Read LAYIDUKURA MARIKI 11 Bible Online

MARIKI 11 - LAYIDUKURA bible

MARIKI 11

¹Yezu n'a nɔfɛmɔgɔw surunyana Bɛtifaze ni Betani na. U yɔrɔ tun man jan Zeruzalɛmu na tugu. U tun bɛ Olivuyirikulu gɛrɛfɛ. K'u to yen, Yezu y'a ka kalandenw fila ci.

²A y'a fɔ u ye ko: “Dugu min bɛ aw nyafɛ, aw ye taa yen. Aw dontɔ, aw bɛna faliden dɔ sirinin ye, mɔgɔ si ma deli ka yɛlɛ a kan fɔlɔ. Aw k'a foni ka na n'a ye.

³Ni mɔgɔ dɔ ye aw nyininga ko mun na aw b'a foni, aw k'o tigi jaabi ko aw ka Matigi mako b'a la, ko yan ni dɔɔni, ko a bɛna mɔgɔ bila ka segi n'a ye.”

⁴O la, u taara faliden nin sirinin sɔrɔ boon dɔ daa la sira gɛrɛfɛ. U y'a daminɛ k'a foni.

⁵Mɔgɔ minw tun b'o yɔrɔ la, u dɔw y'u nyininga ko: “Aw bɛ mun kɛra? Mun na aw bɛ faliden nin foni?”

⁶Kalandenw y'u jaabi i n'a fɔ Yezu tun y'a fɔ u ye cogo min na. O mɔgɔw sɔnna k'u ka taa ni faliden ye.

⁷U taara ni faliden ye Yezu fɛ. U y'u ka faniw la a kɔɔ kan. Yezu yɛlɛla a kan.

⁸Mɔgɔ caaman y'u ka faniw la sira kan, dɔw fana ye furaburuw tigɛ waga kɔnɔ k'u lala sira kan.

⁹Mɔgɔ minw tun bɛ Yezu nyafɛ ani minw tun b'a kɔfɛ, olu tun bɛ pɛrɛn ko: “An bɛ Ala tando. Mɔgɔ min natɔ ye Matigi tɔgɔ la, Ala ka barika don o la!

¹⁰An faa Dawuda ka masaya nyɔgɔn min bɛna sigi, Ala ka barika don o la. An bɛ Ala tando.”

¹¹Yezu sera Zeruzalɛmu minkɛ, a taara don Alabatosoba kɔnɔ ka fɛɛn bɛɛ filɛ. O kɔ, tilekun tun bɛ nyini ka don minkɛ, a n'a ka kalanden tan ni fila bɔra ka taa Betani.

¹²O dugusagwɛ, Yezu n'a ka kalandenw bɔtɔ Betani, kɔngɔ y'a minɛ.

¹³K'a to yɔrɔjan, a ye torosun dɔ ye, furaburu tun b'a la. A taar'a filɛ yala n'a bɛna deen sɔrɔ a la. Nga a gwɛrɛla a la tuma min na, a ma foyi ye a la furaburu kɔ, bari toro denwaati tun tɛ.

¹⁴O tuma na, Yezu ye torosun danga ko: “Mɔgɔ si tɛna i deen dumu tugu abada.” A ka kalandenw y'o kuma mɛn.

¹⁵Yezu n'a ka kalandenw sera Zeruzalɛmu tuma min na, a donna Alabatosoba kɔnɔ. Jagokɛla ni sannikɛla minw tun bɛ yen, a y'a daminɛ k'olu gwɛn, ka warifalenbagaw ka tabaliw ni tubanifeerelaw ka sigilanw nyɔnti k'u benben.

¹⁶A ma sɔn tugu mɔgɔ si ka tɛmɛ Alabatosoba luu kɔnɔ ni feerefɛn ye.

¹⁷O kɔ, a ye mɔgɔw kalan ko: “A fɔra Ala ka kuma na ko: ‘Ne ka soo bɛna kɛ siyaw bɛɛ ka dalili kɛyɔrɔ ye.’ Nga aw kɔni y'a kɛ soonw ka yɔrɔ ye.”

¹⁸Sarakalasebagaw ni sariya karamɔgɔw y'o mɛn tuma min na, u y'a daminɛ ka fɛɛrɛ nyini Yezu fagako la. U siranna Yezu nya, bari a ka kalan tun diyara mɔgɔ caaman ye.

¹⁹Tilekun donnin kɔ, Yezu n'a ka kalandenw bɔra dugu kɔnɔ.

²⁰O dugusagwɛ sɔgɔma, Yezu n'a ka kalandenw tɛmɛtɔ torosun danganin yɔrɔ la, u y'o torosun nin ye. A jara fɔɔ ka se a liliw ma.

²¹Yezu tun ye kuma min fɔ, Piyɛri hakili jigira o la minkɛ, a y'a fɔ Yezu ye ko: “Karamɔgɔ, a filɛ, i tun ye torosun min danga, a jara.”

²²Yezu y'a fɔ u ye ko: “Aw ye la Ala la.

²³Tinyɛ na, ne b'a fɔ aw ye ko ni mɔgɔ dɔ y'a fɔ kulu nin ye ko: ‘Wili ka bɔ yan ka taa ben kɔgɔji la,’ n'o tigi ma sigasiga a dusukun na, n'a lara a la ko a ye min fɔ, k'o bɛna kɛ, o bɛna kɛ a ye.

²⁴O le y'a to, ne b'a fɔ aw ye ko aw mana fɛɛn o fɛɛn dali Ala fɛ, aw ka la a la ko aw bɛna o fɛɛn sɔrɔ, aw bɛn'a sɔrɔ.

²⁵K'aw lɔnin to Ala dalili la, n'o y'a sɔrɔ dɔ ye aw hakɛ ta, aw ka yafa o ma janko aw Faa min bɛ sankolo la, o k'aw ka hakɛw yafa fana. [

²⁶Nga n'aw ma yafa tɔw ma, aw Faa min bɛ sankolo la, o tɛna aw ka hakɛw yafa fana.]”

²⁷Yezu n'a ka kalandenw segira Zeruzalɛmu tuguni. Ka Yezu to yaalayaala la Alabatosoba kɔnɔ, sarakalasebagaw ni sariya karamɔgɔw ani cɛkɔrɔbaw taar'a sɛgɛrɛ.

²⁸U y'a nyininga ko: “Jon le ye sira d'i ma ka koo nunu kɛ? Jon y'o kɛ see d'i ma?”

²⁹Yezu y'u jaabi ko: “Ne bɛna aw nyininga koo kelen dɔrɔn na. N'aw ye ne jaabi, o tuma na, min ye sira di ne ma ka koo nunu kɛ, ne bɛna o fɔ aw ye.

³⁰Jon le ye Zan ci ko a ka mɔgɔw batize, Ala lo wa, walima mɔgɔw lo? Aw ka ne jaabi.”

³¹O tuma na, u y'u ka miiriya fɔ nyɔgɔn ye ko: “N'an y'a jaabi ko Ala lo, a bɛna an nyininga ko mun na an ma la a la?

³²N'an y'a fɔ ko mɔgɔw lo fana, haya!” (U tun bɛ siran jama nya, bari mɔgɔ bɛɛ tun bɛ Zan jati kira tigitigi ye.)

³³O la, u ye Yezu jaabi ko: “An t'a lɔn.” Yezu y'a fɔ u ye ko: “Ayiwa, n'o lo, mɔgɔ min ye sira di ne ma ka koo nunu kɛ, ne fana tɛna o fɔ aw ye.”