Read LAYIDUKURA MARIKI 10 Bible Online

MARIKI 10 - LAYIDUKURA bible

MARIKI 10

¹Yezu wilila ka bɔ o yɔrɔ la ka taa Zude mara la, Zurudɛn baa kɔ. Jamaba taara lajɛn a kɔrɔ tugu. A ye kuma ta k'u kalan i n'a fɔ a tun bɛ to k'a kɛ cogo min na ka kɔrɔ.

²Farizinyɛ dɔw gwɛrɛla a la k'a nyininga ko: “A daganin bɛ cɛɛ k'a muso furu sa wa?” U y'o fɔ k'a darabɔ.

³Yezu fana y'u nyininga ko: “Musa ye sariya jumɛn sigi aw ye o koo la?”

⁴U y'a jaabi ko: “Musa sɔnna ko cɛɛ ka furusasɛbɛ dilan ka sɔrɔ k'a muso bila.”

⁵Yezu y'a fɔ u ye ko: “Aw ka dusugwɛlɛya le y'a to Musa y'o sariya sigi aw ye.

⁶N'o tɛ, dinyɛ daminɛtuma na, ‘Ala ye cɛɛ ni muso dan.’

⁷O le y'a to, cɛɛ bɛn'a faa n'a baa to yen ka nɔrɔ a muso la.

⁸U fila bɛna jɛn ka kɛ kelen ye. O cogo la, u tɛ fila ye tugu, nga kelen.

⁹O la, Ala ye fɛɛn min jɛn k'a kɛ kelen ye, mɔgɔ si kana o faran.”

¹⁰Yezu n'a ka kalandenw kɔsegira soo tuma min na, u y'a nyininga o koo la tugu.

¹¹A y'a fɔ u ye ko: “Mɔgɔ o mɔgɔ y'a muso bila ka dɔ wɛrɛ ta, o tigi bɛ kakalaya kɛ, a b'a muso fɔlɔ hakɛ ta.

¹²Ni muso min bɔra a cɛɛ fɛ ka taa furu dɔ wɛrɛ fɛ, o fana bɛ kakalaya kɛ.”

¹³Mɔgɔw taara Yezu sɛgɛrɛ ni denmisɛn dɔw ye ko a k'a bolo la u kan ka duba kɛ u ye, nga a ka kalandenw wilila o mɔgɔw kama.

¹⁴Yezu y'o ye minkɛ, a dimina kalandenw kɔrɔ k'a fɔ u ye ko: “Aw k'a to denmisɛnw ka na ne fɛ, aw kana u bali, sabu, olu bɔnyɔgɔnkow le bɛ don arijana na.

¹⁵Tinyɛ na, ne b'a fɔ aw ye ko ni mɔgɔ min ma sɔn Ala ka koo ma i n'a fɔ denmisɛn bɛ sɔn a facɛ ka kuma ma cogo min na, o tigi tɛna se ka don Ala ka mara kɔnɔ fewu.”

¹⁶O kɔ, Yezu ye denmisɛn nunu ta kelen kelen k'a bolo la u kan ka duba kɛ u ye.

¹⁷Yezu taatɔ dugu wɛrɛ la, cɛɛ dɔ bolila ka ta'a kunbiri gwan a kɔrɔ k'a nyininga ko: “Karamɔgɔnyuman, ne ka kan ka mun kɛ ka hɛrɛ banbali sɔrɔ?”

¹⁸Yezu y'a fɔ a ye ko: “Mun na i bɛ ne wele karamɔgɔnyuman? Mɔgɔnyuman si tɛ yen ni Ala kelen tɛ.

¹⁹I bɛ Ala ka sariyaw lɔn: ‘I kana mɔgɔ faga, i kana kakalaya kɛ, i kana sonyali kɛ, i kana galon la i mɔgɔnyɔgɔn kan, i kana mɔgɔ si tɔnyɔ, i faa n'i baa bonya.’ ”

²⁰Cɛɛ y'a jaabi ko: “Karamɔgɔ, ne ye olu bɛɛ labato kabini n denmisɛn tuma.”

