Read LAYIDUKURA MATIYO 8 Bible Online

MATIYO 8 - LAYIDUKURA bible

MATIYO 8

¹Yezu jigira ka bɔ kulu kan tuma min na, jamaba tugura a kɔ.

²O kɔ, kunatɔcɛ dɔ gwɛrɛla, k'a kunbiri gwan Yezu kɔrɔ k'a fɔ a ye ko: “Matigi, n'i sɔnna, i bɛ se ka n kɛnɛya.”

³Yezu magara a la, k'a fɔ a ye ko: “N sɔnna ko i ka kɛnɛya. O yɔrɔnin bɛ, cɛɛ kɛnɛyara.”

⁴Nga Yezu y'a fɔ a ye ko: “I yɛrɛ kɔlɔsi, i kan'a fɔ mɔgɔ si ye ko ne le y'i kɛnɛya dɛ. Nga, taa i yɛrɛ yira sarakalasebaga la, Musa tun ye saraka min koo fɔ kunatɔ ka kɛnɛya koo la, i k'o bɔ k'a yira mɔgɔw la ko i kɛnɛyara.”

⁵Yezu donna Kafaranamu dugu kɔnɔ tuma min na, sɔlidasi kuntigi do gwɛrɛla a la ka dɛmɛ nyini a fɛ

⁶ko: “Matigi, n ka baaraden lanin bɛ soo, a man kɛnɛ, murukubana b'a la. A tɔɔrɔnin lo kosɛbɛ.”

⁷Yezu y'a fɔ a ye ko ale bɛna ta'a kɛnɛya.

⁸Nga sɔlidasi kuntigi y'a fɔ Yezu ye ko: “Matigi, ne kuun ka dɔgɔ i ka taa ne ka soo. I ka kuma kelen fɔ dɔrɔn, o bɛna ne ka baaraden kɛnɛya.

⁹Kuntigi dɔw bɛ ne fɛ, ne fana bɛ sɔlidasi dɔw kuun na. Ne bɛ se k'a fɔ kelen ye ko: ‘Taa yan fɛ’, a bɛ taa. K'a fɔ dɔ wɛrɛ fana ye: ‘Na yan’, a bɛ na. K'a fɔ n ka jɔɔn ye ko: ‘Nin kɛ ten’, a b'o kɛ.”

¹⁰Yezu y'o kuma mɛn tuma min na, a kabakoyara. A y'a fɔ a nɔfɛmɔgɔw ye ko: “Tinyɛ na, ne b'a fɔ aw ye ko ne ma mɔgɔ si ye Isirayɛlidenw fɛ, min lara ne la ten fɔlɔ.

¹¹Ne b'a fɔ aw ye ko mɔgɔ caaman bɛna bɔ kɔrɔn ni tileben fɛ ka taa sigi Ibrayima ni Isiyaka ani Yakuba fɛ sankolo tigi ka masaya yɔrɔ la ka dumuni kɛ.

¹²Nga mɔgɔ minw tun ka kan ka taa sankolo tigi ka masaya yɔrɔ la, olu bɛna to dibi la kɛnɛma. U bɛna kasi yen k'a fɔ ko n'u tun y'a lɔn.”

¹³O kɔ, Yezu y'a fɔ sɔlidasi kuntigi nin ye ko: “I lara ne la minkɛ, i bɛ fɛɛn min fɛ, o ka kɛ i ye. Taa soo.” Yezu y'o kuma nin fɔ tuma min na, sɔlidasi kuntigi ka baaraden kɛnɛyara o waati yɛrɛ la.

¹⁴O kɔ, Yezu taara Piyɛri ka soo. A taara Piyɛri biranmuso lanin sɔrɔ farigwan bolo.

¹⁵Yezu magara a bolo la, a ka farigwan banna. A wilila ka dumuni tobi a ye.

