo min na. Olu b'u nyaa kumu janko mɔgɔw k'a lɔn k'u bɛ suun na. Tinyɛ na, ne b'a fɔ aw ye k'u y'u ka tɔnɔ sɔrɔ ka ban.

¹⁷E kɔni, n'i bɛ suun na tuma min na, i k'i nyaa ko k'i kunsigi lalaga,

¹⁸janko mɔgɔw kan'a lɔn ko i bɛ suun na fɔɔ i Faa Ala min bɛ yɔrɔdogonin na. I Faa Ala min bɛ kodogoninw ye, o bɛna i sara.

¹⁹“Aw kana nafolo caaman lajɛn aw yɛrɛw ye dinyɛ nin kɔnɔ, bari bagabaga ni tumuw bɛ cɛnni kɛ, soonw fana bɛ daaw kari ka don ka fɛɛnw cɛ.

²⁰Nga, aw ye nafolo caaman lajɛn aw yɛrɛw ye sankolo la. O yɔrɔ la, bagabaga ni tumuw tɛ se ka cɛnni kɛ yen, soonw fana tɛ se ka daa kari ka don.

²¹I ka nafolo bɛ yɔrɔ min na, i ka miiriya bɛ t'o yɔrɔ la fana.

²²“Mɔgɔ nyaa kɛra i n'a fɔ a fari ka lanpan. N'i nyaa ma cɛn, i bɛ yeli kɛ.

²³Nga, n'i nyaa cɛnna, i tɛ yeli kɛ, i bɛ to dibi la. Ayiwa, e min ye mɔgɔnyuman ye, n'e nana tilan ka kɛ mɔgɔjugu ye, o ye juguya daan ye.

²⁴“Mɔgɔ si tɛ se ka baara kɛ kuntigi fila ye, bari a bɛna kelen kɔniya ka kelen kanu, walima a bɛna nɔrɔ kelen na k'a mako bɔ kelen na. O cogo la, aw tɛ se k'aw jigi la nafolo kan, ka baara kɛ Ala ye fana.

²⁵“O le y'a to ne b'a fɔ aw ye ko aw kana jɔɔrɔ aw baloko la k'a fɔ ko aw bɛna mun dumu ka mun min? Aw kana jɔɔrɔ aw fɛɛrɛbɔko la fana k'a fɔ ko aw bɛna mun fani don? Aw nii koo man fisa ni dumuni koo ye wa? Farisogo koo man fisa ni fani koo ye wa?

²⁶Aw ka kɔnɔw filɛ, u tɛ danni kɛ, u tɛ suman tigɛ. U tɛ suman don bondo kɔnɔ. Nga aw Faa min bɛ sankolo la, ale b'u balo. Aw man fisa ni kɔnɔw ye kosɛbɛ wa?

²⁷Aw la, jon bɛ se ka tile kelen dama fara a sii kan hami fɛ?

²⁸Mun y'a to aw bɛ jɔɔrɔ aw ka fɛɛrɛbɔko la? Binfeeren minw bɛ bɔ kongo kɔnɔ, aw ka olu wilicogo filɛ. U tɛ baara kɛ, u tɛ kɔɔri fana parata.

²⁹O n'a ta bɛɛ, ne b'a fɔ aw ye ko masa Solomani n'a ka faamaya bɛɛ, a ma fani sɔrɔ min ka cɛnya ye feeren nunu ta bɔ.

³⁰O biin min bɛ kongo kɔnɔ bii, ni tasuma bɛn'a jɛni sini, ni Ala b'a janto o la ten, a tɛna aw fɛɛrɛ bɔ ka tɛmɛ o kan kosɛbɛ wa? Mun na aw tɛ aw jigi la Ala kan?

³¹Aw kana jɔɔrɔ aw ka dumuni koo ni minnifɛn koo la, walima fani koo la.

³²Alalɔnbaliw le b'o fɛɛnw nyinina tuma bɛɛ. Aw Faa min bɛ sankolo la, ale b'a lɔn ko aw mako b'o fɛɛnw bɛɛ la.

³³Aw kɔni ka jija Alako la fɔlɔ, ani k'a sago kɛ. N'o kɛra, Ala bɛna fɛɛn tɔw bɛɛ d'aw ma.

³⁴Aw kana jɔɔrɔ aw ka sini makoya koow la, bari aw ka sini makoya koow bɛna nyanabɔ sini. Loon o loon n'a kunko lo.