²¹O la, Yezu y'a filɛ, a koo diyara a ye. A y'a fɔ a ye ko: “Fɛɛn kelen b'i jɛn. Taa i bololafɛn bɛɛ feere k'a wari tilan faantanw cɛ. O kɔ, na tugu ne kɔ. Ala bɛna nafoloba d'i ma sini.”

²²O kuma ye cɛɛ nyaa sisi. A dusu kasinin taara, bari nafoloba tun b'a fɛ.

²³Kalandenw tun ye Yezu lamini. A y'u filɛ k'a fɔ u ye ko: “Nafolotigiw donko ka gwɛlɛ Ala ka mara kɔnɔ dɛ!”

²⁴O kuma ye kalandenw kabakoya. Yezu ye kuma ta tugu k'a fɔ u ye ko: “N balimaw, minw jigi bɛ nafolo kan, olu donko ka gwɛlɛ Ala ka mara kɔnɔ dɛ!

²⁵Nyɔgɔmɛ donko ka nɔgɔ miseli woo fɛ ka tɛmɛ nafolotigi donko kan Ala ka mara kɔnɔ.”

²⁶Kalandenw kabakoyara tugu ka dama tɛmɛ fɔɔ u tun b'a fɔra nyɔgɔn ye ko: “Pati! O tuma na, jon le bɛ se ka kisi?”

²⁷Yezu y'u filɛ k'a fɔ ko: “Mɔgɔw tɛ se k'u yɛrɛ kisi, nga Ala bɛ se k'u kisi, bari Ala bɛ se fɛɛn bɛɛ la.”

²⁸Piyɛri y'a fɔ Yezu ye ko: “A filɛ, an jɛnna an bololafɛn bɛɛ kɔ ka tugu i kɔ.”

²⁹Yezu y'a jaabi ko: “Tinyɛ na, ne b'a fɔ aw ye ko ni mɔgɔ o mɔgɔ jɛnna a ka dugu kɔ, walima a dɔgɔw, walima a kɔrɔw, walima a faa, walima a baa, walima a deenw, walima a ka forow, ne ni kibaru diman kɔsɔn,

³⁰siga t'a la, o tigi bɛna olu bɛɛ nyɔgɔn kɛmɛ kɛmɛ sɔrɔ dinyɛ nin na. A bɛna duguw sɔrɔ, ka dɔgɔ ni kɔrɔw sɔrɔ, ka baaw sɔrɔ, ka deenw sɔrɔ, ka forow sɔrɔ. A bɛna tɔɔrɔ fana sɔrɔ, nga a bɛna sini hɛrɛ sɔrɔ.

³¹Nyamɔgɔ caaman bɛna kɛ kɔmɔgɔw ye, kɔmɔgɔw bɛna kɛ nyamɔgɔw ye.”

³²Yezu n'a ka kalandenw tun bɛ sira kan ka taa Zeruzalɛmu. Yezu tun bɛ taamana u nyafɛ. Kalandenw hakili nyagaminin tun lo. Mɔgɔ minw tun b'u nɔɔ fɛ, siranya tun bɛ olu la. Yezu taara n'a ka kalanden tan ni fila ye u danna tuguni. Koo min bɛn'a sɔrɔ, a y'a fɔ u ye.

³³A y'a fɔ ko: “Ayiwa, an bɛ taara Zeruzalɛmu. O yɔrɔ la, u bɛna Mɔgɔ Dencɛ don sarakalasebagaw ni sariya karamɔgɔw bolo. U bɛn'a fɔ ko a ka kan ni saya ye, k'a don siya wɛrɛw bolo.

³⁴U bɛna yɛlɛ a ma, k'u daji tu a kan, k'a bugɔ ni busan ye, k'a faga, nga tile saba a faganin kɔ, a bɛna kunun.”