¹⁶Wulafɛ, mɔgɔw taara ni jinatɔ caaman ye Yezu fɛ. A ye jinaw gwɛn ka bɔ u la ni kumakan kelen ye ka banabagatɔ dɔ wɛrɛw kɛnɛya.

¹⁷O kɛra janko kira Ezayi tun ye kuma min fɔ, o ka kɛ. A tun ko: “A y'an ka bana n'an ka sɛgɛn ban.”

¹⁸Yezu y'a ye ko jamaba y'ale lamini minkɛ, a y'a fɔ a ka kalandenw ye ko: “An ka taa baa kɔ.”

¹⁹Sanni u ka taa, sariya karamɔgɔ dɔ gwɛrɛla a la k'a fɔ a ye ko: “Karamɔgɔ, i mana taa yɔrɔ o yɔrɔ, ne bɛna tugu i kɔ.”

²⁰Yezu y'a fɔ a ye ko: “Dingɛ bɛ kongowuluw fɛ, nyaga bɛ kɔnɔw fɛ, nga layɔrɔ tɛ Mɔgɔ Dencɛ tɔgɔ la.”

²¹A ka kalanden dɔ wɛrɛ fana y'a fɔ a ye ko: “Matigi, sira di n ma fɔlɔ n bɛ taa n facɛ suu don ka na.”

²²Yezu y'a fɔ a ye ko: “A to mɔgɔ saninw bɛ taa u ka suu don. E ka tugu ne kɔ.”

²³Yezu n'a ka kalandenw donna kurun kɔnɔ ka taa.

²⁴O tuma na, fɔnyɔba wilila fɔɔ kurun tun bɛ nyini ka tunu. O y'a sɔrɔ Yezu tun bɛ sinɔgɔra.

²⁵A ka kalandenw y'a kunun k'a fɔ a ye ko: “Matigi, an bɛna sa jii la, an kisi.”

²⁶Yezu y'a fɔ u ye ko: “Mun na aw bɛ siran ten? Jigitan nunu!” O kɔ, a wilila ka sɔngɔ fɔnyɔ ni baji kunna. Yɔrɔ malara tɔntɔntɔn.

²⁷U bɛɛ kabakoyara. U tora k'a fɔ nyɔgɔn ye ko: “Cɛɛ nin ye mɔgɔ sifa jumɛn ye? Hali fɔnyɔ ni baji b'a ka kuma labato.”

²⁸Yezu sera baa kɔ, Gadare mara la tuma min na, jinatɔ fila bɔra kaburutu la ka ta'a kunbɛn. U tun ka fari kosɛbɛ. Mɔgɔ si tun tɛ se ka tɛmɛ n'o yɔrɔ sira ye.

²⁹U y'a daminɛ ka pɛrɛn ko: “Mun bɛ an ni e cɛ Ala Dencɛ? I nana an tɔɔrɔ sanni an tɔɔrɔwaati ka se wa?”

³⁰O y'a sɔrɔ lɛkuluba dɔ tun bɛ dumuni kɛra o yɔrɔ masurun na.

³¹Jina nunu ye Yezu dali ko: “N'i b'an gwɛn, a to an ka taa don lɛɛ nunu na.”

³²Yezu y'a fɔ u ye k'u ka taa don lɛɛw la. U bɔra cɛɛ fila nunu na ka taa don lɛɛw la. Lɛkulu bɛɛ girinna ka jigi kulu jigijigijugu fɛ ka taa don baji la. U bɛɛ sara yen.

³³Mɔgɔ minw tun bɛ lɛɛw kɔlɔsira, olu bolila ka taa dugu kɔnɔ ka lɛɛw, ni jinatɔkɔrɔ fila nunu ka koo bɛɛ lakali mɔgɔw ye.

³⁴Dugu mɔgɔw bɛɛ bɔra ka taa Yezu sɛgɛrɛ. U sera a fɛ tuma min na, u y'a dali k'a ka sabali ka taa ka bɔ olu ka mara la.