Read LAYIDUKURA MATIYO 7 Bible Online

MATIYO 7 - LAYIDUKURA bible

MATIYO 7

¹“Aw kana tɔw kiti, janko Ala kana aw kiti.

²Aw bɛ tɔw kiti cogo min na, Ala bɛna aw kiti ten. Aw bɛ tɔw kiti k'u jalaki cogo min na, Ala fana bɛna aw kɛ ten.

³Kalafitini min b'i balima nyaa na, mun na i b'o filɛ k'a sɔrɔ lɔgɔkuru b'i ta la? I m'o lɔn?

⁴I bɛ se k'a fɔ i balima ye cogo di ko: ‘A to n bɛ kala nin bɔ i nyaa na’, k'a sɔrɔ lɔgɔkuru b'i ta la?

⁵Nanbaranmɔgɔ, lɔgɔkuru bɛ e min nyaa na, o bɔ fɔlɔ. N'i ye o kɛ, o tuma na, i bɛna yeli kɛ ka nya k'a sɔrɔ k'i balima ka kala nin bɔ.

⁶“Aw kana fɛɛn senuman di wuluw ma, n'o tɛ, u bɛna yɛlɛma k'aw cin. Aw kana aw ka fɛnnyumanw bila lɛɛw kɔrɔ, n'o tɛ, u bɛna na u dɔn k'u cɛn.

⁷“Aw k'aw ka makoyafɛn dali Ala fɛ, a bɛna o d'aw ma. Aw mako bɛ fɛɛn min na, aw k'o nyini, aw bɛn'a sɔrɔ. Aw ka daa kɔkɔ, daa bɛna yɛlɛ aw ye.

⁸Bari mɔgɔ o mɔgɔ man'a makoyafɛn dali Ala fɛ, Ala bɛna o di o tigi ma. Min mana a makoyafɛn nyini, o tigi b'o sɔrɔ. Daa bɛna yɛlɛ dakɔkɔbaga ye.

⁹Denfa jumɛn bɛ sɔn ka kabakuru d'a deen ma k'a sɔrɔ a ye buru le dali a fɛ?

¹⁰Walima n'a ye jigɛ dali a fɛ, n'a bɛna sɔn ka saa d'a ma?

¹¹Aw minw ka jugu, n'aw bɛ sɔn ka fɛnnyumanw di aw ka deenw ma, aw Faa min bɛ arijana na, ale tɛna fɛnnyuman di a dalibagaw ma ka tɛmɛ aw ta kan wa?

¹²“Aw b'a fɛ mɔgɔ tɔw ka koo min kɛ aw ye, aw fana k'o nyɔgɔn kɛ u ye. O le fɔra sariya ni kiraw ka sɛbɛw kɔnɔ.

¹³“Aw ka sirafitini ta. Siraba kɔni taama ka di, nga a bɛ taa ni mɔgɔ ye halakiyɔrɔ la. Mɔgɔ caaman do b'o le ta.

¹⁴Aw ka sirafitini ta ka taa don ni dafitini ye, a taama kɔni ka gwɛlɛ, a taabagaw man ca, nga a bɛ taa ni mɔgɔ ye hɛrɛ yɔrɔ la.

¹⁵“Mɔgɔ minw bɛ galon tigɛ k'olu ye kiraw ye, aw k'aw yɛrɛw kɔlɔsi olu la. N'u bɛ na aw fɛ, u b'u yɛrɛw kɛ sagaw ye k'a sɔrɔ waraw lo.

¹⁶Aw bɛna u lɔn u ka kɛwaliw fɛ. Mɔgɔ tɛ pekun tigɛ ;nɔniyiri kan. Toro fana tɛ sɔrɔ balansanyiri la.

¹⁷Yirinyuman deen le ka di, nga yirijugu ka deen man di.

¹⁸Yirinyuman tɛ se ka denjugu kɛ, yirijugu fana tɛ se ka dennyuman kɛ.

¹⁹Yiri o yiri tɛ dennyuman kɛ, u bɛna o tigɛ k'a fili tasuma na.

²⁰O cogo la, mɔgɔ minw bɛ galon tigɛ k'olu ye kira ye, aw bɛna u lɔn u ka kɛwaliw fɛ.

²¹“Mɔgɔ minw bɛ ne wele ko ‘Matigi, Matigi,’ olu bɛɛ tɛna don arijana na, fɔɔ ne Faa min bɛ sankolo la, o sagokɛlaw.

²²Ni Ala ka kitilon nana se, mɔgɔ caaman bɛn'a fɔ ne ye ko: ‘Matigi, an ye kiraya kɛ e tɔgɔ la, ka jinaw gwɛn ka bɔ mɔgɔw la e tɔgɔ la, ka kabako caaman kɛ e tɔgɔ la.’

²³O loon na, ne bɛn'a fɔ u ye ko: ‘Ne t'aw lɔn, aw ye taa ka bɔ ne kɔrɔ kojugukɛla nunu.’

²⁴“Ne ye kuma minw fɔ sisan, ni mɔgɔ min y'o labato, o tigi bɛ i n'a fɔ hakilitigi min y'a ka boon lɔ fara kan.

²⁵Sanjiba nana ni fɔnyɔba ye, jii cayara, nga o si ma se ka boon nin ben, bari a juu siginin tun bɛ fara kan.

²⁶Nga, mɔgɔ min b'o kuma mɛn, n'a t'o labato, o tigi bɛ i n'a fɔ naloman min y'a ka soo lɔ cɛncɛn kan.

²⁷Sanjiba nana ni fɔnyɔba ye, jii cayara, boon benna. A mugumugura.”

²⁸Yezu y'o kumaw fɔ ka ban tuma min na, jama bɛɛ kabakoyara a ka mɔgɔ kalancogo la,

²⁹bari a tun m'u kalan i n'a fɔ sariya karamɔgɔw bɛ to k'u kalan cogo min na. Nga a tun b'u kalan i n'a fɔ fanga bɛ mɔgɔ min bolo.