³⁵O kɔ, Zebede ka dencɛ fila, Zaki ni Zan, gwɛrɛla Yezu la k'a fɔ a ye ko: “Karamɔgɔ, an bɛna fɛɛn min nyini i fɛ, an b'a fɛ i k'o kɛ an ye.”

³⁶Yezu y'u nyininga ko: “Aw b'a fɛ ne ka mun kɛ aw ye?”

³⁷U y'a jaabi ko: “I bɛna sigi masaya la ni nɔɔrɔ ye tuma min na, i ka sɔn an kelen ka sigi i kinibolo fɛ, kelen ka sigi i numanbolo fɛ.”

³⁸Yezu y'a fɔ u ye ko: “Aw bɛ fɛɛn min fɛ, aw t'o lɔn. Tɔɔrɔ ni sɛgɛn min bɛna ne sɔrɔ, aw bɛ se k'o nyɔgɔn munyu wa?”

³⁹U y'a jaabi ko: “An bɛna se.” Yezu y'a fɔ u ye ko: “Tɔɔrɔ ni sɛgɛn min bɛna ne sɔrɔ, o nyɔgɔn bɛna aw fana sɔrɔ,

⁴⁰nga, mɔgɔ min ka kan ka sigi ne kinibolo fɛ walima ne numanbolo fɛ, ne t'o latigɛbaga ye. Ala y'o yɔrɔw labɛn mɔgɔ minw ye, u maranin bɛ olu ye.”

⁴¹Kalanden tɔ nunu y'o mɛn minkɛ, u dimina Zaki ni Zan kɔrɔ.

⁴²O tuma na, Yezu y'u bɛɛ wele k'a fɔ u ye ko: “Aw b'a lɔn ko dinyɛ kɔnɔ, jamana kuntigiw b'u ka jamana mɔgɔw tɔɔrɔ, mɔgɔbabaw bɛ fanga yira tɔw la.

⁴³A man kan ka kɛ ten aw cɛma. Ni mɔgɔ min b'a fɛ ka kɛ kuntigi ye aw cɛma, o ka kan ka kɛ aw ka baaraden ye.

⁴⁴Ni mɔgɔ min b'a fɛ ka kɛ nyamɔgɔ ye aw cɛma, o ka kan ka kɛ aw bɛɛ ka jɔɔn ye,

⁴⁵bari Mɔgɔ Dencɛ ma na ko mɔgɔw ka baara kɛ a ye, nga a nana ka mɔgɔw mako nya, ani k'a yɛrɛ nii di ka kɛ mɔgɔ bɛɛ nii kunmabɔ sara ye.”

⁴⁶Yezu n'a ka kalandenw ni jamaba sera Zeriko. U bɔtɔ o dugu kɔnɔ, Time dencɛ Baritime min kɛra finyɛntɔ ye, o siginin tun bɛ sira daa la ka dalili kɛ.

⁴⁷A y'a mɛn ko Nazarɛti Yezu bɛ tɛmɛna minkɛ, a y'a daminɛ ka pɛrɛn ko: “Masacɛ Dawuda ka deen Yezu, makari ne la.”

⁴⁸Mɔgɔ caaman sɔngɔra a kunna ko a ka je, nga a pɛrɛnna ka tɛmɛ fɔlɔta kan ko: “Dawuda ka deen, makari ne la.”

⁴⁹Yezu lɔra k'a fɔ ko: “Aw k'a wele n ye.” O la, u ye finyɛntɔ wele k'a fɔ a ye ko: “I hakili sigi. Wili, a ko i ka na.”

⁵⁰A y'a ka duloki fili ka pan ka lɔ. A taamana ka taa Yezu fɛ.

⁵¹Yezu y'a nyininga ko: “I b'a fɛ ne ka mun kɛ i ye?” A y'a jaabi ko: “Karamɔgɔ, ne ka yeli kɛ tuguni.”

⁵²Yezu y'a fɔ a ye ko: “Taa. I kɛnɛyara bari i lara ne la.” O yɔrɔnin kelen, a nyaa yɛlɛla, a tugura Yezu nɔɔ fɛ.